Na zadk molowane woči móhli howjada w Africe před nadpadami lawow škitać. Tole lubja sej slědźerjo po prěnich pospytach w Botswanje. Skradźu so bližace lawy maja tak zaćišć, zo su je howjada hižo wuhladali, a so zaso zminu. Tak znajmjeńša rěka teorija wědomostnika Neila Jordana na Sydneyskej uniwersiće. Wón bě zadźerženje lawow na hońtwje dlěši čas dokładnje wobkedźbował.

Cyłe jastwo ewakuować dyrbja wot dźensnišeho w sewjerorynsko-westfalskim Münsteru. Na wšě 515 jatych ma so po najspěšnišim puću do druhich chłostarnjow přepołožić, kaž wottam zdźě­leja. Zamołwići kraja su přeměstnjenje wčera wukazali, dokelž běchu zwěsćili, zo hrozy so 160 lět stare a pod pomnikoškitom stejace twarjenje wosrjedź města sypnyć. Ewakuowanje po nuzowym planje ma jutře wotzamknjene być.

Wětošow/Brüssel (SN). Peticiski wuběrk Europskeho parlamenta chce so dźens za tydźeń, 13. julija, z peticiju Łužiskeje aliancy (ŁA) zaběrać, w kotrejž žadaja sej zachowanje serbskeho sydlenskeho ruma a zakaz dalšeho wudobywanja bru­nicy we Łužicy. Posedźenje móžeš internetnje live sćěhować abo přichodny dźeń jako nahrawanje, w zdźělence ŁA rěka. Předsyda ŁA Hanzo Wylem-Kell chce so na posedźenju Europskeho parlamenta w Brüsselu wosobinsce wobdźělić a po móžnosći tež hłowne problemy a žadanja přednjesć. Zaměr peticije je, zo njedowola žane dalše wurywanje brunicy z łužiskeje zemje.

W lisće předsydźe Europskeho parlamenta Martinej Schulzej z 19. junija 2015 je Hanzo Wylem-Kell na wjacore přez wuhlowu industriju zawinowane škody skedźbnił: na „masiwnu narodnu katastrofu“ přez 136 wotbagrowanych serbskich wsow a zhubjacy so kulturno-rěčny kaž tež hospodarski rum Serbow; na masiwne aktualne kaž tež do přichoda sahace wobškodźenje přirody přez wudobywanje brunicy.