Gabriel warnuje
Berlin (dpa/SN). Zwjazkowy wonkowny minister Sigmar Gabriel (SPD) je před dalokosahacymi konsekwencami warnował, připóznaje-li USA Jerusalem jako stolicu Israela. „Rozrisanje Jerusalemskeho konflikta hodźi so jenož w direktnych jednanjach mjez woběmaj stronomaj nańć“, rjekny Gabriel dźensa na Berlinskim forumje wonkowna politika Körberoweje załožby. Nowina Wall Street Journal bě rozprawjała, zo steji prezident USA Donald Trump bjezposrědnje před tym, Jerusalem jako stolicu připóznać.
Racije w lěwicarskej scenje
Berlin (dpa/SN). Pjeć měsacow po krawalach w zwisku z wjerškom G 20 w Hamburgu je policija racije we wosom zwjazkowych krajach přewjedła. Zasadźenje wosebiteje komisije „čorny blok“ traja wot dźensnišeho ranja. Z tym chcedźa dalše dopokazy zawěsćić. Přepytowali su dwucyfrowu ličbu bydlenjow lěwicarskeje sceny. W Braniborskej a Sakskej pytali njejsu.
Wjetšina za cofanje
Pčołarjo rozłožuja wopytowarjam we wobłuku 9. festiwala mjedu a ...
GEW warnuje před planami ministra
Drježdźany (dpa/SN). We wobłuku debaty wo pobrachowacych wučerjach w Sakskej warnuje dźěłarnistwo kubłanje a wědomosć (GEW) před planami kultusoweho ministra Franka Haubitza (njestronjan), wučerjam status zastojnika spožčić. Wšitcy wučerjo njemóža tónle status docpěć, nimo toho planuje to minister jenož za połnje dźěłacych pedagogow, tohodla bychu rozdźěle we wučerskich stwach jenož rozrostli, rjekny předsydka GEW Sakskeje Uschi Kruse wčera w Drježdźanach. Wšitcy w NDR wukubłani wučerjo su staroby dla z toho wuzamknjeni. „Status zastojnika za sebje njeje młodym ludźom hižo přičina do Sakskeje přećahnyć.“ Kruse wupraja so za to, nettomzdy zwyšić, zo bychu powabk tworili.
Sakska předsydka GEW kritizowaše runje tak wulke kóšty za zastojnikow. Rozsudźa-li so nětko za to, „potom budźe dróše hač wšo, štož je nětko předwidźane“. Za dźěłarnistwo je wolóženje za wučerjow rozsudne, zo by so atraktiwita powołanja zwyšiła.
Rěča wo wupokazanjach do Syriskeje
Drježdźany (dpa/SN). Do konferency nutřkownych ministrow kónc tydźenja w Lipsku je jeje předsyda žadanja Sakskeje a Bayerskeje potwjerdźił, wěstotne połoženje w Syriskej znowa posudźować. Wón wočakuje na konferency, kotraž so štwórtk zahaja, na temu „wupokazanja do Syriskeje“ kontrowersu, „kotruž wjedu kruće po naležnosći, ale konkretnje na problemje“, rjekny sakski resortny šef Markus Ulbig (CDU) powěsćerni dpa. Zaměr iniciatiwy je, tak mjenowanych wohrožerjow a skućićelow chłostajomneho skutka ze Syriskeje do jich domizny wróćo słać, hdyž wěstotne połoženje to dowola. Skeptiske zwuki z kanclerskeho zarjada a zwjazkoweho nutřkowneho ministerstwa jeho njetraša.
Ulbig je skerje na wid zwjazkoweho knježerstwa wćipny. „Wšako dyrbi zwjazkowemu knježerstwu wězo tež wěstota ludźi w zwjazkowej republice na wutrobje ležeć.“ Njeńdźe wo ludźi, kotřiž su před wójnu ćěkali a maja dowolnosć tu być. Poslědnje pohódnoćenje wěstotneho połoženja w Syriskej je z lěta 2012.
Serbski aspekt kedźbyhódny
Wo pěstowanju domizny a nałožkow chcyše frakcija CDU wjace zhonić
Podstupim (SN/at). Pěstowanje domizny a nałožkow w Braniborskej je wusko ze serbskimi aktiwitami zwjazane. To wuchadźa z wotmołwy ministerki za wědomosć, slědźenje a kulturu dr. Martiny Münch (SPD) na wulke naprašowanje frakcije CDU w Krajnym sejmje Braniborskeje. Na zakładźe 45 prašenjow k wobłukam połoženje pěstowanja domizny a nałožkow, jeho česćowanje a spěchowanje, młodźinske dźěło a integracija w jeho ramiku kaž tež chroniki w kraju su sej opozicionelni křěsćanscy demokraća wotmołwy krajneho knježerstwa wuprosyli. Za wobsahi delnjołužiskeje specifiki njeje so frakcija CDU eksplicitnje zajimowała. Delnjoserbskim aktiwitam mjez 2010 a 2017 pak so ministerka kedźbyhódnje wěnuje, hačrunjež tu „jenož punktualnje informacije předleža“.
