To a tamne (11.04.18)
Tikotaceje pomazkoweje tyzy dla su w Balingenje pola Stuttgarta dźěłowu agenturu ewakuowali. Dwě hodźinje pozdźišo móžachu fachowcy za znješkódnjenje municije ludźi změrować: W metalowej tyzy ležeše časnik. 31lětny wopytar bě jón do tyzy połožił, ale je tyzu na zarjedźe zabył. Sobudźěłaćerjo tikotacy kašćik namakachu a wołachu policiju. Ta wšak muža nachwilnje zaja a cyły areal wokoło agentury zaraći.
Dźiwja ranca wosrjedź města je ludźi w porynsko-pfalcskim Neustadće znjeměrniła. Wobydler bě ju na třěše garaže wuhladał a hajnika informował. Jako tón přińdźe, skoči dźiwje swinjo z pjeć metrow wysokeje třěchi a smaleše po Hłownym torhošću do nutřkowneho města. Tam nadběhowaše hajnika a zrazy z hłowu do wjacorych wukładnych woknow. Skónčnje móžachu rancu do dwora hosćenca zamknyć, hdźež pak ju zatřělichu.
Knježerstwo w klawsurje
Meseberg (dpa/SN). Nowe zwjazkowe knježerstwo CDU/CSU a SPD schadźuje so w dwudnjowskej klawsurje na braniborskim hrodźe Meseberg. Po najdlěje trajacym wutworjenju noweho knježerstwa w stawiznach zwjazkoweje republiki chce kanclerka Angela Merkel (CDU) ze swojimi 15 ministrami dźěłowy program za přichodne měsacy zestajeć. K tomu słuša planować nowy etat, kotryž ma bjez nowych kreditow wuńć.
Běrow prawiznika přepytali
Washington (dpa/SN). Zastupnicy justicy USA a zwjazkoweje policije FBI su wčera běrow prawiznika Donalda Trumpa, Michaela Cohena, w New Yorku přepytali. Při tym sćazachu tójšto materiala, mjez druhim konwersaciju mjez Cohenom a toho klientami. Sćazali su tež dawkowe podłožki a dalše dokumenty. To chětro zadźiwa, dokelž je dźěło prawiznikow hladajo na dowěrliwe informacije w USA wosebje škitane. Donald Trump zasudźa akciju jako „hańbu“.
Porošenko w němskej stolicy
Markus Lewe (nalěwo), wyši měšćanosta sewjerorynsko-westfalskeho ...
Babiš Orbánej gratulował
Praha (dpa/SN). Amtěrowacy ministerski prezident Čěskeje Andrej Babiš je swojemu madźarskemu koleze Viktorej Orbánej k „přeswědčiwemu wuspěchej“ při wólbach parlamenta gratulował. Babiš twitterowaše swoje zbožopřeća w čěskej kaž tež madźarskej rěči. Wón wjeseli so na dalše zhromadne dźěło we wobłuku Visegrádskeje štwórki a Europskeje unije, kaž załožer liberalno-populistiskeho hibanja doda. Orbánowa prawicarskonarodna strona Fidesz bě při parlamentskich wólbach zawčerawšim, njedźelu, 48,5 procentow hłosow dóstała.
Čěska a Madźarska přisłušatej zhromadnje z Pólskej a Słowakskej Visegrádskej skupinje, kotraž je so wospjet tomu spjećowała ćěkancow přiwzać. Babiš po zwrěšćenym wothłosowanju wo dowěrje jenož hišće w zastojnstwje amtěruje. Wón pochadźa ze Słowakskeje, kotraž ma mjezu z Madźarskej.
Lěty wupadnyli
Lawrow: Zaměrna prowokacija
Moskwa (dpa/SN). Ruski wonkowny minister Sergej Lawrow ma rozprawy wo syriskim nadpadźe ze chemiskimi brónjemi w měsće Duma za zaměrnu prowokaciju. Ruscy wojerscy fachowcy su mjeztym w měsće byli, bjez toho zo bychu slědy chloroweho płuna našli, rjekny Lawrow w Moskwje. Wumjetowanja zapada, zo Ruska syriske zasadźenje jědojteho płuna přećiwo ciwilistam kryje, je we wočomaj Lawrowa dźěl antiruskeje kampanje, kaž powěsćernja Interfax zdźěla. Po informacijach aktiwistow je při pozdatnym zasadźenju jědojteho płuna w kónčinje Ghuta wjace hač 150 ludźi zahinyło. Tež němske knježerstwo w Berlinje na to tuka, zo je syriske knježerstwo za nadpad zamołwite.
