Demokratija wohrožena?
Bywši prezident USA Donald Trump měješe před sudnistwom wuspěch
Washington (dpa/SN). Bywši prezident USA Donald Trump so po rozprawach wo to prócuje, po njedawnym rozsudźe najwyšeho sudnistwa k prašenju imunity, zběhnjenje swojeho zasudźenja w New Yorku docpěć. Jenož něšto hodźin po wobzamknjenju Supreme Courta su prawiznicy Trumpa prěnje kročele zahajili a so z listom na přisłušneho sudnika w New Yorku wobroćili, sćelak CNN a nowina „New York Times“ rozprawještej. Žórła pak žane njemjenowaštej.
Prawiznicy su prawdźepodobnje sudnika tež wo to prosyli, za 11. julij postajene wozjewjenje chłostanja přestorčić. Trumpowy team powoła so při tym na njedawny rozsud Wyšeho sudnistwa USA, po kotrymž so prezidenća USA nastupajo chłostanske přesćěhanje za oficialne jednanja w zastojnstwje škitaja. Prezident USA Joe Biden ma tole za „strašny precedencny pad“. Krok Trumpowych prawiznikow bě wočakujomny, ale je skerje bjez wuhladow.
Mustwo je wjac hač star
Woda wina?
To a tamne (02.07.24)
Podźěl muslimow stupa
Hamburg (B/SN). Po podaćach zawoda Statista bydli w Němskej 45 procentow křesćanow, z nich 44,6 proc. katolskich, 34,7 proc. ewangelskich, 3,7 proc. ortodoksnych. Dalšich 36 proc. njepřisłuša žanej nabožinje, 8,5 proc. su muslimojo, buddhisća a hindu. Hač do lěta 2050 připowědźa Statista 2,7 miliardow muslimow na swěće, w Europje 71 milionow. A w lěće 2070 budźe wjace muslimow na swěće hač křesćanow. Statista zwěsća, zo je 365 milionow křesćanow na swěće přesćěhanych a zo nadpady na muslimow a židow w Němskej jara přiběraja.
Ilegalni biskopja
Suresnes (B/SN). W lěće 1970 bu Piusowe bratrowstwo jako zjednoćenstwo měšnikow, katolskich tradicionalistow załožene, zo by so hłownje wukubłanju měšnikow wěnowało. Dokelž pak dale liturgiju z lěta 1962 nałožuje, wone katolsku cyrkej pači. 1988 je arcybiskop Marcel Lefebvre štyrjoch měšnikow ilegalnje na biskopow wuswjećił a bu za to ekskomunikowany. Přiwšěm chce bratrowstwo dalšich biskopow bjez dowolnosće bamža wuswjećić.
Zbytk synagogi zachować
Serbski sejm chce hinaše kubłanje
Grodk (SN). Serbski sejm je składnostnje posedźenja sobotu oficialnje swój kubłanski koncept wozjewił. W srjedźišću je žadanje za serbskim kubłanjom, kotrež Serbja sami zarjaduja. Wjac zhoniće na internetnej stronje Serbskeho sejma.
Hłowne ćežišćo bě 2. čitanje naćiska statneho zrěčenja mjez serbskim ludom a statom (Zwjazk a kraje). Sejmarjo chcedźa wo tym z fachowcami europskeho mjeńšinoweho a narodnostneho prawa diskutować. Tomu maja so rozmołwy ze zastupjerjemi stata přizamknyć.
Čłonojo Grodkowskich iniciatiwow přećiwo planam koporoweho hórnistwa a tež planowanemu parkej wětrnikow w měšćanskim su swoje wobmyslenja přednjesli. Serbski sejm je k wudobywanju kopora hižo do toho kritiske stejišćo zabrał, kiž je internetnje přistupne.
Dale su aktualnu 15. rozprawu zwjazkoweho knježerstwa wo politice čłowjeskich prawow na wědomje wzali. K tomu chcedźa kritisku paralelnu rozprawu zdźěłać, dokelž njejsu so po jich měnjenju naležnosće našeho ludu dosahajcy wobkedźbowali. Přichodne posedźenje wotměje so 24. awgusta w Dešnje.