Wobšěrnosć překwapja
To a tamne (05.12.17)
Runje do wabjenskeje tafle „dele z płuna“ je chwatny šofer blisko durinskeho města Gery prasnył. 20lětny bě njedźelu wječor na zasněženej awtodróze A 4 wobstejnosćam přespěšnje jěł a kontrolu nad wozydłom zhubił, kaž policija zdźěla. Na to zrazy do tafle, zwróći so a přizemi w přirowje. Lochce zranjeneho dowjezechu jeho do chorownje, awto pak je dospołnje skóncowane.
Najsławnišeho ptaka kraja pytaja w Nowoseelandskej. Lětanja njekmany papagaj – tak mjenowany kakapo – z mjenom Sirocco je hižo něšto měsacow zhubjeny. 20 lět stare zwěrjo je na samotnej kupje doma, kotraž leži na delnim kóncu južneje kupy Nowoseelandskeje. Wšě pospyty jeho namakać wostachu dotal njewuspěšne. Trochuja, zo je scyła hišće něhdźe 150 kakapowow. Družina ma swój žiwjenski rum jeničce w Nowoseelandskej.
Ikona jednoći swědkow wěry
Drježdźany (B/SN). Jeho něhdyši sobudźěłaćerjo z biskopskeho oficialata w delnjosakskim měsće Vechta su na njedawnym wopyće Drježdźan biskopej Heinrichej Timmereversej wotchadny dar sobu přinjesli. Sotra benediktinkow Antje Eichhorn z klóštra Burg Dinklage je ikonu w tamnišej dźěłarni po ortodoksnej tradiciji w ručnym dźěle zhotowiła. Pod napisom „Što móže nas dźělić wot lubosće Chrystusa?“ předstajenaj staj swědkaj wěry z časa nacionalsocializma, zbóžnoprajeny Alojs Andricki (1914 – 1943) pódla Münsterskeho kardinala von Galena (1878 –1946).
Cyrkej Našeje knjenje wopytał
Drježdźany (B/SN). Zwjazkowy prezident Frank-Walter Steinmeier wobdźěli so na swojim nastupnym wopyće Sakskeje na nyšporje w Drježdźanskej cyrkwi Našeje knjenje. Ewangelski krajny biskop Carsten Rentzing swjećeše ekumenisku Božu słužbu hromadźe z Drježdźansko-Mišnjanskim biskopom Heinrichom Timmereversom a z fararku cyrkwje Našeje knjenje Angeliku Behnke. Z mandźelskej Elku Büdenbender zapisa Steinmeier do hóstneje knihi: „Přejemy sej měr mjez ludami a měr w nutřkownym.“
Söder ma naslědować
Mnichow (dpa/SN). Hódanje je nimo: Bayerski financny minister Markus Söder ma Horsta Seehofera w zastojnstwje ministerskeho prezidenta naslědować. Frakcija CSU w Bayerskim krajnym sejmje je 50lětneho dźensa w Mnichowje jednohłósnje za najbóle požadaneho naslědnika wuzwoliła, kaž zhoni powěsćernja dpa z kruha wobdźělnikow. Seehofer chcyše so dźensa připołdnju nastupajo swoje naslědnistwo zjawnje wuprajić.
Z Meuthenom a Gaulandom
Hannover (dpa/SN). AfD je europskeho zapósłanca Jörga Meuthena a předsydu frakcije w zwjazkowym sejmje Alexandera Gaulanda za swojeju předsydow wuzwoliła. Na swojim zjězdźe kónc tydźenja w Hannoverje je so strona z tym dalši čwak doprawa sunyła. Předsydaj škitataj eksponenta prawicarskeho křidła Björna Höcku z Durinskeje. Jako čłonka předsydstwa wobkrućena Beatrix von Storch mjenowaše kanclerku Angelu Merkel (CDU) „najwjetšu łamarku prawa němskich powójnskich stawiznow“.
Přećiwo wulkej koaliciji
Nowe wjelče postajenje w Braniborskej
Podstupim (dpa/SN). Kak z wjelkami wobchadźeć? Braniborske ministerstwo za wjesne wuwiće, wobswět a ratarstwo je tele dny we wobswětowym wuběrku krajneho sejma nowe postajenje nastupajo tak mjenowane problemowe wjelki předstajiło. Tež w Braniborskej boja so ratarjo wo swój skót na pastwje, najebać to su wjelki kruće škitane. Zadobywa-li pak so wjelk přichodnje wospjet na škitanu pastwu, abo su-li samo ludźo wohroženi, móhli jeho zatřělić.
W Braniborskej měli přichodnje hońtwjerscy wotnajerjo w najhóršim padźe na problemowe wjelki třěleć směć. Wjelče postajenje rjaduje, zo w ekstremnym padźe najprjedy městny hońtwjer tónle nadawk dóstanje, rjekny braniborski wobswětowy minister Jörg Vogelsänger (SPD) we wuběrku. Hdyž njeje zaručene, zo je wón docpějomny, kmany abo zwólniwy, měł krajny zarjad za wobswětoškit wosobu/wosoby za třělenje we wuwzaćnym padźe postajić.
