Bombardowanje a boje
Aleppo (dpa/K/SN). Po atakowanju nakładnych awtow pomocneho konwoja UNO za syrisku ludnosć su bojowe lětadła dalše nalěty na rebelow přewjedli. Bombardowane buchu tereny sewjernje wulkoměsta Aleppo, zdźěla Syriska wobkedźbowarnja čłowjeskich prawow. Južnje Aleppa dóńdźe k bojam mjez přiwisnikami a přećiwnikami Assadoweho režima. Ruske a syriske lětadła su wone kónčiny bombardowali. Syriske wójsko bě přiměr wčera wupowědźiło.
Sebjekritiku Merkel witał
Berlin (dpa/SN). Zwjazkowy ratarski minister Christian Schmidt (CDU) je sebjekritiske wuprajenja zwjazkoweje kanclerki Angele Merkel (CDU) k politice ćěkancam napřećo witał. „Mam to za wulce respektabelny akt“, rjekny Schmidt, kiž je zdobom městopředsyda CSU, powěsćerni dpa. Schmidt je dźakowny za „realistiski posudk a sprawnosć“ předsydki CDU wo połoženju jeje strony po njedawnych wólbach. Merkel bě hladajo na poražku CDU při wólbach w Mecklenburgsko-Předpomorskej a Berlinje zmylki přiznała.
Biskop namołwja młodostnych
Dospołnje wupalene steja nakładne awta pomocneho skutka UNO na ...
Ke krizowemu posedźenju zwołani
Budyšin (SN/MkWj). Po swojim wustupje w telewizijnym wusyłanju „Anne Will“ njedźelu je Budyski wyši měšćanosta Alexander Ahrens (njestronjan) zamołwitych Budyskeje radnicy wčera na krizowe posedźenje zwołał. W dwuhodźinskej diskusiji dojednachu so na wjacore hnydomne naprawy, kaž z nowinskeje zdźělenki radnicy wuchadźa.
Tak chcedźa pruwować, kak móhli štyrjo socialni dźěłaćerjo, kotrychž město tuchwilu financuje, problemowu štwórć na Budyskich Žitnych wikach do swojeho dźěła sobu zapřijeć. Nimo toho maja poskitk Kamjentneho domu na blidźe. Tam namjetuja tež tak mjenowanych streetworkerow zasadźić. Wotpowědny koncept chcedźa nětko zdźěłać.
Problemy na Žitnych wikach budźe tež tema přichodneho posedźenja měšćanskeje rady 28. septembra. Tam ma so mjez druhim wo zakazu alkohola na Budyskej „plaće“ wuradźować. Hišće tónle tydźeń planuja zamołwići sprjewineho města wuradźowanje z policiju wo móžnych zhromadnych kontrolach na Žitnych wikach. Zaměr je widźomna prezenca wobeju zarjadow, zo móhli konflikty sčasom spóznać a reagować.
Brunica hač do 2050 trěbna
Politikarjo Europskeje unije Łužiske koło posylnjeja
Grodk (SN/BŠe). Komunalny zwjazk Łužiske koło nazhonja tele dny wulku podpěru ze stron Europskeje unije za swoje předstawy, sčinić z Łužicy modelowy region strukturneho wuwića. Tak rozmołwještaj so zastupjerjej zwjazka, Grodkowska měšćanostka Christine Herntier (njestronjanka) a Běłowodźanski wyši měšćanosta Torsten Pötzsch (Klartext), minjene dny ze zastupjerjom komisije EU Richardom Kühnelom w Berlinje. Dale schadźowachu so ze zapósłancom zwjazkoweho sejma dr. Klausom-Peterom Schulzom (CDU) a europskim zapósłancom dr. Christianom Ehlerom (CDU).
Dowěra ma dźěry
Wo čłowjeske prawa
Wušo hromadźe dźěłać
Krim „njewoliła“
To a tamne (20.09.16)
Dokelž dyrbješe štyri dny při puću na awto čakać, kotrež by jeho sobu wzało, je so po Nowoseelandskej pućowacy Francoz roznjemdrił a wjacore nadróžne tafle wobškodźił. 27lětneho su mjeztym sudnikej předstajili, a jemu hroža hač do tři měsacy jastwa. Njemdrosć muža budźe tež dosć droha naležnosć: Zhotowjer taflow žada sej 2 000 eurow za porjedźenje. A tysac eurow pokuty je Francozej nimo toho sudnistwo napołožiło.
Dospołnje pjana muska trójka je sej w Bremerhavenje z trašawku w ruce wot pěškow pjenjezy žadała a runje 20 centow wuzbytkowała. 40lětny, kiž měješe pistolu w ruce, bě tak wopity, zo jemu bróń z ruki padny. Wustróženi pasanća pak móžachu ćeknyć. Policija muži w starobje 38 do 42 lět zaja. Woni běchu hižo do toho ludźi w hosćencu a tobakowym wobchodźe wohrozyli.
EU ma zaso bóle zahorjeć
Bratislava (dpa/K/SN). Pjatkowny wurjadny wjeršk šefow statow a knježerstwow 27 krajow EU brexita dla je „Bratislavsku deklaraciju“ wunjesł. Ta lubi naprawy, z kotrymiž maja so ludźo zaso bóle za uniju zahorjeć, kaž su to lěpša wonkowna a nutřkowna wěstota a wjac dźěłowych městnow. Słowakski premier Robert Fico mjeztym rjekny, kraje Visegrádskeje štyrki wobstawaja na tym, zo wostanu britiske dźěłowe wiki staćanam EU tež přichodnje dale přistupne.
Tysacy ludźi protestowali
Waršawa (dpa/SN). Tysacy ludźi su wčera we Waršawje přećiwo nowemu zakonjej protestowali, z kotrymž chcedźa wotehnaće dźěsća w Pólskej dospołnje zakazać. Naćisk chcedźa štwórtk w sejmje rozjimać. Do protesta namołwjała bě wobydlerska iniciatiwa „Ratujmy kobiety“ (Wuchowajmy žony). Dotal staj so ministerska prezidentka Beata Szydło kaž tež předsyda knježaceje narodnokonserwatiwneje strony Prawo a sprawnosć Jarosław Kaczyński za zakaz wotehnaća wuprajiłoj.
Konferenca UNO wo ćěkancach
