Podpěruja wólby Serbskeho sejma

srjeda, 25. julija 2018 spisane wot:

Krajne dźěłowe zjednoćenstwo Serbska Lěwica podpěruje wólby Serbskeho sejma. Nimo toho je dwě wosobje namjetowało, zo byštej za prěni demokratisce legitimowany serbski parlament kandidowałoj.

Budyšin (SN/at). Na kóncu bě wjetšina dosć jasna, kotraž wupraji so za podpěru wólbow Serbskeho sejma. Do toho pak su wobdźělnicy wčerawšeho zetkanja Serbskeje Lěwicy w Budyšinje wobšěrnje swój wosobinski wid do diskusije dali.

Ći jedni maja dale Domowinu za legitimowanu zastupjerku našeho ludu, štož wuchadźa hižo z jeje stawiznow. Druzy su bóle diferencowali: Stawizniski aspekt je jim jedna stronka. Jako dalšu pak skedźbnjachu kritisce na skutkowanje třěšneho zwjazka po towaršnostnym přewróće jako towarstwo. Tam njeje so Domowinje poradźiło, w bytostnych za narod eksistencielnych prašenjach statnym instancam ze za wohroženu mjeńšinu trěbnej krutosću napřećo stupać.

Wowčerjam wjetše zarunanje

srjeda, 25. julija 2018 spisane wot:

Drježdźany (SN). Z lěpšimi pomocami podpěruje Sakska wowčerjow po nadpadach wjelka na jich stadła. Kaž wobswětowe ministerstwo wčera w Drježdźanach zdźěli, je zarunanje škody za morjene skoćata nětko tež wyše tak mjenowaneje deminimisoweje hranicy 15 000 eurow w dospołnej wysokosći ze statnych srědkow móžne. Nimo toho móža wupłaćenje pospěšić. Po słowach Thomasa Schmidta (CDU), statneho ministra za wobswět a ratarstwo, je dospołne zarunanje škody najebać škitne naprawy runje tak wažne. Dotal smědźeše Sakska škody jenož potom dospołnje zarunać, hdyž njeje cyłkowna suma w třoch lětach za sobu 15 000 eurow překročiła, to pak jenož po 80 procentach.

Nětko je Europska unija wobmjezowanje hač do kónca lěta 2023 dowoliła, zo móža tež wjetše a wospjetne škody stoprocentowsce ze statnych srědkow zarunać. Kóšty za skótneho lěkarja a za pytanje zhubjenych skoćatow wurunaja po 80 procentach. Za wuměnjenje mjenuja dodźerženje minimalneho škita před přesahnjenjom wjelka pola kozow, wowcow a dźiwiny w jaslach.

Puigdemont Němsku wopušći

srjeda, 25. julija 2018 spisane wot:

Berlin (dpa/SN). Nawoda katalanskich separatistow Carles Puigdemont chce Němsku kónc tydźenja wopušćić a so do Belgiskeje podać. Tole je wón dźensa na zwjazkowej nowinarskej konferency w Berlinje připowědźił. Hłowna přičina je rozsud schleswigsko-holsteinskeho sudnistwa, wukaz zajeća přećiwo Puigdemontej zběhnyć. Španiska bě sej přepo- daće Puigdemonta zběžkarstwa dla žadała. Nětko móže so politikar po wšej Europej hibać. Do Španiskeje so nawróćić pak njemóže, dokelž bychu jeho tam zajeli.

Zeleni kritizuja Seehofera

Berlin (dpa/SN). Zeleni su w padźe wotstupjeneho koparja němskeje narodneje wubranki Mesuta Özila nutřkowneho a sportoweho ministra Horsta Seehofera (SPD) raznje kritizowali. Předsyda Zelenych Robert Habeck je Seehoferej sobuzamołwitosć za wocuzbnjenje mnohich Němcow z turkowskimi korjenjemi a tak tež indirektnje za wustup Özila z na­rodneho mustwa wumjetował. „Hdyž sportowy minister zjawnje praji, zo islam k Němskej njesłuša, potom čuja so muslimscy sportowcy wustorčeni“, rjekny Habeck nowinarjam.