Madźarska přewzała
Berlin (dpa/SN). Přichodnych šěsć měsacow přewozmje Madźarska prezidentstwo rady EU. Knježerstwo w Budapesće je sej předewzało, wubědźowanjakmanosć hospodarstwa EU spěchować. Zo móhło hospodarstwo rozrosć je nowe zrěčenje trěbne, dźensa madźarske knježerstwo zdźěli. Runje tak je předwidźane, přećiwo ilegalnej migraciji wojować, mjez druhim su wobzamknjenja z třećimi statami trěbne.
Pady jasnje přiběraja
Drježdźany (dpa/SN). Ličba přizjewjenych padow FSME a boreliozy je minjene tydźenje w Sakskej jasnje přiběrała. Hač dosrjedź junija běchu dźewjeć schorjenjow FSME a 395 padow boreliozy registrowane, z tydźenskich rozprawow Krajneho přepytowanskeho wustawa (LUA) wuchadźa. Spočatk meje běchu ličby hišće wo wjele niše. Nimale wšitke sakske regiony su mjeztym jako rizikowa kónčina zastopnjowane. Wuwzaće su jenož hišće město Lipsk, kaž tež wokrjesaj Lipsk a Sewjerna Sakska.
Chcedźa předewzaća podpěrać
Tysacy ludźi su na lětuše swjedźenske dny róžow do Baršća ...
Młodźi ludźo su rozsudne
Berlin/Paris (dpa/SN). W druhim kole wólbow parlamenta w Francoskej móhli předewšěm hłosy młodych ludźi rozsudne być, měni politikarka Zelenych Franziska Brantner, kotraž je zdobom fachowča za Francosku. Wjele młodostnych je wot prezidenta Emmanuela Macrona přesłapjenych, wona dźensa w sćelaku Deutschlandfunk zwurazni. Nětko póńdźe wo to, hač młodźi ludźo, kotřiž wčera hišće za zwjazk Lěwicy hłosowachu, w přichodnym kole Macrona wola. „Hač so mobilizacija poradźi, je jedne z najwjetšich prašenjow“, Brantner zwurazni.
Po prěnim kole leži Rassemblement National (RN) kandidatki Marie Le Pen z něhdźe 33 procentami prědku. Macron je wčera něhdźe 21 procentow hłosow wolerjow dóstał a zwjazk Lěwicy docpě něhdźe 28 procentow hłosow. Kelko sydłow w narodnej zhromadźiznje dóstanu, so při wólbach přichodnu njedźelu rozsudźi. Wužadanje zwjazka Lěwicy po słowach Brantner je, zo nimaja žanu galionowu figuru, z kotrejž móža so wolerjo identifikować.
Njemóža wěstotu garantować?
Berlin (dpa/SN). CDU/CSU staw Zwjazkoweje wobory raznje kritizuje. „Ampla Zwjazkowu woboru w hubjeńšim stawje zawostaja, hač je ju přewzała“, zwurazni zastupowacy předsyda frakcije unije w zwjazkowym sejmje Johann Wadephul (CDU) powěsćerni dpa w Berlinje. To nastupa material a personelne wuhotowanje, „potajkim zasadźensku hotowosć“.
Zwjazkowy kancler Olaf Scholz (SPD), bě w februaru 2022 po nadpadźe Ruskeje na Ukrainu w knježerstwowej deklaraciji, změnu nastupajo wěstotu připowědźił. K tomu słuša 100 miliardow eurow za Zwjazkowu woboru. Zakitowanski minister Boris Pistorius (SPD) pozdźišo wuzběhny, zo dyrbja wobrónjene mocy po móžnosći spěšnje kmane być wěstotu garantować. Zo so material Zwjazkoweje wobory, kotrehož je tak a tak hižo mało, Ukrainje woteda, je konflikt, kotryž hodźi so ćežko zrozumić.
Za wšitke njedostatki njeje tuchwilne knježerstwo zamołwite, Wadephul rozjasni. Pobrachuja pak efektiwne a přesahowace naprawy.
