To a tamne (13.12.17)
Z njewšědnje wjele njetopyrjemi bědźa so wobydlerjo awstralskeho městačka Charters Towers. Wjace hač 200 000 sobu najwjetšich njetopyrjow swěta je wobydlerjam na sewjerowuchodźe kontinenta napadnyło, rjekny měšćanostka Elizabeth Schmidt powěsćerni dpa. Ze swojimi křikami w tuchwilnym času porowanja njedadźa wone ludźom žanoho měra. Wšudźe nimo toho grawoćiwje smjerdźi, a ludźo njemóža sej samo dowolić raz do zahrodki hić.
Pozdatny zadobywar je so w delnjosakskim Stolzenauwje pola Nienburga jako spanski hósć dźowki wopokazał. Wobsedźerka bě policiju wołała, wuhladawši doma na chódbje w nocy naraz čornozdrasćeneho muža. Kaž policija rozprawja, so njeznaty na to z woknom zminy, swoje črije pak je w chwatku před łožom lubki stejo wostajił.
Demonstruja přezjednosć
Drježdźany (dpa/SN). Do jutřišeho wuzwolenja Michaela Kretschmera (CDU) za noweho ministerskeho prezidenta Sakskeje demonstruje čorno-čerwjena koalicija přezjednosć. Koaliciski wuběrk je so wčera na wozjewjenje wotpohlada nastupajo přichodne dźěło dorozumił. Na nje ma so stodnjowski program Kretschmera z ćežišćemi kubłanje, wěstota a zhromadne dźěło z komunalnej runinu, ale tež infrastruktura a politiske kubłanje zepěrać, kaž wobě stronje zdźělatej.
Misija wo tři měsacy podlěšena
Berlin (dpa/SN). Zwjazkowy sejm je dźensa tomu přihłosował, antiterorowu misiju Zwjazkoweje wobory w Srjedźnym morju „Sea Guardian“ wo tři měsacy podlěšić. 530 zapósłancow hłosowaše za to, 137 přećiwo tomu, štyrjo so hłosa wzdachu. Misija NATO słuži wobstražowanju mórskeho ruma a bojej přećiwo terorizmej. Z łódźow a lětadłow čłonskich statow zestaja swójski wobraz połoženja w srjedźomórskim rumje. 175 němskich wojakow je tuchwilu wobdźělenych.
SPD: Nowy model wobdźělenja
Zeleni: Podpěruja kandidatku z Braniborskeje
Budyšin (SN/at). Annalena Baerbock kandiduje za zastojnstwo zwjazkoweje předsydki Zwjazka 90/Zelenych. Strona woli klětu w januarje nowe dwójne čoło, a dotalny předsyda Cem Özdemir znowa njekandiduje. Wo wakantne městno prócuje so braniborska zapósłanča zwjazkoweho sejma, dokelž paruje žony w načolnych pozicijach. Dalšu kandidaturu je schleswigsko-holsteinski wobswětowy minister Robert Habeck přizjewił.
Mjez hornjołužiskimi Zelenymi nazhonjataj wobaj kandidataj sympatiju a podpěru. Wobaj staj zastupjerjej politiskeho stila, kotryž móhł nowoprofilowanju ekostrony přewšo wužitny być, kaž bě zhonić. Wjeselo je wosebje wulke, zo pochadźa kandidatka z Braniborskeje. Tam je Annalena Baerbock naposledk napadnyła, zo bě jej energijowy koncern LEAG wuprajene přeprošenje za Borboriny swjedźeń zaso cofnył. Wona je znajerka połoženja we Łužicy a mjenuje w zwisku ze swojim požadanjom „wobmjezowanje klimoweje krizy za Zelenych najwjetše wužadanje přichoda“.
Ma podpěru z Łužicy
Sym podpisał, dokelž ...
... su narodne a rěčne mjeńšiny wěrne pokłady w Europskej uniji, kotrež mamy intensiwnje hajić. Porjadne zeznawanje tychle pokładow móže sylnišo přinošować spěchowanju kubłanja a kultury w nowej Europje regionow. W našej kónčinje Łužicow w Němskej, Pólskej a Čěskej matej serbska rěč kaž tež serbska kultura na zbožo hišće zwjazowacu móc. Ju njemóžemy tež při pytanju za našej šleskej identitu jednorje wuwostajić a wuspinkować. Jako čestny ryćer Šleskeje towaršnosće rjadu johanitow tole stajnje znowa na zetkanjach z ludźimi w Šleskej, Pólskej a tež w Čěskej a přeco z wulkej radosću dźakownje zwěsćam. Tuž Minority SafePack podpěruju!
