Seminar přećiwo seksizmej
Washington (dpa/SN). Delnja komora parlamenta USA je za zapósłancow trening wobzamknyła, zo bychu seksualnym přesahnjenjam a diskriminaciji zadźěwali. Wot klětušeho maja so wšitcy 435 čłonojo Domu reprezentantow kaž tež jich sobudźěłaćerjo na seminarach přećiwo seksizmej wobdźěleć. Wotpowědnu rezoluciju su dźensa jednohłósnje schwalili. Senat bě hižo spočatk nowembra tajku wobzamknył.
Němska a EU pod ćišćom
Abidjan (dpa/SN). Pokiwy nastupajo wikowanje z njewólnikami w Lybiskej wukonjeja stej Němska a EU pod wulkim ćišćom, skónčnje jednać. Dyrbjałoj tomu zadźěwać, zo migranća „na grawoćiwe wašnje w lěhwach žiworja“ abo zo z nimi samo „wikuja“, wuzběhny zwjazkowa kanclerka Angela Merkel (CDU) dźensa na wjerškowym zetkanju Europskeje unije a Afriki w Słonowinowym Pobrjohu. Francoski prezident Emmanuel Macron rěčeše samo wo móžnym zasadźenju wójska.
Preferuje kandidata z wuchoda
Spokojni Saksojo maja dale wjele předsudkow
Drježdźany (SN). Saksojo su ze swojim wosobinskim połoženjom cyłkownje spokojom. Zdobom pak maja dale předsudki předewšěm nastupajo wukrajnikow. To wotbłyšćuja wuslědki lětušeho sakskeho monitora, z kotrymž da krajne knježerstwo kóžde lěto politiske nastajenja a połoženje demokratije w swobodnym staće zwěsćeć. Institut slědźenja dimap bě so w lěću 1 006 reprezentatiwnje wuzwolenych dorosćenych Saksow woprašał. Substancielnje nowe dopóznaća žane njeběchu, piše powěsćernja dpa.
Ze 56 procentami ma dale wjace hač połojca woprašanych Němsku za strašnje „přecuzbnjenu“. Loni bě jich tróšku wjace. Tele „přecuzbnjenje“ začuwa jenož 15 procentow tež we wosobinskej wokolinje. Azylowu politiku mjenuja najčasćišo jako „najwjetši problem w Sakskej“. Trochu přiběrali su homofobne nastajenja: Wjace hač kóždy třeći ma poćah mjez wosobomaj samsneho splaha za njepřirodny. A 15 procentow woprašanych ma Němcow druhim ludam napřećo samozrozumliwje za lěpšich.
Před tribunalom so zajědojćił
Den Haag (dpa/SN). Poslednje wozjewjenje wusuda tribunala za wójnskich złóstnikow Zjednoćenych narodow měješe wčera w Den Haagu dramatiski wukónc. 72lětny bosnisko-chorwatski general Slobodan Praljak je zasudźenje k 20 lětam jastwa ćežkich wójnskich złóstnistwow a złóstnistwow přećiwo čłowjestwu w bosniskej wójnje (1992–1995) dla wotpokazał a na to před běžacymi kamerami kaž tež wobličemi sudnikow z małeje bruneje bleški jěd pił. Něšto hodźin pozdźišo wón w chorowni zemrě.
„Njejsym wójnski złóstnik“, bě Praljak krótko do swojeho dramatiskeho skutka na sudniskej žurli wuwołał. Wusud pak bě doskónčny, dokelž bě wón w powołanskim jednanju podležał. Agentury dwěluja, zo bě tele samomordarstwo zadwělowanje pokuty dla, 13 lět dźě bě wójnski złóstnik hižo w přepytowanskej jatbje był.
W běhu 24 lět dyrbješe so 161 wosobow – Južnych Serbow, Chorwatow a Bosničanow – před sudnikami UNO za wosobinsku winu w krawnych rozestajenjach w bywšej Juhosłowjanskej zamołwić.
To a tamne (30.11.17)
Na adwentničce wopity před šefom/šefinu so blamować, štó to hižo chce? W Norwegskej su nětko app wuwili, kotraž ma pomhać najhóršemu zadźěwać. Program so přizjewi, hdyž je radźomne alkoholowu přestawku zapołožić abo radšo tola domoj hić. Tak móža wužiwarjo aplikacije tróšku natutkani a dobreje nalady swjećić, bjez toho zo kontrolu zhubja, měnja jeje wuwiwarjo. Norwegčenjo mjenuja tule wobstejnosć „lykkepromille“, přełožene „promil zboža“.
Rekordne 56 lět je muž ze Sauerlanda bjez jězbneje dowolnosće po puću był. 74lětneho ze sewjerorynsko-westfalskeho Hüstena su tydźenja po mjeńšim njezbožu lepili. Najprjedy zastojnicy zwěsćichu, zo muž papjery při sebi nima. Krótko na to wšak so wukopa, zo scyła žane nima. Jako młodźenc drje bě něhdy z jězbnej dowolnosću započał, je pak do wójska dyrbjał a tak njeje ju ženje dokónčił.
