Wjace bjezdźěłnych w Sakskej
Drježdźany (dpa/SN). Ličba bjezdźěłnych w Sakskej je w januaru na 149 000 rozrostła. To je 9 000 (plus 6,4 procenty) wjace hač w decembru a něhdźe 8 000 wjace hač před lětom, regionalna direkcija Zwjazkoweje agentury za dźěło zdźěli. Kwota bjezdźěłnosće wučinja sydom procentow a je najwyša po lěće 2017. Tehdy zwěsćichu 7,3 procenty. Wosebje jasny je rozrost bjezdźěłnosće w Lipsku (plus 14,4 procenty), w Drježdźanach (plus 9,9 procentow) a w Zhorjelcu (9,4).
NATO ma poskitk Trumpej
Brüssel (dpa/SN). We wobłuku NATO planuja, prezidentej USA Donaldej Trumpej rozšěrjenu wojersku prezencu w Arktice poskićić. Kaž powěsćernja dpa zhoni, chcedźa w Brüsselu po tutym puću diskusiju wo přisłušnosći Grönlandskeje k Danskej złahodnić. Trump bě připowědźił, zo chcył sej Grönlandsku přiswojić, dokelž trjebaja USA kupu za swoje narodne wěstotne zajimy. Tole móhli ze sylnišej prezencu NATO w tutej kónčinje narunać, su sej w Brüsselu wěsći.
Maćerny škit tež po parodźe
Jara wutrobnje su wčera w Gazaskim pasmje dalšich Palestinjanow ...
UNRWA najebać zakaz dale dźěła
New York/Jerusalem (dpa/SN). Najebać wot Israela wukazaneho zakaza dźěła za palestinski pomocny skutk UNRWA organizacija dale dźěła. Wot UNO załožena organizacija poskićuje dale pomoc a posłužby. Kliniki UNRWA po wšěm Kraju zapadnje Jordana a we wuchodnym Jerusalemje su dale wotewrjene, zdźěla rěčnik generalneho sekretara António Guterresa, Stéphane Dujarric. Tež w Gazaskim pasmje Palestinjanam dale pomhaja.
Po woli Israela by UNRWA wčera swoje dźěło skónčić dyrbjała. Israel pomocnemu skutkej wumjetuje, zo su jeje sobudźěłaćerjo terorowi aktiwisća Hamas. Israelski parlament bě UNRWA wot 30. januara dźěło zakazało a sobudźěłaćerjow namołwjało, kraj wopušćić.
Zapisnikaj lětadła namakali
Washington (dpa/SN). Po lětadłowym njezbožu we Washingtonje su wobaj zapisnikaj w znjezboženym lětadle namakali, kotrež bě po zražce do rěki Potomac padnyło. Přepytowanski zarjad NTSB chce daty nětko wuhódnoćić. Fachowcy wočakuja wot datow zapisnikow dopóznaća wo přičinach njezboža. Zapisnikaj składujetej wšitke techniske daty kaž tež wšitko, štož je so w cockpiće rěčało. Pasažěrska mašina ze 64 ludźimi bě srjedu wječor njedaloko mjezynarodneho lětanišća w powětře do helikoptera wójska zrazyła. Wobě mašinje padnyštej do rěki. Pomocnicy su mjeztym něhdźe 40 ćěłow z Potomaca wućahnyli. Zymneje wody dla su wčera pytać přestali.
Po prěnich dopóznaćach njeje helikopter runje tak wysoko lećeć směł kaž pasažěrske lětadło. By-li wón předpisanu wysokosć dodźeržał, njeby k zražce dóšło. Čehodla je helikopter přewysoko lećał, chcedźa nětko zwěsćić.
Friedman CDU wopušćił
Frankfurt n. M. (dpa/SN). Publicist a moderator Michel Friedman (68) je po zhromadnym přihłosowanju CDU/CSU a AfD k naćiskej k migraciskej politice CDU wopušćił. „Njejsym wjace z čłonom CDU“, rjekny bywši městopředsyda Centralneje rady Židow w Němskej Hessenskemu rozhłosej. Hladajo na wothłosowanje w zwjazkowym sejmje předwčerawšim, srjedu, Friedman rjekny: „Prěni króć je demokratiska strona, w tymle padźe moja CDU, zmóžniła, zo je AfD wjetšinu z tutej demokratiskej stronu přesadźiła. Tutón łamk je njewodajny.“
Srjedu bě zwjazkowy sejm wot kanclerskeho kandidata CDU/CSU předstajeny naćisk k přiwótřenju migraciskeje politiki z hłosami unije, FDP a AfD schwalił.