To a tamne (12.12.17)
Wosrjedź Rennsteigoweho tunla na awtodróze A 71 staj so njedźelu wječor šoferaj do włosow dóstałoj. Kaž durinska awtodróhowa policija zdźěla, je jedyn tamneho pola Gräfenrody wuspinał. Na to staj wobaj wozydło wopušćiłoj, do so biłoj a dale jěłoj. To wšo je jenož někotre mjeńšiny trało a njebě žadyn „bój w dźewjeć kołach“. Wobchad w tunlu bě přiwšěm krótki čas přetorhnjeny. Swědcy su zastojnikow informowali.
Zo by ludźi k tomu pohnuł mobilny telefon wužitnje nałožować, farar Alessandro Palermo na italskej kupje Sicilskej tež handyje žohnuje. Wěriwi měli na jutřišim dnju swj. Lucije swój mobilny telefon do cyrkwje San Matteo w měsće Marsala sobu přinjesć, piše farar w socialnych syćach. „Towaršnosć wotwisuje wot handyja, runočasnje pak nochce rozumić, kak maš jón wužiwać.“
Z młodym wobličom na čole
Sakska CDU poda so z předsydu Michaelom Kretschmerom na puć z krizy
Lubij (SN/at). Sakska CDU hlada doprědka a chce sej z 90 procentow hłosow nowowuzwolenym krajnym předsydu Michaelom Kretschmerom a z připowědźenymi korekturami minjene lěta zworanych zmylkow hač do wólbow komunal- nych parlamentow kaž tež Sakskeho krajneho sejma w lěće 2019 zhubjenu dowěru wobydlerjow wróćo zdobyć.
Žadyn měr na Ukrainje
Paderborn (B/SN). Po posudku ukrainskeje katolskeje cyrkwje nima Ruska žadyn zajim za měr w tymle kraju. „Dołhož je njeměr na Ukrainje, wostanje puć do Europy zawrjeny“, měni tamniši biskop Stanisław Szyrokoradiuk. Ukrainscy wojacy maja wšědnje wopory, za kotrež so kóždy tydźeń we wosadach modla.
Z bamžom wobjedowali
Vatikan (B/SN). Gnocchi a tiramisu z bamžom: Na prěnim swětowym dnju chudych je Franciskus z 1 500 potrěbnymi w awdiencnej hali wobjedował. Na Božej mši do toho zasudźi wón bjezčućiwosć a liwkosć chudym napřećo. „Ničo za chudych nječinić je wulki hrěch“, swjaty wótc wuzběhny.
Wěčne sluby jako mnich złožił
Mühlhausen (B/SN). Frank-Ignazio Hebestreit je w Assisiskej bazilice wěčne sluby jako mnich złožił. Frank Hebestreit z katolskeje wosady Mühlhausen je na Teologiskej wyšej šuli Eichstätt filozofiju studował a po tym promowował. Pozdźišo studowaše katolsku teologiju. Dalši puć wjedźeše jeho do italskeho Assisija. Tam zastupi před pjeć lětami do rjadu franciskanow.
Wo reformaciji rěčeli
Rada za serbske naležnosće za inicitatiwu
Drježdźany (SN/bn). Na posedźenju Sakskeje Rady za serbske naležnosće minjeny pjatk su čłonojo gremija cyłkownje štyri dnjowe dypki wobjednali.
Manfreda Hermaša (CDU) wuzwolichu za noweho městopředsydu. Naslědnik Hubertusa Ryćerja, kiž běše zastojnswo strowotniskich přičin dla złožił a radu wopušćił, je nětko Chróšćanski wjesnjanosta Marko Kliman (CDU). Wón zastupuje serbske komuny.
Pro a kontra w CDU
Berlin (dpa/SN). Pozicija w CDU nastupajo móžne mjeńšinowe knježerstwo je dosć rozdźělna. Městopředsyda zwjazkoweje CDU a sewjerorynsko-westfalski ministerski prezident Armin Laschet njeje do srjedowneho zetkanja z SPD jenož wot njeje žadane wobydlerske zawěsćenje wotpokazał, ale tež mjeńšinowe knježerstwo. Za tajke bě so čłon zwjazkoweho předsydstwa CDU Jens Spahn wuprajił, zwrěšća-li rozmołwy z SPD.
Netanjahu w Brüsselu
Brüssel (dpa/SN). Israelski knježerstwowy šef Benjamin Netanjahu je do swojeho zetkanja z wonkownymi ministrami EU dźensa w Brüsselu staty Europskeje unije namołwił, přikład USA sćěhować a Jerusalem jako stolicu Israela připóznać. Wonkowna społnomócnjena EU Federica Mogherini porno tomu wujasni, zo jednostronske připóznaće Jerusalema jako stolicy Israela do prašenja njepřińdźe. Konflikt dyrbja z jednanjemi rozrisać, zaměr je dwustatowe rozrisanje, při čimž móže Jerusalem stolica wobeju stron być.
Nacionalisća na Korsice dobyli
