To a tamne (10.04.17)
W pasažěrskim lětadle 13 000 metrow wysoko dźowku porodźiła je 18lětna Francozowka. Wona bě minjeny pjatk z mašinu Turkish Airlines po puću z ginejskeje stolicy Conakry do Istanbula, jako so hrona započachu. Wobsadka lětadła, kotraž bě za tajke pady wukubłana, młodej žonje pomhaše. Pasažěrojo su jako dar pjenjezy za dźěćo zběrali. W interneće wozjewichu pozdźišo foto wobsadki z nowonarodźenej a tekstom „Witaj w lětadle, princesna“.
W starym přezerzawjenym horncu njezbožownje zapopadnył je so sornik w sewjerorynsko-westfalskim Wülfrathu. Žona bě jeho z horncom wokoło šije w přirowje wuhladała. Tež prědnjej noze w sudobju tčeštej, kotrež njeměješe hižo spódk. Přiwołany hajnik stary hornc z wosebitymi nožicami rozrěza a pušći sornika njezranjeneho na swobodu.
Policija dale prezentna
Budyšin (SN). Policija wostanje na Budyskich Žitnych wikach dale prezentna, zo by hrožacym zražkam mjez prawicarskimi ekstremistami a młodymi ćěkancami zadźěwała. Tole připowědźi policajski prezident Conny Stiehl na wčerawšim, mjeztym 4. Budyskim wjeršku, kotryž bě serbski zapósłanc CDU w Sakskim krajnym sejmje Marko Šiman zwołał. Wón kritizowaše, zo njeje Budyšin swoje přilubjenja dotal spjelnił, wjace socialneho dźěła w problemowych kónčinach města organizować.
Dojednanje z Grjekskej
Valetta (dpa/SN). Po tydźenje trajacych jednanjach wo dalšej pjenježnej pomocy Grjekskej su dźensa rano prěnje konkretne wuslědki docpěli. Tole wobkrućichu wobdźělnicy jednanjow powěsćerni dpa. Nětko chcedźa financnych ministrow europasma informować. W srjedźišću jednanjow stejachu dalše lutowanske naprawy grjekskeho knježerstwa a reformy, kotrež sej pjenjezydawarjo wot Athena žadaja. Naprawy su wuměnjenje dalšeje pjenježneje pomocy.
Za dalše styki z Trumpom
Bibliski a reformaciski mobil bě wčera a dźensa w Slepom. Tam je ...
Ruska zasudźa nadpad USA
Moskwa/Washington (dpa/K/SN). Raznje zasudźił je ruski prezident Wladimir Putin ameriske bombardowanje přećiwo syriskemu knježerstwowemu wójsku, mjenujo je nadpad na suwerenitu Syriskeje. „Prezident Putin ma amerisku ataku za agresiju přećiwo suwerenemu statej, přećiwo prawu ludow, a to hišće z wumysleneje přičiny“, praji rěčnik prezidenta Dmitrij Pjeskow. Syriske wójsko hižo žane chemiske brónje nima, štož je po jeho wotbrónjenju tež přisłušna mjezynarodna Organizacija za zakaz chemiskich bróni swój čas wobkrućiła.
Ruska je njesměrneje brizancy podawka dla za dźensa wurjadne schadźowanje Bjezstrašnostneje rady UNO zwołała. Nimo toho je jako reakciju na wójnske zasahnjenje Američanow, kotrež je sej po zdźělenju syriskeho wójska šěsć smjertnych woporow žadało, dojednanje z wójskom USA nastupajo zhromadne dźěło k zadźěwanju strašnych podawkow nachwilnje wusadźiło. Po hódnoćenju ruskeho wonkowneho ministerstwa je „njepřemyslene postupowanje“ USA syrisku krizu jenož pohłubšiło.
Merkel k pomocy zwólniwa
Razniše kontrole
To a tamne (07.04.17)
Swoje 105. narodniny je zróstny starc z Wulkeje Britaniskeje z jězbu na seklowatej čarje (Achterbahn) woswjećił. Jack Reynolds nastaji tak nowy Guinnessowy rekord jako najstarši pasažěr na tymle razantnym jězdźidle. Muž z Chesterfielda rady ze swojoraznymi wustupami napadnje. W oktobru stanje so prěni króć z prapradźědom. Potom chce sej zaso něšto kołwrótneho wumyslić, kaž medijam rjekny. Přichodne narodniny by raz z awtom formule 1 jěł.
