Zaso rjećaz ludźi w Drježdźanach
Drježdźany (dpa/SN). Z rjećazom ludźi chcedźa na 80. róčnicu zničenja Drježdźan w Druhej swětowej wójnje zaso sylne znamjo na dobro wujednanja a zhromadnosće w měsće nad Łobjom sadźić. Pod hesłom „Dopominać so za přichod zhromadnosće w měrje a demokratiji“ namołwjeja zastupnicy ciwilneje towaršnosće wobydlerjow, so 13. februara w bohatej ličbje na lětušim dnju wopominanja wobdźělić. Wyši měšćanosta Dirk Hilbert (FDP) apeluje, so runje hladajo na tuchwilnu wójnu w Europje „aktiwnje“ za to zasadźić.
Organizatorojo so nadźijeja, zo sej tónle wječor kaž hižo w zašłosći něhdźe 10 000 ludźi ruce zawdawa, zo bychu nutřkowne město symbolisce wobjimali a tak politiskemu znjewužiwanju wopominanskeho dnja zadźěwali. Hinak hač dotal powjedźe čłowjeski rjećaz lětsa jenož po starym měsće, dokelž w septembrje sypnjeny Carolowy móst za zwučene přeprěčenje Łobja na nowoměšćansku stronu pobrachuje. Britiske a ameriscy bombowcy běchu kulturne město 13. februara 1945 a dny po tym w dalokej měrje zničili. 25 000 ludźi při tym zahiny.
Nowu dróhu w lěću dotwarja
To a tamne (20.01.25)
Dopomnjenki bywšeje zwjazkoweje kanclerki Angele Merkel „Swoboda“ dale derje předawaja. Nakładnistwo Kiepenheuer & Witsch rozprawja wo 12 000 eksemplarach tydźensce, štož je dwaj měsacaj po wuchadźenju knihi „sensacionalne“. W knize zhladuje 70lětna bywša kanclerka na lěta swojeho skutkowanja. Kniha bě 26. nowembra wušła. W Němskej su hač do hód 600 000 eksemplarow předawali, nakładnistwo zdźěla.
Zhubjeny kocor Aramis je zaso wróćo na kupje Sylt. Dowolnik bě zwěrjo do Serwjerorynsko-Westfalskeje sobu domoj wzał, dokelž měješe je za wosamoćene. Skótny lěkar pak namaka chip pod kožu kocora a tak wobsedźerja zwěsći. Po spočatnych njedorozumjenjach z namakarjom su so na to jednali, zo Aramisa swojemu wobsedźerjej wróća. Tón kocora přewšo zbožowny doma witaše.
Habeckowy namjet šwikaja
Berlin (dpa/SN). Namjet zwjazkoweho hospodarskeho ministra Roberta Habecka (Zeleni), kapitalne wunoški k financowanju socialnych systemow wužiwać, dale kritizuja. Generalny sekretar SPD Matthias Miersch Habeckej wumjetuje, zo je ze swojim „dospołnje njewuzrawjenym namjetom“ mjez ludźimi „masiwne njewěstosće“ zawinował. „To je typiski Habeck“, rjekny Miersch hladajo na druhe namjety kanclerskeho kandidata Zelenych.
Prawiznicy Nawalnyja zasudźeni
Moskwa (dpa/SN). Ruske sudnistwo je třoch prawiznikow lěta 2024 w jastwje zemrěteho ruskeho opozicionelneho Alekseja Nawalnyja k wjelelětnemu jastwu zasudźiło. Sudnistwo wumjetowaše prawiznikam sobudźěło w ekstremistiskej organizaciji. Hłowny zakitowar Wadim Kobsew dyrbi pjeć a poł lěta do jastwa. Prawiznik Alexej Lipzer dósta pjeć a Igor Sergunin tři a poł lěta jastwa.
Prezident nochce ničo rjec
W Južnej Africe je wuchowanska słužba za hórnikow minjene dny z ...
Na přiměr w Gazy so dojednali
Žadyn dalši pad pochromy
Berlin (dpa/SN). Podhlad dalšeho pada pochromy we wokrjesu Barnim w Braniborskej njeje so wobkrućił. Tole zdźěla zwjazkowy minister za ratarstwo Cem Özdemir (Zeleni). „Aktualnje njeje žanoho dalšeho pozitiwneho pada tuteje mrětwy“, rjekny Özdemir dźensa rano w rozhłosu.
