Schwerin (dpa/K/SN). Nastróžawši so wulkeje akceptancy AfD w Mecklenburgsko-Předpomorskej do njedźelnych wólbow krajneho sejma spytaja SPD, Lěwica a CDU wolerjow z prominencu hišće raz mobilizować. Tak porěčitaj dźens wječor w Rostocku-Warnemündźe na zarjadowanju nimo ministerskeho prezidenta kraja šef SPD Sigmar Gabriel a ministerka za swójby Manuela Schwesig. Lěwicy ma něhdyši předsyda frakcije w zwjazkowm sejmje Gregor Gysi pohon dać. CDU je kanclerku Angelu Merkel pře­prosyła, jutře w Bad Doberanje porěčeć. Po poslednim­ woprašowanju je drje SPD z 28 procentami hišće najsylniša móc, AfD pak slěduje ju z 23 procentami a je CDU (20 %) a Lěwicu (15 %) přesćahnyła.

Berlin (dpa/K/SN). Zo směli němscy zapósłancy wojakow Zwjazkoweje wobory w İncirliku zaso wopytować, wotmysli zwjazkowe knježerstwo Ankarje z poli­tiskej gestu kwoli być. Kaž magacin Spiegel­ rozprawja, stej so wonkowne ministerstwo a zarjad kanclerki na kročel dojednałoj, zo so rěčnik knježerstwa Steffen­ Seibert před nowinarjow stupi a so w mjenje­ knježerstwa wot rezolucije zwjazkoweho sejma nastupajo Armensku distancuje. Rezolucija zwjazkoweho sejma 2. junija měješe titl „Dopomnjeće na ludomordarstwo na Armenjanach a dalšich křesćanskich mjeńšinach w lětomaj 1915 a 1916“.

Štóž z mopsom přińdźe, ma darmotny zastup. Tak je to znajmjeńša na mjezynarodnym zetkanju tejele psyčeje družiny jutře w Berlinje. Něhdźe 250 je přizjewjenych. Jedyn přijědźe samo z Italskeje. Wjeršk zetkanja je běh na 50 metrow. Dobyćerjam kiwaja trofeje w formje mopsa. Štóž chce sej wubědźowanje wobhladać a žanoho mopsa nima, wšak dyrbi dwaj euraj zastupa płaćić.

Wobkedźbowarjo tuchwilneho NSU- procesa w Mnichowje su całty a přikuski w hódnoće wjacorych tysac eurow kradnyli. Wot spočatka procesa móžachu sej ludźo a zastupjerjo medijow we wěstotnej conje sudnistwa całty, šokolodu abo tykanc kupić. Płaćić mějachu do kasy dowěry. Kaž sudnistwo zdźěli, pak su wjac zjědli hač zapłaćili. Hoberskeje škody dla njeje catering hižo zwólniwy přikuski poskićeć a je předań mjeztym zastajił.

Berlin (dpa/SN). Něhdźe lěto po zawjedźenju zakonja přećiwo nadměrnemu zwyšenju podružow tłóči frakcija SPD zwjazkoweho sejma na to, jón přiwótřić. Kaž z předłohi na dźensnišej klawsurje wuchadźa, sej frakcija mjez druhim žada, zo so přenajerjo zawjazaja wysokosć prjedawšeje podruže předpołožić. To ma so zakonsce zakótwić. Tak móža wotna­jerjo posudźować, hač podruž zakonske hranicy překroča.

Ma Turkowsku kritizować

Brüsssel (dpa/SN). Zapósłanc FDP Alexander Graf Lambsdorff Europskeho parlamenta je prezidenta Martina Schulza namołwjał, na swojim wopyće w Turkowskej krajej wótru kritiku wuprajić. „Njeńdźe wo to Turkam wujasnić, zo smy solidarni“, wón dźensa rjekny. „Štož so tam tuchwilu stawa, njeje w porjadku, to ma so jasnje rjec.“ Schulz chcyše dźensa popołdnju jako prěni wyši zastupjer Europskeje­ unije po pospyće puča do Ankary jěć.

Wučomnicy pod ćišćom