Na nócnu jězbu ze swojim teptanskim traktorom podał je so pjećlětny w bayerskim Ingolstadće. Do toho bě z woknom won zalězł, bjez toho zo mać něšto pytny. Wobsadce policajskeho awta nócny pućowar napadny. Na prašenje zastojnikow, dokal chce, jimaj pjerach chroble rjekny: „K tankowni. Wolij je mi wušoł.“ Policistaj dowjezeštaj jeho domoj.
Mnohe powšitkowne wuprajenja
Wšitke frakcije Krajneho sejma Braniborskeje su sej přezjedne, zo dyrbi kraj swojej zamołwitosći za zachowanje, spěchowanje a dalewuwiće delnjoserbšćiny wotpowědować. Na zhromadne wobzamknjenje pak njemóžachu so na wčerawšej debaće dojednać.
Podstupim (SN/at). Z hłosami koaliciskeju frakcijow SPD a Lěwicy je krajny sejm wčera wot wobeju zapodaty rozsudźenski namjet „Delnjoserbšćinu jako wot wotemrěća wohroženu mjeńšinowu rěč zachować a wožiwić“ schwalił. Wot frakcijow CDU a Zwjazka 90/Zelenych předpołoženy namjet „Serbšćina ma so zachować“, kotryž podpěrachu tež dalši zapósłancy opozicije, njeje trěbnu wjetšinu docpěł. Wuchadźišćo toho je zwada nastupajo minimalnu wulkosć wuknjenskeje skupiny w serbskej a bilingualnej wučbje w referentowym naćisku za nowe serbske šulske postajenje w Braniborskej.
Wo wuwiću jara pozitiwnje překwapjeny
Budyšin (SN/JaW). Zapósłanc zwjazkoweho sejma a čłon jeho etatoweho wuběrka dr. Reinhard Brandl (CSU) je wčera a dźensa Serbow wopytał. Přeprosyła bě jeho rozžohnowaca so zapósłanča zwjazkoweho sejma Marja Michałkowa (CDU). „Pozadk přebytka je, zo by so wón ze serbskimi institucijemi a wšitkim, štož nas wučinja, wosobinsce zeznajomił. Ja wšak hižo njekandiduju a njebudu z nim wjac hromadźe dźěłać. Tuž je wažne, zo wón wě, wo čo dźe“, Michałkowa rozłoži. Dr. Brandl dźě je w etatowym wuběrku zamołwity za pjenjezy zwjazkoweho nutřkowneho ministerstwa a tuž tež za spěchowanje Załožby za serbski lud.
Xi Jinping pola Trumpa
Washington (dpa/K/SN). Dźensa zetkataj so dwaj tuchwilu najmócnišej mužej swěta. W swojim priwatnym domicilu na Floridźe přijmje ameriski prezident Donald Trump prezidenta Chiny a stronskeho šefa Xi Jinpinga. Zasćinjeny je dwaj dnjej trajacy wjeršk wot napjatosćow, wuskutkowanych wot trajnych raketowych testow Sewjerneje Koreje. Wčera bě Trump znowa z němskej kanclerku Angelu Merkel (CDU) telefonował. Rěčałoj staj wonaj wo konflikće na wuchodnej Ukrainje kaž tež wo połoženju w Afghanistanje, rěka k tomu z Běłeho domu.
Tójšto „mortwych dušow“
Běłohród (dpa/SN). Při prezidentskich wólbach w Serbiskej měješe minjenu njedźelu po informacijach medijow znajmjeńša 800 000 njeeksistowacych ludźi wólbne prawo. W balkanskim kraju je 5,9 milionow połnolětnych. We wólbnym registru zapisanych pak bě 6,7 milionow, kaž nowina Blic rozprawja. Jeničce w stolicy bydleše 23 wosobow, rodźenych w 19. lětstotku. Młodźi ludźo demonstruja mjeztym hižo třeći dźeń přećiwo ministerskemu prezidentej Aleksandarej Vučićej, kiž bě wólby po jich měnjenju tež z pomocu „mortwych dušow“ jasnje dobył.
