To a tamne (27.06.16)
Dakotać tak wótře kaž kokoše běše wčera nadawk 22 dorosćenych a dźěći na třećim němskim kokotowym spěwnym wubědźowanju w porynsko-pfalcowskim Göcklingenje. Zaměr wubědźowanja bě, pjeriznowy skót hłosowje tak derje kaž móžno napodobnić. Přiklesk wjeleličbneho publikuma njesydaše jeno za chětro prawdźiwe kikerahi-spěwanje, ale tež za originalne kostimy wjacorych wubědźowarjow.
Swoju rozžahłosć za črijemi je 44lětny muž z Graza na njewšědne wašnje sćěhował. Jako wulki lubowar stupnjow spakosći wón w minjenymaj lětomaj něhdźe třista najwšelakorišich žonjacych a mužacych čriji a škórnjow z polcow a kamorow we wjaceswójbnych domach. Policiji črijowy fetišist přizna, zo bě kradnjene črije w 30 bananowych kistach składował.
Měłoj konflikt rozrisać
Berlin (dpa/SN). SPD žada sej wot CDU a CSU, swoje rozkory na kónctydźenskej klawsurje w Podstupimje rozrisać. „Za koaliciju by měr wulka pomoc była“, rjekny frakciski šef SPD Thomas Oppermann. Měsacy trajacy konflikt mjez kanclerku Angelu Merkel (CDU) a šefom CSU Horstom Seehoferom dźěło knježerstwa wobćežuje. Unija so dźensa a jutře schadźuje, zo by so na zhromadne zaměry přichodnych lět dojednała.
W Španiskej znowa wola
Madrid (SN). Po tym zo njejsu so strony w Španiskej w zašłych měsacach na móžnu koaliciju dojednali, su wobydlerjo kraja zajutřišim, njedźelu, namołwjeni znowa wolić. Fachowcy wšak wěšća podobny wuslědk kaž w decembrje 2015, z čimž móhło połoženje w kraju njezměnjene wostać. Lěwicarskoalternatiwna strona PODEMOS drje dale postupuje, po aktualnych naprašowanjach pak leži hišće za konserwatiwnej ludowej stronu tuchwilu amtěrowaceho ministerskeho prezidenta Mariana Rajoyja.
Njewjedra hroža
Na dnju europskeho referenduma je wčera w Rogeńskim parku chorhoj ...
Raznišo přećiwoterorizmej zakročić
Wótre brónje njeměł
Debatabjez wuslědka
Drježdźany (dpa/SN). Zeleni a Lěwica Sakskeje zasadźeja so za to, zawěsćić dawkipłaćerjow před rizikami brunicoweho hórnistwa. Čorno-čerwjena koalicija porno tomu žanu potrjebu njewidźi. To je facit wčerawšeje debaty w Drježdźanskim krajnym sejmje. Zeleni běchu sej ju wuprosyli a pokazachu na studiju, z kotrejež wuchadźeja wulke rizika zjawnych etatow. „Nichtó nochce koncernam wumjetować, zo swoje zakonske winowatosće njespjelnjeja“, rozłoži zapósłanc krajneho sejma Gerd Lippold (Zeleni). Prašenje pak je, hač to scyła móža. Lippold skedźbni při tym na rukowanske hranicy w padźe insolwency. Tak su rizika za towaršnosć wulke, zo na kóštach brunicoweho wobchodnistwa prawdźepodobnje sedźo wostanu. Tohodla dyrbi sej Sakska wot brunicowych předewzaćow wěstotne srědki žadać.
Zrudny dźeń za Europu
Britojo so z wjetšinu za wustup ze zhromadźenstwa EU wuprajili
London/Berlin (dpa/K/SN). Štož bě so za hotowe złonjedobro wudawało, je so stało: Britojo su so z 51,9 procentami za to wuprajili, zo Wulka Britaniska z Europskeje unije wustupi – po štyrceći lětach. 17,4 miliony wolerjow je za tak mjenowany „brexit“ hłosowało; 16,1 milion (48,1 procent) chcyše w zhromadźenstwje statow wostać. Wólbne wobdźělenje wučinješe 72,2 procentaj. W Jendźelskej a Waliziskej wupraji so wjace hač 70 procentow za wustup, w Šotiskej a Sewjernej Irskej wjace hač 70 procentow za zwostaće w EU. We woběmaj zběhaja so hižo hłosy za wotšćěpjenje wot Wulkeje Britaniskeje a za zwostaće w EU.
To a tamne (24.06.16)
Budźe pinguin Flocke kraku Paula naslědować? Zwěrjeći orakl z Błótow bě mjenujcy dotal wšitke tři hry němskich koparjow na europskich mišterstwach prawje wěšćił. A jeli Flocke ze swojim tipom prawje leži, Němcy njedźelu z dobyćom přećiwo Słowakskej do štwórćfinala zaćahnu. Hladarka zwěrjatow bě pinguinej bulej wobeju mustwow před noze połožiła, a tón měrješe so runy puć na němski: jasne dobyće našich potajkim.
Znate čorne durje z čisłom 10 na Londonskej Downing Street zdachu so być dźensa po referendumje Brexita dla kaž z hozdźemi zabite. Nichtó z politikarjow nochcyše do zjawnosće. Jako wosebje zmužity wopokaza so jeničce „słužbny“ kocor Davida Camerona, Larry the Cat. Oficielnje wšak mjenuja jeho Chief Mouser to the Cabinet, dokelž w a wokoło sydła britiskeho premiera myše łóji.
Sydanska blokada w kongresu
Washington (dpa/SN). Zapósłancy demokratow kongresa USA su sej ze sydanskej blokadu žadali, brónjowy zakoń přiwótřić. Zapósłanc John Lewis rjekny, zo tak dołho sedźo wostanu, doniž dom reprezentantow wothłosowanju zakonskeje iniciatiwy njepřizwoli. „My zapósłancy protestujemy, zo njemóžemy wo namjeće přiwótřenja brónjenskeho prawa wothłosować. Smy sej wěsći, zo bychmy dobyli“, potwjerdźi šefowka frakcije demokratow Nancy Pelosi.
Njedowěrjeja předsydstwu
Hannover/Wolfsburg (dpa/SN). Druhi najwjetši akcionar a domjacy kraj koncerna Volkswagen Delnja Sakska njemóže cyłkowne předsydstwo předewzaća za lěto 2015 wotćežić. Wone njeje wotpłunowu aferu dotal hišće porjadnje rozjasniło. Delnja Sakska wobsedźi dwaceći procentow akcijow předewzaća. Ze zapowědźenym, hewak zwučenym wotćeženjom njeje wona bywšemu šefej koncerna Martinej Winterkornej a nětčišemu markowemu šefej Herbertej Diessej dowěru wuprajiła.
Hrozy z referendumom
