Serbske Nowiny wudawaja so w Domowina-Verlag GmbH Ludowym nakładnistwje Domowina
Jednaćel: Syman Pětr Cyž
Ludowe nakładnistwo Domowina tzwr spěchuje Załožba za serbski lud, kotraž dóstawa lětne přiražki z dawkowych srědkow na zakładźe hospodarskich planow, wobzamknjenych wot Němskeho zwjazkoweho sejma, Krajneho sejma Braniborskeje a Sakskeho krajneho sejma.
Šefredaktor a zamołwity redaktor w zmysle
nowinarskeho zakonja: Marcel Brauman 577 232/233 Naměstnik šefredaktora: Axel Arlt 577 238
tel.: 03591 / 577 232 faks: 03591 / 577 202 e-mail: www.serbske-nowiny.de
Adresa redakcije a nakładnistwa: Sukelnska 27, 02625 Budyšin
Adresse der Redaktion und des Verlages: Tuchmacherstraße 27, 02625 Bautzen
Zamołwita za rozšěrjenje a marketing:
Patricia Róblowa 577 273
Předań nawěškow: Janka Rögnerowa 577 220 e-mail:
Ćišć: DVH Weiss-Druck GmbH & Co. KG, Lejnjanska 14, 02979 Halštrowska Hola, wjesny dźěl Hory
Vertriebskennzeichen: 2 B 2560 B
To a tamne (05.06.24)
Dobrej dwaj dnjej na wjeršku štoma wutrała je žona njedaloko Neu-Ulma w Schwabskej, zo by so před wulkej wodu wuchowała. Pomocnicy namakachu 32lětnu njezranjenju – ale wosłabjenu a wusušenu – a dowjezechu ju do chorownje. Žona bě w nocy na njedźelu w lěsu po puću, jako woda spěšnje stupaše. Wona so z mobilnym telefonom pola policije přizjewi. Potom zalěze na wjeršk štoma. Na to bě aku telefona prózdny.
Spektakularny pad zawlečenja zaběra tuchwilu Lipšćanske sudnistwo. Syriska swójba bě pozdatneho kuzłarja z Lipska do Magdeburga zawlekła. Tón bě swójbu do toho wo 15 000 eurow wobšudźił, jako twjerdźeše, zo móže pjenjezy rozmnožić. Kuzłar pak so z pjenjezami zminy. Na to jeho swójbni pytachu, w Lipsku wuslědźichu a sobu wzachu. Policija muža pozdźišo wuswobodźi.
Šiman za spušćomne spěchowanje
Na swojim poslednim posedźenju do wólbow w Sakskej a Braniborskej sej parlamentariska přirada załožby žadaše, zo njech so stat při spěchowanju serbskeho ludu wot 2026 na tuchwilnym niwowje orientuje.
Berlin (SN/mb). 76. posedźenje Parlamentariskeje přirady Załožby za serbski lud so wčera w Zwjazkowym sejmje pod nawodom Marka Šimana (CDU) wotmě, kiž gremijej hižo wot 1994 předsydari. W srjedźišću stejachu jednanja wo 5. financnym zrěčenju Zwjazka, Sakskeje a Braniborskeje za dobu 2026-2030. Tuchwilu płaćace 4. financne zrěčenje běše, tak Marko Šiman wčera po wuradźowanju w rozmołwje z našim wječornikom, „dobry signal“, wšako móžeše załožba „prěni raz k zdźerženju serbskeje substancy přinošować“. Tohodla su sej zapósłancy w přiradźe přezjedni: Njech so knježerstwa Zwjazka a krajow z přichodnym zrěčenjom najebać napjate połoženje etatow na docpětym niwowje orientuja, zo njeby so ničo zaso zhubiło.
Habeck zakituje Scholza
Berlin (dpa/SN). Wicekancler Robert Habeck (Zeleni) wobžaruje, zo njeje zwjazkowy kancler Olaf Scholz (SPD swój kurs w politice Ukrainje napřećo hižo prjedy změnił. „Wšitko, što smy rozsudźili, bychmy wo wjele spěšnišo rozsudźić dyrbjeli“, rjekny Habeck Augsburgskim nowinarjam. Runočasnje pak zakitowaše wón Scholza přećiwo wumjetowanjam wahanja dla. „Trěbne su jara ćežke rozsudy a tohodla to dokładnje rozwažujemy. Rozsud pak je prawy“, wón rjekny.
