Peter hižo za předsydku njekandiduje
Berlin (dpa/SN). Předsydka Zelenych Simone Peter njebudźe znowa za zastojnstwo kandidować. Wona nochce personalnemu ponowjenju na puću być, piše 52lětna w lisće Zelenym, kotryž powěsćerni dpa předleži. Z kandidaturu delnjosakskeje politikarki Zelenych Anje Piel so w tymle prašenju něšto hiba. „To je mje pohnuło, swoje městno přewostajić“, Peter piše. Wona je wot lěta 2013 předsydka Zelenych. Hišće w oktobru bě připowědźiła, zo chcyła na zjězdźe kónc januara znowa kandidować.
Nimo delnjosakskeje frakciskeje šefiny w krajnym sejmje Piel (52) kandidujetaj schleswigsko-holsteinski wobswětowy minister Robert Habeck (48) a zapósłanča zwjazkoweho sejma Annalena Baerbock (37) za dwójne nawodnistwo.
Ekologiska strona wuzwoli 26. a 27. januara nowe nawodnistwo. Dotalny předsyda Cem Özdemir so po wjace hač dźewjeć lětach na čole strony tohorunja zastojnstwa wzda. Poprawom chcyše so z frakciskim předsydu w zwjazkowym sejmje stać. Tež to je mjeztym z blida.
Spěchowanjepřiprajene
Zhorjelc (SN). Sakska statna ministerka za wědomosć a kulturu dr. Eva-Maria Stange (SPD) je minjeny pjatk w Zhorjelcu wyšemu měšćanostej Siegfriedej Deinegerej (njestronjan) připrajiła spěchowanje 1,03 miliona eurow. Pjenjezy su myslene za natwar centruma za młodźinsku a sociokulturu. Dohromady tři miliony eurow chcedźa nałožić za přetwar něhdyšeho industrijneho twara wagonownje na kulturny centrum z rumnosćemi za zarjadowanja, dźěłarnički, seminary a za běrowy.
Ministerka dr. Stange rjekny: „Z tymle zarjadnišćom dóstanje Zhorjelc centrum, kotryž budźe za towaršnostnu a socialnu zhromadnoć města skutkować. W tajkim komunalnym domskim móža wšitcy zajimcy sobu skutkować, dokelž njewobsteja žane wobmjezowanja. Poskitki maja być mjezy překročace za wšěch zajimcow ze Zhorjelca, Zgorzeleca a wokoliny.“ Siegfried Deinege potwjerdźi: „Twar centruma je do přichoda pokazowacy a jónkrótny projekt za rozkćěw nowych kulturnych, pedagogiskich kaž tež towaršnostnych perspektiwow, wosebje za młódšu generaciju.“
To a tamne (08.01.18)
Wo městno w rynku čakacych při kasy biłoj staj so mužej w předawarni delnjosakskeho Peine. 59lětny dźeržeše tam městno za swoju přećelku, čehoždla so dalši, 63lětny kupc na njeho wusypa. Po werbalnym rozestajenju dóńdźe k bijeńcy z pjasćemi. Jako so wobaj na zemi ležo pjerještaj, zawołachu ludźo policiju. Samo w nuzowej přijimarni chorownje chcyštaj so mužej dale bić. Přećiwo woběmaj policija nětko přepytuje.
Jenož nócnu košlu woblečenu je so šoferka nakładneho awta na parkowanišću w Mecklenburgsko-Předpomorskej sama z awta wuzamknyła. Durje běchu so same zamknyli, jako bě žona do spanja skrótka awto wopušćiła. Tak steješe 50lětna zymu mrějo w nocy na parkowanišću w Röbelu a prošeše policiju wo pomoc. Ta wokno nakładneho awta rozbi a durje na to wotewrě.
