Hdyž zapodachu zamołwići lěta 2008 koncept Delnjoserbskeho gymnazija šulskemu zarjadej, su so woni nadźijeli, dóstać bórze zelenu swěcu za dalše wuwiće njesměrnje wažneho kubłanišća w Delnjej Łužicy. Wosom lět je so mjeztym minyło, a zaso dyrbi kubłanišćo koncept zapodać. Za tehdy zdźěłany dokument so hižo ni­chtó wjace njezajimuje. Čehodla pak, dyrbiš so prašeć. Wšako su zamołwići na statnej stronje zaspali naležnosće rjadować, za kotrež kubłanišćo jich jasny signal trjeba. Na přikład njeje jenož njeakceptabelne, zo so braniborskemu kubłanskemu ministerstwu dotal poradźiło njeje, Serbske šulske postajenje z lěta 2000 modifikować; tež zadźerženje nastupajo dalewuwiće projekta Witaj zbudźa jenož nje­zrozumjenje. To pak stej wažnej stołpaj, na kotrejž měł so koncept Delnjoserbskeho gymnazija zepěrać, bjez njeju wostanje połojčna naležnosć. Axel Arlt

Słowjenska a Chorwatska bilancujetej njewotwisnosć

Zagreb/Ljubljana (dpa/K/SN). Tele dny je štwórć lětstotka tomu, zo stej so z roz­padowaceje Juhosłowjanskeje Słowjenska a Chorwatska zesamostatniłoj. We woběmaj krajomaj nětko bilancuja, što je historiska kročel wunjesła.

„Njewotwisnosć je so w kóždym nastupanju wudaniła. Směmy na wšo docpěte hordźi być“, hódnoći něhdyša premierka Chorwatskeje Jadranka Kosor. Wótc njewotwisnosće Słowjenskeje a jeje prěni prezident Milan Kučan zwuraznja: „Wěc je so w kóždym padźe zadaniła.“ Za njeho­ je najwažniše, zo „móžemy wot toho časa swój wosud sami postajeć“.

Kanadiski wuměłc Douglas Coupland pyta za swój nowy projekt podobnika nižozemskeho molerja Vincenta van Gogha. „Mnozy ludźo někoho znaja, kiž wupada kaž wón“, praji Coupland. Dźesatki potencielnych dwójnikow su swoje foto wčera na internetnu stronu projekta „I am Vincent“ pósłali. Nětko ma so wo najpodobnišim dwójniku wothłosować. Dobyćerja chce Coupland jako 2x3 metry wysoku bronzowu postawu zwěčnić.

Město Mnichow sej žada, zo maja so kralowskim pythonam 46lětneje wobsedźerki jenož hišće mortwe myše picować. Město powołuje so při tym na zwěrinoškitny zakoń, po kotrymž maja so njetrjebawše čwěle myšow wobeńć. Z pomocu nawody zběrneje stacije za reptilije w Mnichowje Markusa Baura prócuje so wobsedźerka nětko swoje zwěrjata překubłać – dotal pak bjez wuspěcha.

Palo Alto (dpa/SN). Zhotowjer elektroawtow Tesla je za přewzaće předewzaća SolarCity poskitk we wobjimje 2,5 miliardow eurow předpołožił. Tesla chce sumu w formje akcijow zapłaćić. Z přewzaćom móhli připrawy SolarCity přeńć do energijoweje sparty firmy Tesla, kotraž chce so nimo awtoweje industrije tež na energijowe wiki koncentrować.

Cameron chcył premier wostać

London (dpa/SN). 24 hodźin do Brexit-referenduma je britiski premierminister David Cameron chětro njewěsty, kak wothłosowanje wuńdźe. „Nichtó njewě, što so stanje“, rjekny Cameron nowinje Financial Times. Zdobom wón potwjerdźi, zo chcył na kóždy pad zastojnstwo premiera dale wukonjeć. W žanym padźe tež njewob­žaruje, zo bě k referendumej namołwjał. Po naprašowanjach je wuslědk jutřišeho wothłosowanja 45 milionow wólbokmanych wotewrjeny. Wšitko pokazuje na dwubój mjez přećiwnikami a tymi, kotřiž chcyli dale w EU wostać.

Hłowna zhromadźizna