Von der Leyen w Turkowskej
Ankara (dpa/SN). Němska zakitowanska ministerka Ursula von der Leyen (CDU) je dźensa wojakow Zwjazkoweje wobory w Turkowskej wopytała. Wona přizemi rano na wojerskim lětanišću Incirlik. Tam zaměstnjenych 240 němskich wojakow, podpěruje bój přećiwo teroristiskej milicy IS z wuskušowanskimi lětadłami. W běhu dnja chcyše so von der Leyen do turkowskeje stolicy Ankary podać, kaž zakitowanske ministerstwo w Berlinje zdźěli. Poćahi mjez Němskej a Turkowskej su napjate, po tym zo bě zwjazkowy sejm rezoluciju wo ludomordarstwje na Armenjanach před sto lětami přez Osmaniske mócnarstwo schwalił.
Předadźa přistaw Piräusa
Athen (dpa/SN). Přistaw grjekskeho města Piräusa ma so předać. Grjekski parlament je wčera wobzamknył, zo smě chinski łódźniski koncern COSCO na wšě 51 procentow grjekskeje přistawoweje towaršnosće kupić, rozprawjeja statne medije. Chinski koncern ma za to cyłkownje 368 milionow eurow płaćić.
BND ma noweho šefa
Britiski princ William (srjedźa) je wčera zhromadnje z mandźelskej ...
Putin zwjazkej NATO z reakciju hrozył
Rentnarjo dóstanu zboha wjac pjenjez
Bój so wudani
Zachować dźěłowe městna na stejnišćomaj Budyšin a Zhorjelc kanadiskeho koncerna Bombardier steji tuchwilu na agendźe IG metal. Zo so přisłušnosć k tajkemu dźěłarnistwu wudani, nazhonjeja tuchwilu přistajeni wobeju mjenowaneju zawodow. 200 krutych dźěłowych městnow chcychu tam wotstronić, 60 z nich móžachu dotal zachować. A to wězo derje organizowanych protestow dla. Zo so bój wudani, to pokazuje tuchwilny rezultat. Optimistisce hlada dźěłarnistwo nětko do přichoda a nadźija so hišće dalše městna zdźeržeć. Hinak wupada to pola wupožčenych dźěłaćerjow. Wjetšina z nich dźěłarnistwu njepřisłuša, byrnjež to móhli. W Budyšinje a Zhorjelcu ma so přichodnje 500 wupožčenych dźěławych pušćić, mjez nimi wulka ličba ludźi z wysokej wědu. Na nich njeměło so zabyć, wšako su zaruka hospodarstwa regiona.
Bianca Šeferowa
Zawodaj matej perspektiwu
Rozmołwy mjez Bombardierom a zastupjerjemi přistajenych dale du
Budyšin/Zhorjelc (SN/BŠe). Rozmołwy mjez kanadiskim koncernom Bombardier a zastupjerjemi přistajenych w jeho wotnožkach dale du. Zašły tydźeń su so zamołwići koncerna, zawodna rada a dźěłarnistwo IG metal dojednali 60 dźěłowych městnow zachować. Dokelž bě Bombardier připowědźił 200 inženjerskich městnow šmórnyć, ma na stejnišćomaj Budyšin a Zhorjelc 140 krutych přistajenych sobudźěłaćerjow swój job zhubić. „Dojednane zdźerženje 60 dźěłowych městnow je hakle spočatk“, podšmórny społnomócnjeny IG metal za wobłuk Budyšin a wuchodnu Saksku Jan Otto.
Nalada je so po rozmołwach minjeny tydźeń změniła. Tak čerpaja zastupjerjo sobudźěłaćerjow Bombardiera nowu nadźiju, zo móža z koncernom rěčeć. Wězo bě najlěpje było, wšitkich sobudźěłaćerjow zdźeržeć. Tola tak daloko skerje njepřińdźe.
To a tamne (01.07.16)
Před policiju ćěkajo je muž w pokradnjenym awće w němsko-pólskej pomjeznej kónčinje pola Baršća sčasami na zwjenach (Felgen) jěł. Do toho bě hozdźaty pas přejěł, na čož so gumijowe wobruče kolesow rozpušćichu. Něšto kilometrow dale za mjezu w Pólskej muž z awtom do přirowa zajědźe a ćekny pěši do lěsa. Jězdźidło bu w Podstupimskim wokrjesu pokradnjene.
W kuchni woheń zawiniła je kóčka w Passauwje. Skakajo po bydlenju drje bě so knefla na kuchinskich kachlach dótknyła a je tak zaswěćiła. Na kachlach ležaca drjewjana deska započa so na to smudźić. Susod skónčnje kur w bydlenju čuješe a alarmowaše wohnjowu woboru. Sam wšak poćerpje snadne zajědojćenje z kurom. Wobornicy wšak jón spěšnje podusychu.
Wopory počesćił
Jerewan (dpa/K/SN). We wobłuku swojeje wizity Armenskeje je němski wonkowny minister Frank-Walter Steinmeier (SPD) dźensa wopomnišćo za lěta 1915 wot Turkow zamordowanych 1,5 milionow Armenjanow wopytał a při pomniku wěnc połožił. Zdobom wupraji so wón za wujednanje mjez woběmaj krajomaj, byrnjež Turkowska porok ludomordarstwa zasadnje wotpokazowała.
Podhladnych zajeli
Istanbul (dpa/SN). Po zahubnym terorowym nadpadźe na lětanišćo turkowskeje metropole Istanbula je policija 13 podhladnych zajała. Mjez nimi su třo wukrajnicy, kaž statna powěsćernja Anadolu rozprawja. Policija bě na 16 městnach racije přewjedła. Ličba smjertnych woporow je mjeztym na 42 rozrostła. Tež třo atentatnicy běchu žiwjenje přisadźili. Znajmjeńša 239 ludźi so zrani. Dotal njeje nichtó atentat přiznał.
W lětadle kur był
Sewjerorynsko-westfalski financny minister Norbert Walter-Borjans ...
Šiman: Nowu hidu nješěrić
Reakcije na britiski referendum wo wotchadźe kraja z EU
Flensburg/Budyšin (SN/MkWj). Rozsud Wulkeje Britaniskeje, Europsku uniju wopušćić, je tež mjez europskimi mjeńšinami wulke wobmyslenja zbudźił. Prezident Federalistiskeje unije europskich narodnych mjeńšin (FUEN) Loránt Vincze, Madźar z Rumunskeje, je šokowany. „Europske mjeńšiny su hakle minjeny tydźeń w Južnym Tirolu swoje koparske mišterstwa přewjedli“, piše Vincze w nowinskej zdźělence. „Tam je so to najlěpše pokazało, štož Europa ma: Přisłušnicy wšelakich mjeńšin a rěčow su sportowsce wo titul wojowali, wjelerěčnje, mnohostronsce a woprawdźe europsce.“ Najebać rozsud Wulkeje Britaniskeje wostanu mjeńšiny naležni wojowarjo za europske zhromadne dźěło, wšako skići struktura Europy mjeńšinam škit, Vincze piše. „Přichod mjeńšin leži w Europje.“ Kontinent budźe jenož potom wuspěšny, hdyž so sam jako kontinent regionow wobhladuje. „Nichtó nima w tym nastupanju wjace kompetencow a nazhonjenjow hač 65 milionow ludźi, kotřiž w EU jednej z narodnych mjeńšin přisłušeja“, je sej Loránt Vincze wěsty.
