To a tamne (03.08.16)
Wulět ćeknjeneje kruwy w Pfalcy je so po štyrjoch tydźenjach skónčił. Skoćo, kotrež słucha na mjeno Johanna, su wčera w Kaiserslauternje popadnyli. Kruwa bě so na ležownosć zawoda zabłudźiła. Jako zawodna wohnjowa wobora dojědźe, wona spočatnje ćekny. Sobudźěłaćerjo pak móžachu ju na wobhrodźenu płoninu ćěrić. Johanna bě spočatk julija z rězarnje ćeknyła a policiju zas a zaso za nós wodźiła. Nětko chcedźa ju na statok smilnosće dowjezć, kaž rěkaše.
Camping na njewšědnym městnje je we wokrjesu Teltow-Fläming zasadźenje policije zawinił. Ludźo běchu ju informowali, dokelž někotre wosoby na kromje B 96 za campingowym blidom sedźo jědźachu. Policija wšak móžeše pad wujasnić: Wulětnikarjam bě so awto skóncowało. Čakajo na pomocnu słužbu činjachu to najlěpše ze situacije.
Nabožina je zakładne prawo
Erfurt (B/SN). Katolski běrow Durinskeje wozjewi k próstwje krajneje frakcije strony AfD „Nabožinsku swobodu škitać – namócnym přeńdźenjam na křesćanskich požadarjach azyla zadźěwać“ nowinsku zdźělenku. Ordinariatny rada Winfried Weinreich pisa: „Dźiwajo na mnohe nadpady na azylowe přebywanišća staja so problematika škita wšitkich ćěkancow, njewotwisnje wot jich nabožinskeje přisłušnosće. Nabožinska swoboda w našim kraju pak njepłaći jeničce za křesćanskich požadarjow azyla. Tele zakładne prawo přisteji kóždemu čłowjekej, njewotwisnje wot nabožiny. To wuzamkuje kóždužkuli nabožnje motiwowanu diskriminaciju – wězo tež napřećo křesćanam.
Ličba katolikow přiběrała
Politikarka AfD požadana
Prěni raz wotměja so lětsa wot 3. septembra hač do 3. oktobra Budyske tydźenje demokratije, a to pod hesłom „Přidaj swoje tři najgroše/Gib deinen Senf dazu“. Mnozy, tež priwatnicy, su wšelake zarjadowanja přizjewili.
Budyšin (SN/CoR). Dobry měsac do koncertneho zazběha, mjez druhim ze skupinu Jolly Jumper 4. septembra w 14 hodź. na hłownym torhošću, je zarjadowanska protyka derje pjelnjena. Dohromady je dotal něhdźe 60 projektow přizjewjene. Mjez druhim budu to dźěłarnički, čitanja, filmy a wustajeńcy. Wot 5. do 9. septembra planuje Domowina „dny serbskeho dialoga“. 5. septembra we 18 hodź. budźetej w Kamjentnym domje impulsowy referat iniciatiwy Serbski sejm wo móžnym parlamenće kaž tež diskusijne koło. Wo swojich lětach wandrowstwa powěda Chróšćan Franc Čornak 27. septembra šulerjam Budyskeje Serbskeje wyšeje šule w měšćanskej bibliotece.
Trump: Clinton je čert
Mechanicsburg (dpa/SN). Donald Trump Hillary Clinton dale masiwnje nadběhuje. Na wólbnobojowym zarjadowanju w měsće Mechanicsburg w staće USA Pennsylvania mjenowaše kandidat republikanow swoju demokratisku kontrahentku w boju wo zastojnstwo prezidenta „čert“, kaž medije kraja rozprawjeja. Kritizujo bywšeho kandidata Bernieja Sandersa, kiž Clinton mjeztym podpěruje, wón praji: „Wón so z čertom nasadźuje. Wona je čert.“ Je to prěni króć, zo Trump tónle wuraz wužiwa. Dotal bě ju „koruptnu“ mjenował.
Přilubjena pomoc wuwostawa
Berlin (dpa/SN). Wot mjezynarodneho zhromadźenstwa statow přilubjena pomoc Grjekskej k zmištrowanju krizy ćěkancow dla kraj dotal lědma docpěwa. Wo tym piše nowina Bild. Z přilubjenych 1 580 zastojnikow europskeje pomjezneje agentury Frontex je dotal runje 66 w Grjekskej. Nimo toho je EU město připowědźenych 475 fachowcow za azyl hakle 92 a město 400 přilubjenych tołmačerjow hakle 61 pósłała.
Bayerska wobskorži VW
Při bombowym nadpadźe na juhowuchodźe Turkowskeje je wčera šěsć ...
Zeman kritizuje Angelu Merkel
Praha (dpa/SN). Čěski prezident Miloš Zeman je zwjazkowu kanclerku Angelu Merkel (CDU) namołwjał, swoju dotalnu politiku ćěkancam napřećo změnić. „Němska zwjazkowa kanclerka dyrbjała swoje měnjenje korigować, dokelž je so kultura witanja jako njezmysł wopokazała“, rjekny 71lětny we wčerawšim wudaću nowiny Pravo.
Reagujo na najnowše terorowe nadpady w Němskej sej Miloš Zeman žadaše, wšitkich wotpokazanych požadarjow azyla wotsunyć. „Jeničke rozrisanje je, přičiny wotstronić. A tele přičiny su bohužel ilegalni migranća“, potwjerdźi prezident, kiž ma oficialnje nimale jenož reprezentatiwne nadawki. Politikar, kiž ze swojimi wuprajenjemi čěsku towaršnosć stajnje zaso pači, žada sej w tym zwisku lěpše zawěsćenje mjezow. „W padźe wjetšeje migraciskeje žołmy njebych ničo přećiwo namjeznemu płotej měł“, pokaza politikar na Madźarsku.
Čěska pěstuje jako čłonski kraj EU jara restriktiwnu politiku ćěkancam napřećo. W prěnich pjeć měsacach lěta su 122 ludźom azyl přizwolili, w samsnym času pak 418 próstwow wotpokazali.
