China kritizuje cła za elektroawta
Brüssel/Peking (dpa/SN). Zwjazk awtomobiloweje industrije němskeje (VDA) kritizuje hroženje komisije EU, sej za elektroawta ze Chiny přichodnje wysoke cła žadać. Prezidentka zwjazka Hildegard Müller ma wotedawki za zadźěwk globalnemu zhromadnemu dźěłu. Z tym přiběra strach swět wopřijacych wikowanskich rozestajenjow. Cła na chinske awta europskim awtotwarcam scyła njepomhaja, Müller rjekny. Hač dyrbja chinscy awtotwarcy cło hač do 38 procentow woprawdźe płaćić, wot toho wotwisuje, hač z Chinu w jednanjach druhe rozrisanje w konflikće njenamakaja.
China připowědźene chłostanske cła EU za elektroawta raznje kritizuje a hrozy zdobom z přećiwnymi naprawami. Wikowanske ministerstwo w Pekingu EU wumjetuje, zo rjećazy dodawanja tworow haći. „Europska unija dźerži w jednej ruce chorhoj zeleneho wuwića, w druhej pak retl protekcionizma“, rěčnik ministerstwa rjekny. China namołwja EU, swój wopačny kurs změnić a hospodarske napjatosće po puću dialoga rozrisać.
Zwada wo połoženju Sakskeje
Ministerski prezident Kretschmer z knježerstwowej deklaraciju w sejmje
Drježdźany (dpa/SN). Sakski ministerski prezident Michael Kretschmer (CDU) žada sej wot zwjazkoweho knježerstwa, zo naležnosć ćěkancow dla rozrisa. Ličby migrantow dyrbjeli jasnje woteběrać, zo móhła so nalada mjez ludźimi zaso změrować, rjekny Kretschmer wčera w swojej knježerstwowej deklaraciji w krajnym sejmje w Drježdźanach.
Na spočatku swojeje narěče wěnowaše so Kretschmer wuslědkam wólbow Europskeho parlamenta, při kotrychž bě AfD na wuchodźe Němskeje dobyła. „Tute wólby běchu protestne wólby.“ To je hórko, dokelž je Europska unija tež za sakske naležnosće centralna. Wólbny wuslědk je jemu jasne znamjo, zo njemóže knježerstwo dale dźěłać, jako njeby so ničo stało.
Porjedźenka
Warnuja před baćonom w Dešnje
To a tamne (13.06.24)
Płomjenja w sawnje su 20lětneho w Henningsdorfje we wokrjesu Hornja Habola zranili. Muž bě předwčerawšim, wutoru, w sawnje koncentrat wšelakich eteriskich wolijow na horce kamjenje kidał, bjez toho, zo by je do toho z wodu měšał. Na to bě so naliwk zapalił. Zranjeneho muža dowjezechu do chorownje.
Sta kilogramow drogow je policija pola wulkowikowarja sadu a zeleniny w Groß Kreutzu w Podstupimskim wokrjesu sćazała. Po prěnim trochowanju jedna so wo 450 kilogramow. Drogi ležachu w małych pakćikach mjez bananami. Sobudźěłaćerjej běchu podhladne pakety napadnyli. Namakanka njeje prěnja w zawodźe. Loni w septembru běchu 500 kilogramow kokaina na samsne wašnje namakali. Drogowe cwólby we łaćonskej Americe wužiwaja transport zeleniny, zo bychu drogi do Europy dowjezli.
„Wažne je, zmylki korigować“
Berlin (SN/MiP). „Demokratija je žiwa jenož, hdyž so wobdźěliš.“ Pod tutym hesłom běše Katja Meier (Zwjazk90/Zeleni), nawodnica Sakskeho statneho ministerstwa za demokratiju, justicu, Europu a runostajenje (SMJusDEG) wčera do Sakskeho krajneho zastupnistwa w Berlinje přeprosyła. Wjace hač 120 akterow ze wšěch zwjazkowych krajow a wšitkich zwjazkowych ministerstwow su so w dźěłarničkach a dźěłowych skupinach z prašenjom zaběrali, kak móhli wobdźělenje wobydlerstwa w našej demokratiji spěchować.
Dalši „Patriot“ do Ukrainy
Washington (dpa/SN). Prezident USA Joe Biden chce Ukrainje po informacijach medijow dalši lětadła wotwobaracy system Patriot přewostajić, zo móhł so kraj ruskim nalětam wobarać. Biden je tole po wjacorych zetkanjach ze zamołwitymi rozsudźił, knježerstwowe kruhi we Washingtonje rozprawjeja. Nowy system Patriot z USA je hižo w Pólskej. Přichodne dny chcedźa jón do Ukrainy dowjezć.
Hamas wotmołwu přepodała
Gaza (dpa/SN). Islamistiska terorowa organizacije Hamas je po swójskich informacijach posrědkowarjam z Katara a Egyptowskeje wotmołwu na namjet USA za přiměr w Gazaskim pasmje posrědkowała. Hamas zhromadnje z mjeńšej wojerskej skupinu Islamski dshihad přilubja, zo chcyła so „pozitiwnje zadźeržeć“, zo by dojednanje k skónčenju wójny docpěła. Dokładny wobsah wotmołwy njeje znaty. USA běchu minjene dny swójski plan k skónčenju wójny předpołožili.
Biden k swojemu synej jěł
Zwjazkowy policist zadźerži na awtodróze A64 bus z pućowacymi. K ...
Kretschmer: Migraciju zrjadować
Drježdźany (dpa/SN). Sakski ministerski prezident Michael Kretschmer žada sej wot zwjazkoweho knježerstwa, zo prašenje migracije rozrisa. Ličby migrantow měli so jasnje znižić, zo by so tema změrowała, rjekny politikar CDU dźensa w Sakskim krajnym sejmje. Wobydlerjo tole wočakuja. W naćisku swojeho knježerstwoweho programa za nowu legislaturnu dobu žada sej sakska unija pola migracije „dychacu hornju mjezu“ 60 000 ćěkancow wob lěto w Němskej. Za Saksku by to rěkało, zo dyrbi 3 000 migrantow wob lěto zaměstnić.
Bórze zaso woborna winowatosć?
Berlin (dpa/SN). Zakitowanski minister Boris Pistorius (SPD) chcyše dźensa wo swojich planach nastupajo nowu wobornu słužbu informować. Dopołdnja je wón swoje předstawy zakitowanskemu wuběrkej zwjazkoweho sejma předstajił. Popołdnju chcyše wón zjawnosć na nowinarskej konferency informować.
Wobornu winowatosć běchu w Němskej lěta 2011 pod tehdyšim zakitowanskim ministrom Karlom-Theodorom Guttenbergom zběhnyli. Zakonsce předwidźane je, zo móža wobornu winowatosć w padźe wosebitych napjatosćow abo zakitowanja kraja zaso wukazać.
Najebać personalnu ofensiwu je ličba wojakow zwjazkoweje wobory loni na 181 500 wojakow woteběrała. Hladajo na to a na wójnu Ruskeje přećiwo Ukrainje je Pistorius nadawk dał, wšelake modele słužbneje winowatosće pruwować.