Mjeztym je organizacija za zakaz chemiskich bróni přepytowanja zahajiła. Tak chcedźa rozprawy potrjechenych analyzować a na městnje informacije wo zasadźenych chemiskich maćiznach zběrać. Nimo toho prašeja so swědkow a bjeru pódu a druhe maćizny, zo móhli je w laborje na jěd přepytować.
Spřećiwjeja so ministrej
Zwjazk městow a gmejnow kritizuje posudk sakskeho knježerstwa
Drježdźany (SN/MkWj). Sakske komuny su po słowach financneho ministra Matthiasa Haßa (CDU) pjenježnje derje wuhotowane. „Mamy fungowacy system“, rjekny Haß tele dny hladajo na financne wurunanje. Powšitkownje njeje trjeba system změnić, wón měnješe. Přiwšěm měł so dale wuwić, dokelž móže w jednotliwych padach přeco zaso k problemam dóńć. Minister přizna, zo wobsteja diskrepancy mjez naladu w gmejnach a dobrym połoženjom swobodneho stata.
Komuny běchu sej w oktobru wjace pjenjez wot swobodneho stata žadali a swoje połoženje ze situaciju w zapadnych zwjazkowych krajach přirunali. Po tym docpěchu města a gmejny Sakskeje lěta 2016 runje 87 procentow přerěznych cyłoněmskich dochodow na wobydlerja. Byrnjež dochody stata přiběrali, připokazanki komunam stagněruja, tehdy rěkaše. Předewšěm małe komuny su wohrožene. Trěbne inwestije wobličichu na něhdźe 6,5 miliardow eurow.
Zaso w starym stilu
To a tamne (10.04.18)
Hinak hač někotryžkuli dorosćeny je so dźěćo w delnjosakskim Bergenje přikładnje zadźeržało: Po tym zo bě ze swojim kolesom njewotpohladnje do parkowaceho awta zrazyła a wóz wobškodźiła, dwanaćelětna holca poł hodźiny podarmo na wobsedźerja čakaše. Tež w bance, před kotrejž awto steješe, njewědźachu, komu wone słuša. Tuž dźěše na policajsku stražu, hdźež so wukopa, zo je limuzina słužbne awto měšćanosty. „To móhł sej tón abo tamny dorosćeny přikład wzać“, policija zadźerženje holcy chwaleše.
Chrobły paduch je dźěćom w Mecklenburgsko-předpomorskim Warenje myto pokradnył, kotrež měješe jim na kóncu detektiwneje hry kiwać. Slědujo wot staršich wupołožene papjerjane šlebjerdki dóńdźechu dźěći skónčnje k jewišću pod hołym njebjom, hdźež měješe přizamknjene koleso stać. Tam pak ležeše jenož hišće skóncowany zamk.
Klětu chcedźa twarić započeć
W měsće nad Sprjewju nastanje nowe wukubłanišćo sakskeje policije
Budyšin (UM/SN). Klětu nalěto maja bagry na Budyskej Kantowej dźěłać započeć. Na to staj so Budyski zapósłanc w Sakskim krajnym sejmje Marko Šiman a sakski minister za nutřkowne naležnosće Roland Wöller (wobaj CDU) při jeho prěnim wopyće we wukubłanišću sakskeje policije, kotrež je na Budyskej Kantowej zaměstnjene, minjeny pjatk dojednałoj. Spočatnje bě so Wöller prašenju, hdy ma so dołho planowany twar skónčnje zahajić, hišće wuwinył. Šiman pak tłóčeše: Dalše dlijenje njesmě być. Wón poćahowaše so na připrajenje bywšeho ministerskeho prezidenta Stanisława Tilicha (CDU), po kotrymž chcychu wukubłanski centrum hižo lětsa rozšěrjeć započeć. Hłowna přičina dlijenja leži po słowach Wöllera w sakskim financnym ministerstwje – w tamnišim statnym zawodźe za imobilije a twarske naležnosće, hdźež nimaja pječa dosć planowarjow. Přiwšěm je sej sakske knježerstwo přezjedne, zo ma so policija zesylnić. Přichodne lěta chcedźa tysac přidatnych městnow wutworić.
