Přilubja dźěłowe městna
Des Moines (dpa/SN). Kandidatka demokratow za zastojnstwo prezidenta USA Hillary Clinton je wobšěrny inwesticiski paket připowědźiła, dyrbjała-li wona wólby dobyć. Na wólbnobojowym zarjadowanju w Des Moinesu w staće Iowa Clinton přilubi, pjenjezy za dróhi, mosty, tunle a lětanišća nałožować. Tak chce dźesać milionow nowych dźěłowych městnow, předewšěm za srjedźnu worštu wobydlerjow, wutworić.
Ludźo so policiji spjećowali
Berlin (dpa/SN). Při zasadźenju w Berlinskej štwórći Strowotna studnja je policija znowa spjećowanje wobydlerjow nazhoniła. Spočatnje bě 23lětny spytał tomu zadźěwać, zo zastojnicy pěšku před wobchodom kontroluja. Kaž policija zdźěli, je při tym k prěnim rozestajenjam dóšło. W tym času so něhdźe 30 wosobow před wobchodom zhromadźi. Wótře protestujo spytachu někotři zapřimnyć. Najebać to móžeše policija 23lětneho nachwilnje zajeć. Hižo spočatk tydźenja měješe wona w samsnej štwórći podobne problemy, jako bě so jej 70 wosobow do puća stupiło.
Manager VW přesłyšowany
Byrnjež ludźo poprawom cyłe lěto z wikowarjemi wo rabatach ...
Putin Ukrainje hrozył
Porošenko wobwinowanja jako njepřitrjechjace wotpokazuje
Moskwa/Kijew (dpa/K/SN). Ruski prezident Wladimir Putin je susodnej Ukrainje z napřećiwnymi naprawami za to hrozył, zo spyta wona pječa na čornomórskej połkupje Krim atentaty přewjesć. W boju přećiwo ukrainskim saboteram staj ruskaj wojakaj padnyłoj. „Po wšěm zdaću su tu ludźo, kotřiž njepytaja za pućemi k měrliwemu rozrisanju konfliktow, ale nałožuja radšo praksu terora“, Putin rjekny, přispomnjejo, „tajke něšto njemóžemy dopušćić.“ W tym zwisku pokaza wón na njedawno zwrěšćeny atentat na šefa Luganskich proruskich mocow Igora Plotnickeho. Hłowa ruskeho stata ma za to, zo po tychle podawkach nima zmysła, na přichodnym wjeršku G20 spočatk septembra w Chinje w kruhu Ruska-Němska-Francoska-Ukraina konflikt separatnje pojednać, wo čož bě Ukraina prosyła.
Za legalnu konop
Dalši nawal ćěkancow?
Policisća morjeni
Přiměr za pomoc
To a tamne (11.08.16)
Přiběžaneho psa wobsedźerjej wróćić dyrbitaj mandźelskaj z Bayerskeje. Tole je Podstupimske krajne sudnistwo wčera po lěta trajacej sudniskej zwadźe doskónčnje rozsudźiło. Mnichowčanaj běštaj dakla lěta 2012 při awtodróze zapadnje Berlina našłoj a sobu wzałoj. Wot toho časa so spjećowaštaj jeho wróćić. Sudnistwo mandźelskimaj wumjetowaše, zo njeběštaj tehdy zamołwite instancy informowałoj. Za nachwilne zastaranje psa wšak smětaj sej 3 271,16 eurow žadać.
Třilětny hólc je w bayerskim Bad Wörishofenje we wobchodźe debjenkow zasadźenje policije zawinił. Po informacijach policije bě so mać hólčka tam poradźować dała. Tón w tym času po wobchodźe dundaše. Při tym namaka alarmowy knefl a na njón stłóči. Mjeńšiny pozdźišo steješe policija w durjach – smědźeše pak změrowana zaso wotjěć.
Talibanojo dale postupuja
Kabul (dpa/SN). W juhoafghaniskej prowincy Helmand su nětko tež w poslednimaj, dotal měrnymaj wobwodomaj Nawa a Garmser wojowanja wudyrili. Talibanojo su jenož hišće tři kilometry wot prowincneje stolicy Lashkargar zdaleni. Awtodróha, kotraž města zwjazuje, je zawrjena. Z teje přičiny su so płaćizny žiwidłow potrojili. Po informacijach medijow njezamóchu USA z masiwnymi nalětami talibanow dotal zadźeržeć.
Lěhwa přepjelnjene
Athen (dpa/SN). Registrowanišća ćěkancow na grjekskich kupach su dospołnje přepjelnjene. Dźensa su tam prěni króć wjace hač 10 000 migrantow zličili, kaž krizowy centrum za ćěkancow w Athenje zdźěli. Lěhwa pak maja jenož městno za 7 450 ludźi. Poprawom móhła Grjekska ćěkancow, kotřiž ilegalnje do kraja přińdu, do Turkowskeje wróćo pósłać. Napjateho połoženja w Turkowskej dla pak to nječini.
NATO so njestarosći