China wita dojednanje
Peking (dpa/SN). China wita planowane direktne rozmołwy mjez Sewjernej a Južnej Koreju jako znamjo dalšeho wotputanja. „Jako susod podpěruje China najnowše pozitiwne naprawy wobeju krajow, mjezsobne poćahi normalizować“, zdźěli rěčnik wonkowneho ministerstwa dźensa w Pekingu. Sewjerna a Južna Koreja stej so dźensa rano na to dojednałoj, zetkać so přichodny tydźeń prěni króć po lětomaj k oficialnym rozmołwam na wysokej runinje.
Schwesig: Wěcowni wostać
Berlin (dpa/SN). Wodźacy politikarjo SPD su do njedźelu zahajacych so rozmołwow wo móžnej wulkej koaliciji mjez uniju a SPD na najnowše wuprajenja ze stron CSU kritisce reagowali. Městopředsydka SPD Manuela Schwesig ma za „wocuzbnjace“, zo sej šef krajneje skupiny CSU Alexander Dobrindt „konserwatiwnu rewoluciju“ žada. „Ludźo nochcedźa rewoluciju, ale stabilne knježerstwo. CDU a CSU njejstej minjene sto dnjow žane stabilne knježerstwo wutworić móhłoj“, rjekny Schwesig dźensa w rańšim magacinje ZDF. „Wšitcy dyrbjeli wěcowni wostać.“
Kniha hižo dźensa wuńdźe
Dróhu podłu Ryna w porynsko-pfalcskim Leutesdorfje maja kołpje ...
Lěwica za wjace personala
Ruske zepěranišćo nadpadnjene
Dobrindt namołwja SPD k zdźeržliwosći
Berlin (dpa/SN). Nawoda krajneje skupiny bayerskeje CSU w Němskeho zwjazkowym sejmje Alexander Dobrindt je SPD před tym warnował, přewulke žadanja hladajo na nowu wulku koaliciju z uniju stajeć. „Njeje móžno, zo dwacećiprocentowska strona sto procentow swojich žadanjow přesadźa“, rjekny Dobrindt nowinarjam do wčera zahajaceje so klawsury CSU w bayerskim klóštrje Seeon. „Chcu koaliciju z SPD. Strona pak dyrbjała so dźěłowym wikam, wěstoće a modernizaciji wěnować a so socialistiskeho sonjenja wzdać.“
Dobrindt žadaše sej dawkowu reformu na dobro swójbow a srjedźneho stawa. W prašenju připućowanja swójbow ćěkancow do Němskeje chce CSU kruta wostać. Nimo toho sej Dobrindt žada, samostejacych a pječa njepołnolětnych ćěkancow přepruwować. Integracija wukrajnikow njesmě towaršnosć přežadać.
Móže tež do wóčka hić
Sym podpisał, dokelž ...
... dokelž jedna so wo směrodajne standardy, kotrež europska mjeńšinowa politika cyle nuznje trjeba. Myslu přede- wšěm na tajke mjeńšiny, kotrež maja porno Serbam hišće dlěši puć před sobu k towaršnostnemu připóznaću, zo bychu wo swojich naležnosćach tež sobu abo sami postajeć móhli. Sformulowane zaměry iniciatiwy hodźa so jeno z rosćacej solidaritu mjez mjeńšinami docpěć. Přeco znowa dyrbimy tuž w zjawnosći na potrjebu jednanja w tymle wobłuku skedźbnjeć. Tónle zaměr hižo kóždy ze zběranjom podpismow podpěruje, tež, hdyž hranicu miliona skónčnje snano tola njedocpějemy. W tymle zmysle je kóždy hłós dobytk.
Podpisajće tež Wy na internetnej platformje pod www.minority-safepack.eu, pósćelće nam wobraz wo was a přidajće cyle skrótka w dwěmaj sadomaj, što je was pohnuło, wobydlersku iniciatiwu Federalistiskeje unije europskich narodnych mjeńšin FUEN Minority SafePack za škit narodnych mjeńšin w Europje podpěrać. Waš wobraz a tekst pósćelće k wozjewjenju redakciji Serbskich Nowin najlěpje na e-mailowu adresu: .
