Bjez wulkeho zboža wostachu paduši, kotřiž měrjachu so na nakładne awto. W nocy na njedźelu rozrězachu skućićeljo płachtu pólskeho nakładneho awta, kotrež steješe na awtodróhowym parkowanišću w braniborskim Herzsprungu. Šofer w tym času kruće spaše. Lkw transportowaše 14,5 tonow hodownych štomow. Wo te pak pakostnicy njerodźachu a so zminychu. W Braniborskej paduši stajnje zaso płachty nakładnych awtow rozrězuja.
Při pospyće, łožo přez wokno wottransportować, je so 38lětny w badensko-württembergskim Hayingenje ćežko zranił. 73lětny pomocnik přijědźe z traktorom a suny łopač traktora direktnje pod wokno. 38lětny sadźi łožo na łopač, kotraž pak so njejapcy zwróći. Muž padny štyri metry do hłubiny a so na chribjeće ćežko zrani. Najskerje bě so łožo ručicy dótknyło, na čož so łopač zwróći.
Berlin (dpa/K/SN). Z rjadow CSU dóstawa Angela Merkel (CDU) spochi wjace podpěry za to, znowa kandidować na kanclerstwo – njedźiwajcy wadźeńcy politiki napřećo ćěkancam dla. Nětko je so tež předsydka krajneje skupiny CSU w zwjazkowym sejmje Gerda Hasselfeldt za jeje znowanastup wuprajiła. „By-li Angela Merkel zwólniwa była, by wona moju połnu podpěru měła“, Hasselfeldt zwurazni. Oficialnje wšak njeje so CSU hišće pozicioněrowała.
Walloniska so dale spjećuje
Brüssel (dpa/SN). Krótko do dźensa wječor planowaneho rozsuda wo dóńće wikowanskeho zrěčenja mjez Europskej uniju a Kanadu Ceta su signale z belgiskeho regiona Walloniska dale negatiwne. Prezident regionalneho parlamenta André Antoine rjekny rozhłosownikam, zo njemóže ultimatum EU respektować. Prezident Rady EU Donald Tusk bě sej hač do wječora jasnu wotmołwu z Brüssela žadał. Dyrbjała-li Belgiska zrěčenje wotpokazać, dyrbja za štwórtk planowane podpisanje CETA wotprajić.
Dulig znowa wuzwoleny
Budyšin (CK/SN). Hladajo na wotchad ludźi z wjesnych kónčin ma so za přičinami pytać. Stat dyrbjał wjace činić, zo bychu so atraktiwne kulturne poskitki w tychle kónčinach zachowali a dale wuwiwali. Tole stej zasadnej wuprajeni nadregionalneho zetkanja w Serbskim ludowym ansamblu. Cyłkownje 17 žonow a muži je so minjeny pjatk w Röhrscheidtowej bašće zhromadźiło, zo bychu sej nazhonjenja wo kulturnym spěchowanju we wjesnych kónčinach wuměnjeli. SLA jako hosćićel zarjadowanja wot lěta 2013 dźěćom w šulach a pěstowarnjach wjeselo nad spěwanjom posrědkuje. Pod hesłom „Sołobik“ bě jich spočatnje 120 zajimcow, lěto na to hižo dwójce telko. Na koncerće k sobuspěwanju w Lubijskej měšćanskej hali naličichu na wšě 650 dźěći. Akciju spěchowaštej kulturny rum Hornja Łužica-Delnja Šleska a Drježdźanske statne ministerstwo za wědomosć a wuměłstwo.
Njewšědne to zajeće: W Mnichowje je policija wčera kołpja popadnyła a w policajskim jězdźidle sobu wzała. Starosćiwi wobydlerjo běchu zastojnikow informowali, dokelž kołp wočiwidnje bjez orientacije po hłownej wobchadnej dróze běhaše. Wobsadka policajskeho awta zwěrjo na to popadny a sobu wza. Po krótkej jězbje je we Wuchodnym parku města zaso na swobodu pušći.
Dospołnje pjany listonoš je w Regensburgu z kolesa padnył, jako póštu roznošowaše. Při tym so 45lětny w mjezwoču snadnje zrani. Přiwołanym zastojnikam wšak alkoholowa „chorhojčka“ muža napadny, a test wunjese nimale 3,5 promilow. Chorobne awto dowjeze listonoša do chorownje. Tajkeje wysokeje koncentracije alkohola drje muž swoju jězbnu dowolnosć zhubi. Nimo toho dyrbi wón z wotpowědnymi dźěłoprawniskimi konsekwencami ličić.
Berlin (dpa/SN). Po lěta trajacych raznych diskusijach je zwjazkowy sejm dźensa z wjetšinu CDU/CSU a SPD krućiše prawidła za zwjazkowu tajnu słužbu BND schwalił. Nimo toho chcedźa přichodnje parlamentarisku kontrolu wšitkich tajnych słužbow kraja polěpšić. Tak ćehnje zwjazkowe knježerstwo konsekwency ze skandala wobčušlenja přez amerisku tajnu słužbu NSA a ze špionaže BND we wukraju. Opozicija nowy zakoń jako dospołnje njedosahacy wotpokazuje.
Za Schengenske poměry
Berlin (dpa/SN). Europska unija chcyła krok po kroku w Schengenskim rumje zaso pućowanje bjez mjezow zmóžnić. Tole zdźěli zwjazkowa kanclerka Angela Merkel (CDU) minjenu nóc w Brüsselu po zakónčenju wjerškoweho zetkanja EU. „Hdyž njejsu mjezy w dosahacej měrje škitane, dyrbja pomjezne kontrole móžne być“, wona zwurazni. Do toho bě Němska zhromadnje z druhimi krajemi tomu zadźěwała, zo so wjeršk jasnje přećiwo namjeznym kontrolam wupraji.
Pomocnicy w Aleppo čakaja