Praha (dpa/SN). Čěska pomha Serbiskej prěni króć při zawěsćenju mjezow. Cyłkownje 55 zastojnikow je so dźensa z Prahi na puć do směra na Serbisku a Makedonsku podało. Tam maja pomhać, migrantam puć po tak mjenowanej balkanskej čarje do Europy zaraćić. „Ilegalneje migracije dla je so wěstotne połoženje w Europje pohubjeńšiło“, rjekny čěski policajski prezident Tomáš Tuhý powěsćerni ČTK při rozžohnowanju zastojnikow. Čěska so zhromadnje z Madźarskej, Pólskej a Słowakskej za to zasadźa, balkansku čaru dołhodobnje zawrěć.
Armeja město nadběhuje
Mossul (dpa/SN). Irakske elitowe jednotki su dźensa započeli nakromne dźěle města Mossula nadběhować, hdźež knježi teroristiska milica Islamski stat. Po informacijach kurdiskeho sćelaka Rudaw su mjeztym razne boje wudyrili. Wot USA nawjedowana mjezynarodna koalicija iraksku armeju z lětadłami podpěruje. Mossul je poslednje wulke město w rukach Islamskeho stata w Iraku.
Koaliciske jednanja
Lund/Malmö (dpa/K/SN). Z historiskej kročelu je bamž Franciskus wobkrućił swoje žadanje za dalšim přibliženjom katolikow a protestantow. Prěni raz steješe wón z lutherskimi duchownymi za wołtarjom, zo by k zazběhej jubilejneje 500. róčnicy reformacije z nimi Božu słužbu swjećił. W južnošwedskim Lundźe wozjewichu woni, wzajomnje ,,pohłubšić ekumeniske prócowanja wo zhromadne přijeće swjateje eucharistije. Ze šćěpjenjom a wotcuzbnjenjom, nastawacymaj z dźělenja, njesměmy so wotnamakać. Mamy přiležnosć, poprawić rozsudny wokomik našich stawiznow“, swjaty wótc zwurazni.
Wopačny urin při policajskej kontroli wotedał je pod wliwom drogow stejacy młodostny pola Mnichowa. 19lětny zawostaji mjez zastojnikami zamyleny zaćišć, test urina pak ničo njewunjese. Při přepytowanju muža wšak zastojnicy zwěsćichu, zo bě tón na tajke kontrole přihotowany: W zaku jeho cholowow nańdźechu dalšu blešku cuzeho urina, nimo toho krjepki, kotrež maja funkciju pupilow normalizować. Dokelž namakachu tež marihuanu, sćazachu klučiki awta a jězbnu dowolnosć 19lětneho.
Něhdźe 250 wobdźělnikow je w hessenskim Wächtersbachu na najnaročnišim marathonowym běhu wobdźěliło. Tak dyrbjachu štomy ćahać a tójšto zadźěwkow přewinyć, při čimž mějachu tež zmužitosć dopokazać: Suwanje z dźesać metrow wysokeje błóćaneje hórki skónči so w lódzymnej wodźe.
Camerino (dpa/SN). Italski ministerski prezident Matteo Renzi je po najnowšim zemjerženju potrjechenu kónčinu wopytał a podpěru přilubił. „Zemjerženje wuwiće Italskeje njezadźerži“, rjekny wón na nowinarskej konferency w Camerino w prowincy Macerata. Tam běchu zemske storki w dwěmaj gmejnomaj tójšto škody načinili. Renzi připowědźi pomoc, zo móhłoj gmejnje infrastrukturu zaso natwarić, byrnjež z nowymi zemjerženjemi ličić dyrbjałoj. „Tole dyrbimy Italskej a wšej Europje derje rozkłasć.“
Wojowarjow „neutralizowali“
Istanbul (dpa/SN). Turkowska armeja je minjene dny na juhowuchodźe kraja wjace hač sto wojowarjow zakazaneje kurdiskeje dźěłaćerskeje strony PKK „neutralizowała“. We wjacorych prowincach běchu wot 20. hač do 26. oktobra z wojerskimi akcijemi přećiwo „teroristam“ postupowali, kaž statna powěsćernja Anadolu dźensa rozprawja. Wuraz „neutralizować“ za zamołwitych w Turkowskej woznamjenja wojowarjow morić, ale tež zranić abo zajeć.
Hoberske mórske škitne pasmo