Nowy strašny test rakety
Seoul/Pjöngjang (dpa/SN). Sewjerna Koreja je po swójskich informacijach dźensa rano interkontinentalnu raketu noweho razu testowała, z kotrejž móhła dospołny kontinentalny teritorij USA z atomowymi rozbuchadłami nadběhować. Mjezynarodna zjawnosć wospjetny test raznje zasudźa. Bjezstrašnostna rada Zjednoćenych narodow je za dźensa nuzowe posedźenje zwołała. Kaž južnokorejske wójsko rozprawja, je raketa 4 500 kilometrow wysoko lećała, štož je dźesać króć wyše hač wobkružna čara swětnišćoweje stacije ISS.
Kanclerka słabje nawjedowała
Berlin (dpa/SN). „Eklatantnu słabosć nawjedowanja“ wumjetuje městopředsyda SPD a Hamburgski prěni měšćanosta Olaf Scholz zwjazkowej kanclerce Angeli Merkel (CDU) nastupajo zwrěšćene jamaiske sonděrowanja. Zo nětko spěšnje k nowej wulkej koaliciji unije a SPD dóńdźe, nima wón za prawdźepodobne. „To je opcija, ale jenož jedna. Njeje žanoho awtomatizma, zo so wona tež zešlachći“, rjekny Olaf Scholz magacinej Stern w najnowšim wudaću.
Afriskej młodźinje přichod dać
Spěchowanske towarstwo Choćebuski rozmach je wčera w Gladhousu ...
Spěšniši internet
Program za čisćiši powětr dale wjesć
Berlin (dpa/SN). W nimale 90 městach wustorkowane strašne dusykowe oksidy hranične hódnoty trajnje překročeja. Tak hrozy wot sudnistwa postajeny zakaz jězdźenja za dieselowe wozydła.
W boju přećiwo strowoće škodźacym dieselowym wotpłunam w městach je zwjazkowa kanclerka Angela Merkel (CDU) wčera komunam dalšu financnu podpěru připrajiła. Po načolnym zetkanju Zwjazka, krajow a komunow w Berlinje wona rjekny, zo chcedźa program za čisćiši powětr we wobjimje miliardy eurow tež klětu dale wjesć.
Komuny měli pjenjezy z dieseloweho fondsa prawje bórze dóstać, zo móhli swoje projekty – lěpše poskitki w zjawnym bliskowobchadźe, wudospołnjenje dieselowych a elektrifikaciju busow, wjace nabiwanskich stacijow za e-awta, digitalne wodźenske systemy a nowe kolesowanske šćežki – zwoprawdźić. Zwjazk płaći 750 milionow eurow do fondsa, awtotwarcy su 250 mio. připrajili. Zwjazkowa wobswětowa ministerka Barbara Hendricks (SPD) ma zetkanje za wažny krok, naprawy pak njedosahaja, tu je awtomobilowa industrija zamołwita.
Přeco ći samsni so angažuja
1. Budysku konferencu za demokratiju přewjedli
Budyšin (SN/CoR). Pod hesłom „Kak chcemy w Budyšinje zhromadnje žiwi być“ wotmě so wčera w Němsko-Serbskim ludowym dźiwadle 1. Budyska konferenca za demokratiju. Sprjewine město słuša wot lětušeho k tym 265 komunam Němskeje zwjazkoweje republiki, kotrež wobdźěleja so na zwjazkowym programje „Partnerstwa za demokratiju“. „Cil tejele konferency je, konkretne dźěłowe nadawki za lěto 2018 dóstać“, rjekny Marcus Rößner z koordinowanskeho a fachoweho městna za Partnerstwa za demokratiju w Kamjentnym domje.
Wjace hač 70 ludźi bě wčera do NSLDź přišło, a mnozy z nich wužiwachu składnosć swoje jednotliwe projekty w foyeru předstajić a sej mysle wuměnjeć. Mjez nimi běchu Budyska młodźinska idejowa konferenca, towarstwo House of ressources, iniciatiwa Politika na dworje a Młodźina Lěwicy. Za Domowinu wobdźěli so Sonja Hrjehorjowa.
Na rozmołwach w Ruskej
Drježdźany/Pětrohród (SN). Składnostnje zetkanja Němsko-Ruskeje skupiny přećelstwa w Zwjazkowej radźe a Ruskej federaciskej radźe kaž tež składnostnje 10. němsko-ruskeje konferency wo surowiznach přebywa sakski ministerski prezident Stanisław Tilich (CDU) hač do jutřišeho w Pětrohrodźe. Na woběmaj zarjadowanjomaj chce wón za dialog a dorozumjenje wabić. To je Tilichowy po- sledni wukrajny wopyt, kotryž skónči so z rozmołwu z wiceguwernerom sakskeho partnerskeho regiona Pětrohród Aleksanderom Goworunowom.
Tilich předsyduje Němsko-Ruskej skupinje přećelstwa w Zwjazkowej radźe wot lońšeho. Na prěnim zetkanju skupiny po lěće 2013 steja prašenja zhromadneho dźěła, wěstotne naprawy w zwisku z klětušimi swětowymi koparskimi mišterstwami a němsko-ruska wuměna młodźiny na dnjowym porjedźe.
Konferencu wo surowiznach wuhotuje Němsko-Ruski surowiznowy forum, kotryž bu w lěće 2006 na iniciatiwu TU Hórniska akademija Freiberg a Pětrohródskeje statneje hórnistwoweje uniwersity wutworjeny.
