Merz wostawa njepowalny
Předsyda CDU a kanclerski kandidat unije swoju politiku zakituje
Berlin (dpa/SN). Kanclerski kandidat CDU/CSU Friedrich Merz wostawa hladajo na trajace demonstracije přećiwo zhromadnemu wothłosowanju unije z AfD k přiwótřenju migraciskeje politiki njepowalny. „Bjeru to jara chutnje. Tola jako poslednja zbywaca ludowa strona njedamy so wot demonstrantow z našeho puća zwjesć“, rjekny předsyda CDU nowinarjam. Přemóžace wjetšina wobydlerjow Němskeje ma kurs unije za prawy, je sej wón wěsty.
Merza kritizuja, dokelž je minjeny tydźeń w zwjazkowym sejmje akceptował, zo dóstanje jeho pjeć dypkow wobsahowacy naćisk z pomocu AfD wjetšinu hłosow. Minjeny pjatk bě naćisk najebać přihłosowanje AfD zwrěšćił, dokelž njeběchu so mnozy zapósłancy unije a FDP na wothłosowanju wobdźělili.
Rozsud njezadźiwa
To a tamne (06.02.25)
Januar 2025 bě po klimowej rozprawje najćopliši, kotryž su hdy naměrili. Globalna temperatura wučinješe 13,23 stopnjow a tak 1,75 stopnjow nad niwowom doindustrijneho časa, zdźěla słužba za klimowu změnu programa EU Copernicus w britiskim Readingu. „Januar bě dalši překwapjacy měsac a z rekordnymi temperaturami pokročuje, kotrež minjene lěta wobkedźbujemy“, zdźěli rěčnica centruma. Daty zběrali běchu satelity, łódźe, lětadła a wjedrarnje po wšěm swěće.
Ličba wobchadnych haćenjow na awtodróhach Němskeje je znowa přiběrała. W swojej bilancy za lěto 2024 naliči ADAC cyłkownje 516 000 haćenjow, 12 000 wjace hač lěto do toho. Haćenja trajachu cyłkownje 448 000 hodźin a so na 859 000 kilometrach rozpřestrěwachu. To je puć hač na měsačk a zaso wróćo. Hłowna přičina je přiběraca ličba awtow.
Smochčanski dom so dale a bóle na hotel wuwiwa
Smochćicy (CS/SN). Nowe lěto je so w Smochčanskim kubłanišću swjateho Bena nawodnistwo změniło. Tola nic jenož to. Kubłanišćo so znowa orientuje, štož so tež w funkciji nawodnistwa wotbłyšćuje. Hač do 31. decembra je Sebastian Kieslich jako rektor skutkował. W přichodźe tam žanoho rektora wjace nimaja. Nowa šefina mjenuje so „jednaćelka za hotelowy management“. Sybille Richards, kotraž je we Wulkim Wjelkowje wotrostła, nadawk přewza. Wčera ju biskop Drježdźansko-Mišnjanskeho biskopstwa Heinrich Timmerevers witaše. Wón skedźbni na wužadanja, kotrež ma Sybile Richards zmištrować. Přetož kaž wšudźe ma tež katolska cyrkej z wyšimi kóštami wojować.
Scholz chce z CDU/CSU dźěłać
Marl (dpa/SN). Zwjazkowy kancler Olaf Scholz (SPD) tež po wjele diskutowanych naćiskach unije k migraciskej politice w zwjazkowym sejmje zhromadne dźěło z CDU a CSU po wólbach 23. februara njewuzamkuje. Jeho zasadne stejišćo stajnje bě: „Žane zhromadne dźěło z AfD“, rjekny Scholz na zarjadowanju wólbneho boja w Poruhrskej. Wšitko druhe je móžne, byrnjež tež druhdy ćežke a komplikowane było, tak Scholz. Wo tym rozsudźić pak chcedźa po wólbach.
Wjace nadpadow na strony
Berlin (dpa/SN). Wot nadpadow na čłonow a běrowy politiskich stron běchu Zeleni loni najbóle potrjecheni. Tole wuchadźa z wotmołwy zwjazkoweho nutřkowneho ministerstwa na naprašowanje frakcije AfD w zwjazkowym sejmje. Cyłkownje su nadpady 2024 po dotalnym ličenju najwyši staw minjenych šěsć lět docpěli. Zličili su loni 635 padow, na přikład wobškodźenja stronskich twarjenjow. 3 964 zastupnikow stron bě wot namocy a ranjenjow potrjechenych.
Prěni jeći do Guantánamo
Ze swěčkami wopominaja ludźo w šwedskim měsće Örebro wopory ...
Zelenskyj chcył z Putinom rěčeć
Štyrjo kandidaća před kameru RTL
Trump chce Gazaske pasmo přewzać
Washington (dpa/SN). Prezident USA Donald Trump chcył ameriskich wojakow do Gazaskeho pasma pósłać, zo by zničenu kónčinu nad Srjedźnym morjom přewzać a zaso natwarić móhł. „Činimy, štož je trjeba“, rjekny wón na nowinarskej konferency po rozmołwje z israelskim ministerskim prezidentom Benjaminom Netanjahuwom. Žurnalist bě so Trumpa prašał, hač by tež wojakow USA do Gazaskeho pasma pósłał, zo by wěstotny wakuum pjelnił. „Hdyž je trjeba, potom to činimy.“ Wón liči z dołhodobnym zasadźenjom USA w regionje.
Do toho bě Trump připowědźił, zo chcyli USA kontrolu w Gazaskim pasmje přewzać a wot wójny zničenu kónčinu hospodarsce zaso natwarić. Tam bydlacych Palestinjanow chce wón přesydlić. Netanjahu plan podpěrowaše. Akcija Trumpa Bliski wuchod změni a regionej měr přinjese, je sej wón wěsty. Islamistiska Hamas, kotraž ma podpěru mnohich Palestinjanow a druhich arabskich statow, wumjetowaše Trumpej „rasizm“.