May jednanja nawjeduje

Po zahubnych lěsnych wohenjach minjeneju dnjow pokazuje so w Grjekskej cyły rozměr katastrofy, kotraž je sej po dotalnej ­bilancy 74 smjertnych woporow žadała. Wohnjowi wobornicy móžachu hač do ranja nimale wšitke wohenje zhašeć. W katastrofowej kónčinje wokoło města Rafina pomocnicy dale za woporami pytaja. Ličba mortwych móhła so zwyšić, dokelž je hišće tójšto ludźi zhubjenych. Mnozy so w swojich awtach spalichu, jako spytachu před płomjenjemi ćeknyć. Foto: dpa/Lefteris Partsalis

Berlin (dpa/SN). Trajaceje horcoty a suchoty w mnohich kónčinach Němskeje dla žada sej Dźěłowe zjednoćenstwo burske ratarstwo (AbL) wyše płaćizny za ratarske wudźěłki a wjerškowe zetkanje ze zastupnikami žiwidłoweje branše a wikowanja. Wšitcy wobdźěleni dyrbjeli zhromadnje spěšne njeběrokratiske pomocne naprawy tež zwonka ryzy pjenježneje pomocy diskutować a wobzamknyć, rěka w zdźělence ekologisce orientowaneho zwjazka. „Eksistencu wohrožowacu krizu móžemy jenož ze spěšnym zwyšenjom płaćiznow ratarskich wudźěłkow zmištrować.“ Partnerojo ratarjow, kaž mlokarnje a rězarnje, tola tež burja sami, dyrbjeli nětko zamołwitosć přewzać.

W druhich wobłukach je z wašnjom, straty a přidatne wudawki přez płaćiznu přetrjebarjam napołožić, zdźěli rěčnik zwjazka medijam. Předewšěm prodrustwowi wikowarjo dyrbjeli swojim kupcam połoženje ratarjow rozjasnić a na wyšich płaćiznach wobstawać. Statne pomocy kaž nachwilne spušćenje dawkow abo dočasne wupłaćenje premijow su jenož „kapka na horcy kamjeń“.

Trump: Wšitke cła wotstronić

srjeda, 25. julija 2018 spisane wot:

Washington (dpa/SN). Do swojeho zetkanja z wodźacymi zastupnikami EU wikowanskeje zwady dla je prezident USA Donald Trump deal namjetował, do kotrehož zwoprawdźenja wón drje sam njewěri: USA kaž tež Europska unija móhli wšitke cła, wikowanske zadźěwki a subwencije wotstronić, Trump wčera na Twitter pisaše. „Potom bychmy to měli, štož so swobodne wiki a fairne wikowanje mjenuje. Nadźijam so, zo su woni k tomu zwólniwi – woni pak to njebudu.“

Prezident komisije EU Jean-Claude Juncker chcyše so dźensa w Běłym domje we Washingtonje z Trumpom zetkać, zo by dalšej eskalaciji wikowanskeje zwady zadźěwał. Trump bě hrozył, wudźěłkam z Europy dalše cła napołožić, njedyrbjała-li EU ke kompromisam zwólniwa być. „Cła su to najwjetše“, Trump na samsnym městnje piše. Jenož „fairne wikowanske zrěčenja“ su woprawdźita alternatiwa. Što wón z tym měni, je dale njewěste. Juncker chce tomu zadźěwać, zo sej USA přichodnje tež wyše cła za europske awta žadaja.

Boja so komplikacijow

srjeda, 25. julija 2018 spisane wot:

Zwjazkowe knježerstwo přećiwo serbskim kóncowkam w dokumentach

Berlin (SN/MkWj). Na njedawnej „Rozmołwje ze Saksami“ ministerskeho prezidenta Michaela Kretschmera (CDU) w Budyšinje je so runje tak wo tym rě­čało kaž na zjawnym posedźenju sakskeho wuběrka za wědomosć, wysoke šule a kulturu Sakskeho krajneho sejma srjedź junija: Móžnosć, zo móža Serbowki swoju serbsku kóncowku swójbneho mjena do wupokaza zapisać dać. Dokelž dyrbjało zwjazkowe knježerstwo za to wobstejacy zakoń wo změnje mjena za přisłušnikow narodneje mjeńšiny (Minderheitennamensänderungsgesetz) z lěta 1997 wotpowědnje změnić, je so za­pósłanča Lěwicy w zwjazkowym sejmje Caren Lay z pisomnym naprašowanjom na zwjazkowe ministerstwo za justicu a škit přetrjebarjow wobroćiła. Wona chcyše wědźeć, ke kajkemu wuslědkej je knježerstwo w Berlinje při pruwowanju wotpowědneje próstwy přišło a hač ma zasadnje za trjeba, zo směli Serbowki specifisku žónsku kóncowku w dokumentach wužiwać.