SPD pruwuje sudnisku skóržbu
Berlin (dpa/SN). Socialdemokratiska strona Němskeje chce přećiwo nowemu zakonjej k wobmjezowanju migracije před Zwjazkowym wustawowym sudnistwom w Karslruhe skoržić, dyrbjałoj-li jón Zwjazkowy sejm a Zwjazkowa rada doskónčnje schwalić. Wot CDU/CSU planowane přiwótřenje migraciskich prawidłow měli so „wustawoprawnisce pruwować“, rjekny generalny sekretar SPD Matthias Miersch powěsćerni dpa. „Tuž wužiwamy swoje zakońske prawo, tež tutón puć kročić.“
Zwjazkowy sejm je dźensa wo dalšich zakonskich změnach migraciskeje politiki wothłosował. AfD, FDP a BSW su do toho hižo signalizowali., zo naćiskej přihłosuja. Unija ma z tutymi stronami wjetšinu w Zwjazkowym sejmje.
Z nowym zakonjom chcedźa dotalnu praksu změnić, zo smědźa swójbni ćěkancow tohorunja do Němskeje přićahnyć. To su častodosć wójnscy ćěkancy, na přikład ze Syriskeje. SPD so nowemu rjadowanju spjećuje. Tež zwjazkowy kancler Olaf Scholz (SPD) zakoń kritizuje.
Wuměłc Hans Joachim Klei zemrěł
Wón bě moler zhubjenych idylow: Hans Joachim Klei, domizniski slědźer a lajski wuměłc z Běłeje Wody, zemrě 26. decembra 2024. Jeho wotkazanje wobjimuje něhdźe 800 wolijowych mólbow z motiwami Mužakowskeje hole, wosebje z něhdyšeho přirodoškitneho pasma Pralěs Běła Woda z přimjenom Zwěrjenc, kotrež brunicy dla wotbagruja. Něhdyši hońtwjerski paradiz wjercha Pücklera ze sta lět starymi štomami, hońtwjerskim hrodom, wobhrodźenjom a wrotami jenož hišće na tutych wobrazach eksistuje.
Žane kórki wjace z Gólišyna
To a tamne (31.01.25)
15 000 eurow je dźěćo w šulskej zahrodźe w Kölnje namakało. Hólc bě z łopatku w kašćiku sadźenkow rył a wjazmo 50eurowskich bankowkow namakał. Pjenjezy ležachu w kwětkacym kašćiku a běchu z pjeršću pokryte. Nawodnica šule zawoła na to policiju. Wotkal pjenjezy pochadźeja, policija njewě. „Njewupada pak za tym, zo je něchtó pjenjezy mylnje zhubił.“ Dokelž móhło so tež wo kriminelny pozadk jednać, su pjenjezy Kölnskemu běrowej za namakanki přepodali.
Bencin za jedyn cent na liter su minjenu nóc při tankowni za samoposłužowanje w badensko-württembergskim Leutkirchenje předawali. Mjez 23 hodź. a 4 hodź bě ćěriwo tam nimale darmo. Hakle, jako so dale a wjace šoferow před tankownju w Ravensburgskim wokrjesu nastupowaše, zmylk napadny. Hač jedna so wo techniski defekt abo wo manipulaciju, njewědźa.
Wopačny wobraz wo mjeńšinach?
Berlin (SN/mb). Mjeńšinowa rada sej wot Zwjazkoweje centrale za politiske kubłanje (BpB) cofnjenje informaciskeho łopješka wo domoródnych narodnych mjeńšinach w Němskej žada. Předsydka Gitte Hougaard-Werner kritizuje, zo njejsu gremij do zdźěłanja teksta zapřijeli. Nimo toho awtoram zmylki wumjetuja, tak su ličby přisłušnikow narodnych mjeńšin „bjez zakłada a tendenciozne.“
We wotrězku wo Serbach steji, zo je jich 60 000, 40 000 w Sakskej a 20 000 w Braniborskej. Tohodla chcychu SN wědźeć, na čimž so mjeńšinowa rada konkretnje postorkuje. Nawodnica mjeńšinoweho sekretariata, Nele Feuring, wotmołwi w nadawku mjeńšinoweje rady, zo je wuznaće k mjeńšinje swobodne a tohodla njemóžeš žane ličby podać.
Mjez druhim kritizuja naspomnjenje druhich zastupnistwow zajimow mjeńšin kaž „Serbski sejm“ jako „parlamentariske zastupnistwo“ – to je iritěrowace a njewobkedźbuje płaćiwe zakonske zakłady. Domowina pak so w teksće BpB jako „připóznate zastupnistwo“ mjenuje, wo Serbskim sejmje pisaja, zo „njeje dotal žane připóznaće nadešoł“.
