To a tamne (24.06.19)
Cyłkownje 10 000 eurow na nuzniku zabył je 83lětny muž na wotpočnišću při awtodróze pola Oldenburga. Na zbožo staj mandźelskaj z Wittmunda móšnju našłoj a ju policiji přepodałoj. Dwaj dnjej pozdźišo je tam starušk swoje pjenjezy wotewzał. Nětko móže sej són wo swójskim čołmje zwoprawdźić a sej jón kupić. Sprawnaj mandźelskaj staj sej na kóždy pad sobujězbu zasłužiłoj.
Dźewjećlětny hólčec je na parkowanišću w Ludwigshafenje awto wodźił. Pódla njeho sedźeše 40lětny nan, kiž bě jemu to dowolił. Zo móhł scyła přez prědnje wokno hladać, sedźeše pachoł na swojim dźěćacym sydle. Pedalej za borzdźidło a płun pak je přiwšěm docpěł. Policija jeju wulět po parkowanišću zakónči. Za njezamołwite zadźerženje ma nan nětko z chłostanjom ličić.
Iran UNO informował
Teheran (dpa/SN). Iran je UNO a wosebje Bjezstrašnostnu radu wo pozdatnym ranjenju swojeho powětroweho ruma přez trut (Drohne) USA w Persiskim zaliwje informował. Teheran nima zajim na dalšich napjatosćach, chce pak na ranjenje mjezow konsekwentnje reagować, zdźěli rěčnik iranskeho wonkowneho ministerstwa. USA porno tomu dale twjerdźa, zo bě trut w mjezynarodnym powětrowym rumje nad morjom po puću. Wobě stronje matej po zdaću jasne dopokazy.
Hunt chce Johnsona wužadać
London (dpa/SN). W boju wo zastojnstwo premierministra Wulkeje Britaniskeje chce wonkowny minister Jeremy Hunt přećiwo faworitej Borisej Johnsonej nastupić. Hunt bě so wčera w poslednim wothłosowanju parlamenta přećiwo wobswětowemu ministrej Michaelej Govej přesadźił. Hunt a Johnson dyrbitaj nětko w rozsudnym kole přećiwo sebi nastupić, při čimž maja čłonojo konserwatiwnych Toryjow poslednje słowo.
Sankcije přećiwo Ruskej traja
Protestne hibanje „Fridays for future“ chcyše dźensa ze swojim ...
Wěstotny centrum wotewrjeny
Choćebuz (SN). Nowy wěstotny centrum su wčera w Choćebuzu wotewrěli. Załoženje tajkeho centruma běchu po wjacorych njeluboznych podawkach a namócnosćach prěnje měsacy 2018 wobzamknyli, zo bychu wěstotne začuće wobydlerjow sylnili. Nětko chcedźa sobu- dźěłaćerjo porjadoweho zarjada města zhromadnje z policajskej prewenciju ludźom z rozmołwnym partnerom być. We wobłuku měšćanskeho swjedźenja kónc tydźenja chcedźa nowy centrum na Berlinskej dróze hižo jako zasadźensku centralu wěstotnych mocow wužiwać.
Nutřkowna statna sekretarka Katrin Lange rjekny: „Reagujemy ze załoženjom centruma na połoženje w Choćebuzu a na žadanja wobydlerjow. Kraj a policija stej intensiwnje hromadźe dźěłałoj, zo byštej prezencu wěstotnych zamołwitych a policije kaž tež wěstotu w měsće polěpšiłoj. Nowy wěstotny centrum je dalši měznik zhromadneho dźěła.“
Žana wjetšina za Webera w EU
Brüssel (dpa/SN). Europska unija njeje sej w prašenju nawodnistwa přezjedna a je rozsud wo tym na wurjadny wjeršk 30. junija přestorčiła. Politikar CSU Manfred Weber nima dotal žanu wjetšinu, ale tež dalši načolni kandidaća nic, kaž zwjazkowa kanclerka Angela Merkel (CDU) minjenu nóc w Brüsselu rjekny. Prezident Rady EU Donald Tusk chce přichodny tydźeń z parlamentom EU za wupućom pytać. Přiwšěm nochcyštaj ani Merkel ani Tusk wuzamknyć, zo ma Weber tola hišće šansu.
Njeńdźe jenož wo naslědnistwo šefa komisija EU Jeana-Claudea Junckera, ale tež wo štyri dalše zastojnstwa: wo prezidenta Europskeje rady, Europskeho parlamenta, Europskeje centralneje banki a wo zastojnstwo społnomócnjeneho za wonkowne naležnosće EU. Při tym chcedźa na wuwaženosć mjez mužemi a žonami a regionow dźiwać.