„-owa“ abo „-aua“?

srjeda, 25. julija 2018 spisane wot:
To njeboli jenož prawiznika: Wot lěta 1997 mamy zaso prawo na oficialne wjedźenje našich serbskich mjenow, kaž do toho za wěsty čas w NDR. Potajkim wšo w porjadku? Ně – bohužel nic! Smy dyrbjeli zwěsćić, zo to jenož za Serbow přitrjechi, nic pak za Serbowki. Žónske formy – kaž na přikład -owa abo -ec – njejsu dowolene. W prěnich lětach noweho lětstotka zapodate skóržby serbskich žonow buchu wotpokazane. Zwjazkowe ministerstwo za nutřkowne naležnosće wotpokazaše pro serbske reformy w mjenowym prawje – złožujo so na argumenty ze spočatka stareho lětstotka: Germanizatoriske wusudy Pruskeho komoroweho sudnistwa přećiwo pólskim mjenam a wućahi z komentara byrgarskeho zakonika z lěta 1900. Wjac hač 15 lět wojuja Serbja přećiwo njedostatkej. Spočatne němske argumenty su so mjeztym změnili – wobsahowa pozicija pak nic. Mjeno čłowjeka je tola dźěl jeho dostojnosće. Hajko Kozel

Lubnjow (PB/SN). Něšto stow ludźi je minjeny kónc tydźenja mjeztym 10. rockowy koncert na błótowskej kupje Wótšowska dožiwiło. Tójšto z nich bě z čołmikami k wotležanemu hosćencej přijěło, tak zo ležeše na kóncu wjace hač sto čołmikow w přistawje.

Jedna z nowostkow lětušeho koncerta bě wustup dweju skupin na kóždym wječoru. Nowy wotnajer Wótšowski, Torsten Teichert, bě nimo toho wšelake twarske změny zwoprawdźił. Tak da mjeztym chětro zestarjenej budce wotstronić, zo by wjace městna za jewišćo měł. Tež zastaranje ludźi je přeorganizował a polěpšił. „Sym sej mustwo Kalawskeho měšćanskeho swjedźenja jako podpěru skazał“, hosćencar rjekny. Hižo do zahajenja koncerta dźakowaše so wón wohnjowej woborje a sobudźěłaćerjam wuchowanskeje słužby za zasadźenje. Wosebity dźak pak je sej po jeho słowach přiro­doškitny hamt krajnoradneho zarjada zasłužił. Bjez jeho dowolnosće njeby tajki koncert wosrjedź Błótow móžny był.

To a tamne (25.07.18)

srjeda, 25. julija 2018 spisane wot:

Wulke mnóstwo mjasa su njeznaći kónc tydźenja z předawanskeje budki w hornjopfalcowskim Weidenje pokradnyli. Nětko policija slědźi, hdźe su so runočasnje wjetše grilowanske partyje wotměli. Wobsedźer budki dyrbješe póndźelu zwěsćić, zo pobrachuja tři kašćiki piwa, 60 steakow, 40 hamburgerow a płunowa bleša. „Z tym móžeš cyłu kompaniju zastarać“, rěčnik policije rjekny. Nětko nadźijeja so pokiwow swědkow.

Woblubowane lubosćinske zamki na Kölnskim Hohenzollernskim mosće tam najprjedy raz wostanu. Po rozprawach wo móžnej demontaži železnica zdźěla, zo nima planowane, turistisku atrakciju wotstronić. Rěčnik železnicy bě póndźelu připowědźił, zo dyrbja zamki poněčim wotstronić, zo móhli móst znowa wobarbić a tak přećiwo zerzawcej škitać. Tole pak je nětko wotstorčene.

Chróšćan Šulerjo

nowostki LND