Drježdźany (SN). Sakske statne ministerstwo za hospodarstwo, dźěło a wobchad wuda składnostnje lětušeho europskeho tydźenja 13 regionalnych magacinow. Wšitke zešiwki maja titul „Europa spěchuje Saksku“. 11. meje změje je 1,5 milionow domjacnosćow po cyłej Sakskej w listowym kašćiku. W kóždym wudaću za dźesać wokrjesow a tři bjezwokrjesne města Sakskeje pokazuja přikłady na to, što spěchowanje EU w regionje zmóžnja. Regionalne wudaće za Budyski wokrjes předstaja dwě wobdźělnicy projekta „NaTÜRlich“ we Wojerecach. Wot EU spěchowana naprawa z programa „Jobperspektiwa Sakska“ bě jimaj po dołhej bjez­dźěłnosći pomhała zdobyć nowe sebje­wědomje za puć do swěta dźěła. „Dobre žiwjenske wuměnjenja za wšitkich Europjanow docpěć je najwažniši zaměr EU. Z podpěru strukturneho spěchowanja je so radźiło zaměrnje do mudrych hłójčkow, inowatiwnych procesow a produktow inwestować a tak do zamóžnosće Sakskeje za přichod skutkować“, rjekny sakski statny minister za hospodarstwo, dźěło a wobchad Martin Dulig (SPD). „Spěchowanje EU je na dobro wšitkich Saksow.“

Praha (dpa/SN). Do dźensa zahajeneho wjerškoweho zetkanja Europskeje unije w rumunskim měsće Sibiu wo přichodźe zjednoćenstwa statow je so prezident Rady EU Donald Tusk na Václava Havela powołał. Wón citowaše lěta 2011 zemrěteho bywšeho čěskeho a čěskosłowakskeho prezidenta na wopyće w Praze, zo stej swoboda a zamołwitosć dwě stronje samsneje medalje. „Z tym je wón dokładnje to zapřimnył, što rěka Europjan być“, rjekny Tusk. Na programje 52lětneho pólskeho politikarja steješe tež wopyt rowa wojowarja wo čłowjeske prawa a dramatikarja.

Hosćićel Tuska, čěski ministerski prezident Andrej Babiš, žadaše sej w přichodnej dobje financowanja wjetši wliw na přizwolenje spěchowanskich srědkow EU. „Předewšěm my měli rozsudźić, za čo pjenjezy wužiwamy, kotrež z Europy dóstanjemy“, rjekny załožer populistiskeje strony ANO. Ratarski imperij Babiša ma sobu najwjetše lěpšiny ze subwencijow Europskeje unije. Najebać to jej wjace hač połojca Čechow po wuslědkach naprašowanjow njedowěrja. Tusk mjenowaše to „strowu měru skepticizma“.

Wowcy město trawusyčakow chce město Wien přichodnje na Dunajskej kupje zasadźić. 50 wowcow změje na woblubowanym wólnočasnym arealu přichodnje swój wot wowčerja dohladowany domicil. Hinak hač dotal wužiwane bencinowe mašiny su wowcy wobswětej přichilena alternatiwa, z Wienskeje radnicy rěka. Dunajska kupa je 21 kilometrow dołha a lědma wobtwarjena.

Wotćišć porsta na torće je paducha w Kölnje přeradźił. Sudnistwo je předchłostaneho muža mjeztym k wosom měsacam jastwa zasudźiło. Wotćišć porsta na šokolodźanej torće bě jenički dopokaz w procesu. 43lětny bě so loni zhromadnje z kumpanom do bydlenja zadobył a je wurubił. W kuchni da so muž do žiwidłow, mjez druhim do torty. Jako so wobsedźer nawróći, wuhlada wón wotćišć a tykny tortu do chłódźaka.

Teheran (dpa/SN). Runje lěto po wupowědźenju mjezynarodneho atomoweho zrěčenja z Iranom přez USA je iranski prezident Hassan Ruhani zdźělił, zo nječuje so jeho kraj na dźěle zrěčenja hižo wjazany. Po informacijach medijow je wón tónle rozsud Chinje, Němskej, Francoskej, Wulke Britaniskej a Ruskej pisomnje posrědkował. Ruhani na to skedźbni, zo je Iran cyłe lěto wočaknył, zo móhli mjenowane kraje wliw na USA wukonjeć zrěčenje tola dale dodźeržeć.

Pompeo widźi wohroženje

Washington/Bagdad (dpa/SN). Wonkowny minister USA Mike Pompeo je wčera wječor njewočakowano Irak wopytał a za to swój planowany wopyt Němskeje wotprajił. W Bagdadźe zetka so ze zastupnikami irakskeho knježerstwa, zo by z nimi přiběrace napjatosće ze susodnym Iranom rozjimał. Napřećo žurnalistam rěčeše Pompeo wo „bjezposrědnim wohroženju“ ze stron Irana. Hakle před dnjemi běchu USA lětadłonošak do tamnišeje kónčiny pósłali.

Šuler při nadpadźe zatřěleny