Zwrěšćił je wčera w Brüsselu tohorunja pospyt, klimowe zaměry EU znowa definować. Předewšěm wuchodoeuropske kraje su so tomu spjećowali.
To a tamne (21.06.19)
Trajaca suchota pohnu Berlinsku policiju k njewšědnej akciji: Z wodomjetakom je trawnik při Greenwichowej promenadźe w měšćanskej štwórći Tegel krjepiła. Iniciatiwa za to je wušła z jeje rjadow, kaž rěčnica zdźěli. Bě to lětsa prěnje zasadźenje toho razu. Dyrbjało-li dale tak sucho wostać, chce policija wo tym rozmyslować, krjepjensku akciju wospjetować, po dorěči z měšćanskim zarjadom za zelenišća.
Wjewjerčka je w Dortmundźe w gullyjowym wěku tčacy wostała a pomoc wobornikow trjebała. Zwěrjatko hladaše wčera jenož hišće z hłowu z dźěry wěka. Prawdźepodobnje bě wone z kanaloweho systema přez wěko ćeknyć spytało, hdźež je tčacy wostało. Dokelž njemóžachu ju wobornicy wuswobodźić, dowjezechu wjewjerčku scomt wěkom ke skótnemu lěkarjej, kiž ju po narkozy wućahny.
Minority Monitor – nowy srědk mjeńšin
Na jubilejnym kongresu FUEN w Bratislavje internetnu platformu předstajili
Bratislava. Hotowa babylonska mjerwjeńca rěčow knježeše minjeny kónc tydźenja w słowakskej stolicy Bratislavje. Federalistiska unija europskich narodnych mjeńšin (FUEN) bě na swój jubilejny kongres składnostnje 70lětneho wobstaća organizacije přeprosyła. FUEN bu 1949 załožena a je mjeztym ze 103 čłonskimi organizacijemi z 35 krajow najwjetša mjeńšinowa organizacija swěta a wažna zastupnica mjeńšin na europskej runinje. Serbja su mjeztym 30 lět sobustaw FUEN. Wot 1992 běchu woni dotal stajnje w prezidiju, potajkim w předsydstwje FUEN, zastupjeni byli.
Do Bratislavy přijěło je cyłkownje něhdźe 120 wobdźělnikow. Serbska delegacija pod nawodom dotalneho wiceprezidenta Bjarnata Cyža wobsteješe z cyłkownje sydom wosobow.
Smjertne hroženja dóstali
Köln (dpa/SN). Po morjenju Kasselskeho knježerstwoweho prezidenta Waltera Lübckeho su njeznaći dalšim politikarjam ze smjerću hrozyli. K nim słušataj Kölnska wyša měšćanostka Herniette Reker a měšćanosta Alteny Andreas Hollstein, kaž wón dpa zdźěli. Poslednje hroženje dóstal Hollstein wutoru. Hač je zwiska k zamordowanju Lübckeho, njemóžeše policija dotal rjec. Reker kaž tež Hollstein buštaj hižo raz nadpadnjenaj.
Johnson dale prědku
London (dpa/SN). W boju wo zastojnstwo předsydy Konserwatiwneje strony we Wulkej Britaniskej a přichodneho premierministra je Boris Johnson swój předskok dale powjetšił. Bywši wonkowny minister je wčera 143 z cyłkownje 313 hłosow frakcije Toryjow dóstał. W kruhu kandidatow su hišće wonkowny minister Jeremy Hunt, wobswětowy minister Michael Gove a nutřkowny minister Sajid Javid. W přichodnych kołach pomjeńša ličbu wobdźělnikow na dweju. Potom rozsudźa čłonojo strony.
Sewjernu Koreju wopytał
Wobdźělnicy wčera zahajeneho 37. němskeho ewangelskeho ...
Do wólbowso hišće raz zešli
Podstupim (SN/MkWj). K swojemu poslednjemu prawidłownemu wuradźowanju do wólbow krajneju sejmow w septembru stej so Radźe za serbske naležnosće Sakskeje a Braniborskeje wčera w Podstupimje zešłoj. Wobdźěleni běchu tež zapósłancy Zelenych, Lěwicy a SPD w Braniborskim krajnym sejmje, kaž předsydka sakskeje serbskeje rady Marja Michałkowa zdźěli. Wiceprezident Podstupimskeho krajneho sejma Dieter Dombrowski (CDU) je přitomnych witał.
