Zeleni kritizuja pomjezne kontrole
Berlin (dpa/SN). Wot zwjazkoweje nutřkowneje ministerki Nancy Faeser (SPD) připowědźene pomjezne kontrole po měnjenju Berlinskich Zelenych swój zaměr njedocpěwaja. „Pomjezne kontrole wěstotu Němskeje njezwyša, ale policiju přidatnje wobćežuja“, rjekny krajny předsyda Philmon Ghirmai. Kontrole poćežuja dojězdźowarjow kaž tež transport tworow a změja drastiske wuskutki za hospodarstwo, je sej wón wěsty.
Po njedawnych bolostnych přiwótřenjach prawa na azyl nětko tež mjezy zawrěć, „je jenož w zajimje prawicarsko-ekstremistiskich stron“, Ghirmai rjekny. Wón sej žada, nawróćić so k wěcownej politice. Naprawy ranja nimo toho europske prawo a Schengenske zrěčenje.
Faeser bě nachwilne kontrole při wšitkich mjezach Němskeje wukazała. Přidatne kontrole maja so 16. septembra zahajić a najprjedy raz šěsć měsacow trać. Jako přičiny mjenowaše wona nimo njeregularneje migracije tež škit nutřkowneje wěstoty a wohroženje přez islamski terorizm a kriminalitu.
Sakska CDU a BSW so zetkałoj
Jednanja wo nowym knježerstwje w swobodnym staće zahajene
Drježdźany (dpa/SN). Sakski ministerski prezident Michael Kretschmer (CDU) je so z předsydku BSW Sahru Wagenknecht zetkał. Rozmołwa je so wčera popołdnju w Berlinje wotměła, CDU zdźěla. Zaměr zetkanja bě „pruwować móžnosće konstruktiwneho zhromadneho politiskeho dźěła“. Přichodne dny chcedźa nětko rozmołwy mjez CDU a BSW w Sakskej zahajić, w Drježdźanach rěkaše.
Kretschmer a Wagenknecht staj so po informacijach CDU wo politiskim połoženju w swobodnym staće, wo nowych móžnosćach direktneje demokratije a wo předźěłanju koronapandemije rozmołwjałoj. Tež temy krajneje politiki kaž kubłanje, wěstota a socialna politika hrajachu rólu. Nimo toho staj sej swoje pozicije wo wonkopolitiskich temach wuměniłoj.
Za čas wólbneho boja bě Kretschmer kritisce na pospyty Wagenknecht reagował, sakskej a durinskej CDU wuměnjenja zhromadneho dźěła nadiktować. „Časy politběrowa su nimo, jako móžeše něchtó w Berlinje postajić, što so tule na městnje stawa“, rjekny wón hišće před třomi tydźenjemi.
„Wupokazy, prošu!“
To a tamne (10.09.24)
Přepjelnjene jastwa zdźěla wuprózdnić chcedźa we Wulkej Britaniskej. Cyłkownje 1 700 jatych po tutym puću dočasnje pušća, knježerstwo w Londonje zdźěla. Hewak hrozy „kriminalita bjez mjezow“, dokelž njemóža połnych jastwow dla nikoho wjace zajeć. Rjadowanje předwidźi, zo móža jatych hižo po 40 procentach wotsedźaneho chłostanja pušćić. Hewak je to hakle po połojcy časa móžne.
Wočakowaneho wulkeho nawala na znowanatwarjenu katedralu Notre Dame w Parisu dla su tam internetne rezerwowanje zarjadowali. Kaž biskopstwo zdźěla, je zastup do Božeho domu dale darmotny. Rezerwowanja měsacy do toho njejsu móžne, ale hakle dny do wopyta sławneje cyrkwje, kotraž bu při wulkim wohenju w aprylu 2019 zničena. Po wotewrjenju 8. decembra wočakuja tam kóžde lěto 15 milionow wopytowarjow.
Dwurěčnosć dale wulke wužadanje
Slepo (JK/SN). Na pjatu fachowu konferencu měšćanostow a wjesnjanostow serbskeho sydlenskeho ruma witaše Kati Struckowa, społnomócnjena Zhorjelskeho wokrjesa za serbske naležnosće, nahladnu ličbu zastupjerjow gmejnow Budyskeho a Zhorjelskeho wokrjesa. Fachowa konferenca wotmě so prěni raz w Zhorjelskim wokrjesu a tak běchu postrowne słowa tamnišeho krajneho rady, dr. Stephana Meyera (CDU) jara wutrobite. Wón zwurazni wažnosć dwurěčnosće wosebje za swój wokrjes, hdźež so jenož hišće w někotrych regionach kaž wokoło Slepoho dwurěčnosć a serbšćina pěstuje. W fachowej konferency widźi wón wažny instrument, komunalnych politikarjow skedźbnjeć móžnosće, pokazać na dwurěčnosć w zjawnosći.
Pomnik mjez druhim za „wědomostne zemjerženje“
Etatowy tydźeń zahajeny
Berlin (dpa/SN). Zwjazkowy sejm nawróći so tutón tydźeń z dowoloweje přestawki. K zahajenju tradicionalneho etatoweho tydźenja su so stronske gremije a frakcije zwjazkoweho sejma dźensa k wuradźowanjam zešli. Jutře chce financny minister Christian Lindner (FDP) z wjele prócu zdźěłany etat za lěto 2025 w parlamenće předstajić. W nim planuja wudawki 480 miliardow eurow a 51,3 miliardy eurow nowych kreditow. Předsyda CDU Friedrich Merz naćisk kritizuje. Israel atakuje milicy w Syriskej
Damaskus (dpa/SN). W Syriskej su při pozdatnym nadpadźe israelskich wojerskich lětadłow na zepěranišća proiranskich milicow po syriskich informacijach pjeć ludźi morili. Znajmjeńša 19 ludźi so rani. Wojerske lětadła běchu składy brónjow milicy njedaloko města Hama nadběhowali. Wobkedźbowarjo rěča wo wjacorych rozbuchnjenjach. Israelske wójsko nochcyše nalěty komentować.
Trump a Harris jenak sylnaj
