Budapest (dpa/K/SN). Dźeń po njepłaćiwym referendumje wo kwotach EU pola ćěkancow je madźarski premier Viktor Orbán hladajo na wulki podźěl wotpokazowacych hłosow swoje spokojenje wuprajił. „Woprašowanje ludu je swój zaměr docpěło“, wón wčera w parlamenće rjekny, přispomnjejo, zo bě „cil, wěrnosć zhonić“. Při wotumje su 40,4 procenty wolerjow płaćiwy hłós wotedali. Z nich su 98,3 procenty – 3,3 miliony ludźi – z „ně“ na prašenje wotmołwili, hač směła EU bjez přihłosowanja madźarskeho parlamenta krajej přidźělić požadarjow azyla. Za płaćiwosć referenduma pak by znajmjeńša 50 procentow wólbokmanych dyrbjało płaćiwy lisćik wotedać. Opozi­cija ma wotum za zwrěšćeny.

Běła Woda (AK/SN). Město Běła Woda dyrbi z dalšimi masiwnymi poćežowanjemi swojeho etata ličić. Tak ma energijowemu koncernej Vattenfall z dawkowych dochodow lěta 2010 šěsćcyfrowu sumu wróćić. Nimo toho dyrbi nimale šěsćcyfrowu sumu jeničce z danjow wróćić. „Tole naše financne połoženje chětro pohubjeńša“, rjekny wyši měšćanosta Torsten Pötzsch (Klartext) na minjenym posedźenju měšćanskeje rady. Što budźe z lětom 2012 a dalšimi lětami, tuchwilu ani hišće njewědźa. Dotal je jenož jasne, zo ma Běła Woda Vattenfallej něhdźe dźesać milionow eurow wróćo płaćić. Najwjetši dźěl je wona po słowach wyšeho měšćanosty hižo přepokazała. Připokazanki swobodneho stata njemóža tute wudawki narunać. Te so mjenujcy na aktualnej ličbje wobydlerjow orientuja, kotraž spochi woteběra. Dokelž bě ličba wobydlerjow tehdy hišće wo wjele wjetša, móža aktualne připokazanki runje 60 do 70 procentow narunać, Pötzsch rozjasni.

Serbja na swjatočnosćach dnja jednoty w Drježdźanach zastupjeni byli

Drježdźany (SN/MkWj). Na swjatočnosće składnostnje Dnja němskeje jednoty běchu tež Serbja oficialnje do Drježdźan přeprošeni. Jich zastupowaštaj lětsa předsyda Domowiny Dawid Statnik a nawodnica Budyskeho Serbskeho muzeja Christina Boguszowa, kaž Dawid Statnik Serbskim Nowinam zdźěli. Tak wobdźělištaj so wobaj na ekumeniskej Božej słužbje a na swjedźenskim zarjadowanju w Semperowej operje. Po tym pobyštaj tež na přijeću zwjazkoweho prezidenta Joachima Gaucka w kongresowym centrumje w susodstwje Sakskeho krajneho sejma. Tam měješe předsyda Domowiny składnosć, z prezidentom zwjazkoweho sejma Norbertom Lammertom porěčeć, kiž bě swjedźensku narěč dźeržał. Statnik přeprosy Lammerta w tym zwisku na wopyt do Budyšina, kaž našemu wječornikej rjekny. Serbsku kulturu prezentowachu w sakskej krajnej stolicy wjacore folklorne skupiny, mjez druhim z Brětnje, Ćiska a Choćebuza.

Budyšin (CS/SN). Wiceprezidentka zwjazkoweho sejma Claudia Roth (Zeleni) je we wobłuku swjatka němskeje jednoty njedźelu Budyšin wopytała. W tamnišim „zelenym wobchodźe“ zetka so wona ze Svenom Scheidemantelom z towarstwa Budyšin wostanje pisany, z wokrjesnym předsydu Zelenych Jensom Bitzku, ze sakskim krajnym předsydu strony Jürgenom Kasekom a z bywšim předsydu Domowiny Janom Nukom. Kaž Roth rjekny, chcyše wona wědźeć: „Što so poprawom w Sakskej stawa?“ Předewšěm pak so prašeše, čehodla sej sakske knježerstwo tak ćežko čini přiznać, zo su problemy z prawicarskim radikalizmom. Politikarka chcyše zdobom wědźeć, kak móhło zwjazkowe knježerstwo pomhać. K tomu měještaj Scheidemantel a Kasek konkretne próstwy. Tak je wjac podpěry za čestnohamtske skutkowanje trjeba. Projekty měli wobstajnje spěchowane być. Žadali su sej wjac politiskeho kubłanja na šulach. Kritizowali su přitomni tež, zo je policija podwobsadźena a přešpatnje wuhotowana.