Fachowcy Friedricha-Löffleroweho instituta běchu minjenu nóc podhladny material přepytowali. Potrjechena koza njeměješe pochromu, minister zdźěla. Němska drje z tym wot mrětwy wuswobodźena njeje, pochroma pak njeje so hač do dźensnišeho dale rozpřestrěwa, Özdemir doda.
Podhladny pad běchu předwčerawšim, srjedu, w Barnimskim wokrjesu zwěsćili. Wot potrjechenych zwěrjatow su hnydom proby brali a do instituta dowjezli. Minjeny tydźeń bě so pochroma prěni króć po 35 lětach zaso w Němskej jewiła. Chorosć je za skót jara natykliwa.
Ruska a Iran partneraj
Moskwa/Teheran (dpa/SN). Ruska a Iran stej dźensa zrěčenje wo wobšěrnym strategiskim partnerstwje za přichodne 20 lět podpisałoj. Zrěčenje wopřija 47 artiklow a rjaduje zhromadne dźěło wobeju krajow na polu wojerstwa, politiki, wikowanja, slědźenja, kubłanja a kultury. Fachowcy maja zrěčenje tež za reakciju na politisku izolaciju wobeju krajow, kotraž bě po nadpadźe Ruskeje na Ukrainu widźomnje přiběrała.
Iran je w tym zwisku zdźělił, zo njewobsahuje zrěčenje žadyn wotrězk nastupajo mjezsobnu pomoc w padźe nadpada. Iran je kmany, swoju wěstotu sam zaručić, w Teheranje rěkaše. Knježerstwo USA bě wospjet zdźěliło, zo ma Iran za hłowneho njepřećela na Bliskim wuchodźe.
Scholz wotpinjenje zakitował
Berlin (dpa/SN). Zwjazkowy kancler Olaf Scholz (SPD) je w přepytowanskim wuběrku zwjazkoweho sejma wo zawrjenju jadrowych milinarnjow rozsudy z lěta 2022 zakitował. „Z atomowej energiju přestać bě prawje“, wón rjekny. Wjelelětne podlěšenje dźěłoweho časa tutych milinarnjow by přećiwo konsensej předchadźacych zwjazkowych knježerstwow było, kancler potwjerdźi. Zdobom bě wón w oktobru 2022 po rozmołwje z wobhospodarjemi atomowych milinarnjow a ministerstwami dopóznał, zo je zmysłapołne atomowe milinarnje hišće hač do apryla 2023 dale wužiwać, zo by zastaranje kraja z energiju zaručene było. Pruwowanje nastupajo zawrjenje tutych milinarjow bě po jeho słowach dospołnje neutralne.
Runje na tym kritikarjo w rjadach CDU/CSU, AfD a FDP dwěluja. Woni Scholzej, hospodarskemu ministrej Robertej Habeckej a wobswětowej ministerce Steffi Lemke (wobaj Zeleni) wumjetuja, zo su jadrowe milinarnje z ryzy ideologiskich přičin zawrěli.
Dubajsku šokolodu přepruwuja
Drježdźany (dpa/SN). Po prěnich wuslědkach přepytowanjow tak mjenowaneje Dubajskeje šokolody w Badensko-Württembergskej chcedźa za wěstotu žiwidłow zamołwite zarjady w Sakskej słódkosć tohorunja dokładnišo přepytować. Pječa maja přičinu za wotpowědne kontrole, socialne ministerstwo na naprašowanje medijow zdźěli. „Zamołwite zarjady, kotrež wěstotu žiwidłow dohladuja, smy wo tym informowali“, w zdźělence rěka. Dotal pak hišće žane proby w krajnym přepytowanskim instituće nimaja. Tuž wokomiknje tež žane wuslědki njepředleža, ministerstwo zdźěla.
Přepytowanja w Badensko-Württembergskej běchu wunjesli, zo su w někotrych taflach šokolody palmowy wolij město kakawoweje butry wužiwali, dokelž je to za producenta tuńše. Nimo toho běchu informacije wo wobstatkach na zapakowanjach njedospołne. Za alergikarjow móhło tole chutny riziko być. W jednej z probow běchu samo plěsniwc w pistacijowej kremje namakali.
