Dospołnje nahi a pod wliwom drogow stejacy je muž w Magdeburgu awto pokradnyć spytał. Wobsedźer awta bě sobotu wječor policiju wołał, dokelž nahi muž w jeho wozu sedźeše. Ta nańdźe tam chětro zamyleneho 27lětneho. Drasty ležachu w bliskosći awta. Test drogow pola njeho wunjese konop a amfetaminy. Muža dowjezechu do chorownje.
45 metrow hłuboko padnyła a tole přežiwiła je psyca w Sakskej Šwicy. Zwěrjo bě ze swojej wobsedźerku po horach po puću, jako so na nahłej a hładkej skaliznje wobsuny a do hłubiny padny. Po 25 metrach štomy a kerki spad trochu borzdźachu. Pomocnicy so z powjazami po skaliznje dele pušćichu a žałosćacu psycu skónčnje w skalnej škałbje namakachu. Akcija, při kotrejž su dalši pućowarjo pomhali, traješe dlěje hač dwě hodźinje.
Berlin (dpa/SN). Hladajo na napjatosće w swojej domiznje dźeń a wjace Turkow w Němskej wo azyl prosy. Lětsa prěnje poł lěta je ličba mjeztym runje tak wulka kaž cyłe lěto 2015, kaž zwjazkowy zarjad za migraciju a ćěkancow zdźěla. Tak su wot januara hač do junija 1 719 próstwow turkowskich staćanow wo azyl zličili, loni bě jich dohromady 1 767. Najwjace požadarjow je z kurdiskich kónčin, hdźež so stajnje zaso wojuje. Wuhlady na azyl w Němskej su přiwšěm snadne.
Dopokazy njedosahace
Washington (dpa/SN). Wot Turkowskeje předpołožene dopokazy, zo bě w eksilu w USA bydlacy prědar Fethullah Gülen do wojerskeho puča w Turkowskej splećeny, knježerstwu USA njedosahaja. Tuchwilu njeje tuž wotwidźomne, zo Gülena Turkowskej přepodadźa, kaž sej to knježerstwo w Ankarje žada. Wčera bě sudnistwo USA wukazało Gülena zajeć. Turkowske knježerstwo chce nětko dalše dopokazy předpołožić. Hač prědarja Gülena přepodadźa abo nic, rozsudźi wonkowny minister USA John Kerry.
Ciwilistow zajeli
Manila (dpa/SN). Najebać protesty aktiwistow za zachowanje čłowjeskich prawow je nowy filipinski prezident Rodrigo Duterte w boju přećiwo drogowej kriminaliće razne naprawy připowědźił.
„Ja was wšitkich morju“, Duterte dźensa hrožeše. Wón bě we wólbnym boju krute postupowanje přećiwo kriminaliće přilubił a bu z wjetšinu woleny. Po jeho zapokazanju kónc junija morichu wjace hač 400 dealerow drogow a tysac małokriminelnych. W žanym padźe njejsu skućićelow zwěsćili. Kritikarjo prezidentej wumjetuja, zo ćerpi smjertne cwólby.
Amtěrowacy swětowy mišter w mjetanju ručnych tobołkow, 44lětny Andreas Ruland, chce jutře w Bottropje titul zakitować. Při tym spušća so na swoju mjetansku techniku: wupřestrětu ruku dale a spěšnišo w kole wjerćeć a tobołku skónčnje pušćić. Swětowe mišterstwa wotměwaja so wo lěta 2012.
Dźiwadłowy kruch je w Allgäuju zasadźenje policija zawinił. Žona bě zastojnikow alarmowała, po tym zo bě w lěsu wutřěle a škrěčenje słyšała. Zastojnicy wšak zwěsćichu, zo słušeše to do dźiwadłoweho krucha, w kotrymž nadpad a nastatu paniku napodobnjeja. Najebać wopačny alarm policija žonu chwaleše, prajo: Radšo jónu wjace zazwonić hač jónu přemało.
Kabul (dpa/SN). Talibanojo su w zapadoafghaniskej prowincy Herat jědnaće wukrajnych turistow, mjez nimi běchu pječa tež Němcy, wobtřěleli. Při tym so pjeć turistow zrani, zdźěli rěčnik tamnišeho guwernera. Medije běchu samo wo mortwych rozprawjeli. Wojerska eskorta skupinu přewodźeše, kotraž bě po puću do prowincneje stolicy Herat. Tam je tójšto historiskich twarjenjow. Namocy a atentatow dla wšak lědma hišće turisća do Afghanistana přińdu.
Wobydlerjo namołwjeni
London (dpa/SN). Reagujo na nadpad z nožom z jednej mortwej a pjeć zranjenymi wyši měšćanosta Londona Sadiq Khan wobydlerjow namołwja, měr wobchować a kedźbliwi być. 19lětny bě so wčera wječor na naměsće Russell Square z nožom do ludźi dał. Při tym žonu mori kaž tež dwě žonje a třoch muži zrani. Policija móžeše skućićela zajeć. Po prěnich dopóznaćach je wón psychisce chory.
Hinz dotal njereagowała