Wuslědk Sakskeje při wčerawšich europskich wólbach potwjerdźi, zo njebě rezultat AfD 2017 při wotumje za zwjazkowy sejm připadny. Kak hłuboko drje dyrbi kałač njespokojnosće z wobstejacymi politiskimi poměrami w Hornjej Łužicy tčeć, zo wolerjo w 36 komunach tudyšeho serbskeho sydlenskeho ruma za stronu hłosuja, kotrejž zaměry žiweje dwurěčnosće abo Europy regionow ničo hódne njejsu. Předsyda Domowiny zarjaduje tónle wólbny wuslědk do cyłoeuropskeho wuwića, hdźež prawicarske a prawicarskopopulistiske strony w mnohich krajach postupuja. Što pak rěka to za zwoprawdźenje zaměrow, zwisowacych z wuspěšnej europskej wobydlerskej iniciatiwu MinoritySafePack? Hižo zestawa dotalneho Europskeho parlamenta njebě zaruka za spomóžne zeskutkownjenje naležnosćow narodnych mjeńšin w mjezach Europskeje unije. Nětko, ze skrućenym křidłom prawicarskich nacionalistow w Brüsselu budźe to hišće wo wjele ćešo. Axel Arlt

Berlin (dpa/SN). W zwadźe wo zakładnu rentu su fronty w zwjazkowym knježerstwje dale sprostnjene. Naćisk ministra za dźěło Hubertusa Heila (SPD) njeje kanclerski zarjad za wothłosowanje tamnym ministerstwam posrědkował, kaž rěčnik knježerstwa minjeny pjatk zdźěli. Naćisk dojednanja koaliciskeho zrěčenja wobsahowje a financielnje „daloko přesahuje“. Koaliciscy partnerojo měli so na zrěčenje jako dźěłowy zakład dźeržeć. Zakładna renta wostanje zwjazkowemu knježerstwu přiwšěm dale wažna naležnosć. Kak ju konkretnje wuhotować, to chcedźa w rjadach knježerstwa dale rozjimać. Rěčnica ministerstwa za dźěło porno tomu twjerdźeše, zo su proces wothłosowanja z potrjechenymi ministerstwami zahajili a čakaja na wotmołwu kanclerskeho zarjada. Hubertus Heil bě ze swojim naćiskom nastupajo zakładnu rentu bjez pruwowanja potrěbnosće w CDU a CSU rozhorjenje zbudźił. Po jeho předstawach měli ludźo po 35 dźěłowych lětach jasnje wjetšu rentu dóstać. Financować chcył ju z dawkom na pjenježne transakcije, kotryž pak hišće njeeksistuje.

Z praskotakami chcedźa w Bad Elsteru dźiwje swinje wućěrić, kotrež wšědnje zelenišća w parkach zapusćeja. Dokelž njejsu dotalne pospyty z hórkej picu abo čłowječimi włosami ničo wunjesli, su sej dowolnosć wobstarali, praskotaki zasadźić. Te chcedźa sobudźěłaćerjo sakskich statnych kupjelow wječor wot wosmich hač do połnocy a rano wot štyrjoch do sedmich zasadźić. Praskotaki su mjelčiše hač silwesterske a za zwěrinu njestrašne.

Dźěćaca chcyćiwosć za słódkosćemi je policiju w Hornjej Frankskej k wurubjenymaj awtomatomaj žwjenkačkow wjedła. Dźěsći běštej wobkedźbowałoj, kak młodostnaj woknješce awtomatow rozbijetaj. Skućićelej jej namołwještaj so tohorunja posłužować. Doma dźěsći powědaštej, zwotkel słódkosće matej. Mać informowaše na to policiju, kotraž nětko za skućićelomaj pyta.

Budyšin (SN/bn). „Wuhlady na zwoprawdźenje nutřkowneho samopostajenja małych ludow w Europskej uniji“ bě hesło zjawneje rozmołwy, zarjadowaneje srjedu wot krajneho dźěłoweho kruha Serbja w sakskej SPD w Budyskim běrowje strony. Předsyda poradźowaceho gremija Benedikt Dyrlich witaše přitomnych zajimcow a předstaji skrótka wosebiteho hosća wječora, wjelelětnu zapósłanču Europskeho parlamenta a čłonku wuběrka za regionalne wuwiće Constanzu Krehl z frakcije Progresiwna alianca socialdemokratow (S&D). Do diskusije poda předstejićel Budyskeje SPD dr. Měrćin Krawc z něhdźe štwórćhodźinskim přednoškom na zakładźe hesła zarjadowanja swój wid na aktualne połoženje Serbow. „Wo potłóčowanju na zbožo wjace rěčeć njetrjebamy, přiwšěm smy wot woprawdźiteje swobody daloko zdaleni. Na přikład nastupajo financowanje a šulstwo smědźa Serbja drje próstwy stajić, naposledk pak roz­sudźa němske gremije. Hinak zwuraznjene mam tuchwilny poćah mjez wjetšim a mjeńšim ludom za podobny mjez maćerju a dźěsćom.