Twarcy brónjow trjebaja wěstotu
Berlin (dpa/SN). Prezident Zwjazka němskeho powětroweho a swětnišćoweho hospodarstwa Michael Schöllhorn je zwjazkowe knježerstwo k lěpšej spušćomnosći při financowanju zwjazkoweje wobory namołwjał. „Industrija dyrbi planować móc“, rjekny Schöllhorn, kiž je zdobom šef brónjenskeho wotrjada koncerna Airbus. Industrija je minjeny čas „tójšto inwestowała“, njemóže pak bjez planowanja produkować, wón rjekny.
Hłód tradacy w chorowni
Rěčka Wieslauf je w badensko-württembergskim Klaffenbachu wulku ...
Podpěruja namjet za měr w Gazy
Rom (dpa/SN). Skupina G7 podpěruje plany prezidenta USA Joewa Bidena za dojednanje w Gazaskim konflikće. Tole zdźěla zastupnik Italskeje, kotraž skupinu sydom wodźacych industrijnych krajow swěta tuchwilu nawjeduje. Biden bě minjeny pjatk naćisk dojednanja předstajił. Tón předwidźi šěsć tydźenjow trajacy přiměr. W tym času móhła Hamas dalšich zastajencow pušćić. Za to by Israel wjacorych Palestinjanow z jastwa pušćił. W přichodnej fazy bychu wojowanja dospołnje skónčili a tež poslednich zastajencow pušćili. Poslednja faza předwidźi nowonatwar Gazaskeho pasma.
Statni a knježerstwowi šefojo G7 namołwjeja islamistisku Hamas, zrěčenje z Israelom akceptować. Kraje, kotrež maja wliw na Hamas, dyrbjeli ju pohnuć, zrěčenje podpisać. Tole by „rozrisanju dweju statow“ přinošowało, G7 zdźěla.
AfD na čole mjez młodostnymi
Drježdźany/Berlin (dpa/SN). AfD je w Sakskej při napodobnjenych europskich a komunalnych wólbach mjez młodostnymi najlěpje wobstała. Něhdźe 26 procentow wšěch wolerjow pod 18 lětami je stronje swój hłós dało, wčera wozjewichu. Ze 14,8 procentami přińdźe Lěwica na 2. městno. Zeleni dóstachu 11,6 procentow hłosow, CDU a SPD ležachu ze 11,2 a 9,8 procentami za tym.
Tež při komunalnych wólbach w Sakskej wostanje AfD ze 24,7 procentami najsylniša moc. CDU (12,7) a SPD (12,6) wostanjetej daloko za tym. Wuhódnoćili běchu 3 900 wotedatych hłosow.
Porno tomu je AfD w cyłoněmskim zhladowanju w nahladnosći mjez wolerjemi přisadźiła. W dźensa wozjewjenym woprašowanju instituta Insa w nadawku nowiny Bild by 15,5 procentow (minus 0,5) ludźi AfD woliło, bychu-li přichodnu njedźelu wólby zwjazkoweho sejma byli. Tak by strona za SPD – kotraž ma 16 procentow – na třeće městno přišła. Za AfD je tole najšpatniši wuslědk wólbneho woprašowanja po měrcu 2023.
Žadaja sej islamistow wotsunyć
Mannheim (dpa/SN). Po smjertnym nadpadźe z nožom w Mannheimje kopja so žadanja za konsekwentnym wotsunjenjom wukrajnych skućićelow. Wjacore zwjazkowe kraje podpěruja mjeztym Hamburgskeho nutřkowneho senatora Andyha Grotu (SPD), ćežko-kriminelnych wukrajnikow přichodnje tež do Afghanistana a Syriskeje wotsunyć. Sakski nutřkowny minister Armin Schuster (CDU) na to skedźbnja, zo sej Sakska hižo dołho wotsunjenja islamistow žada.
25lětny muž z Afghanistana bě minjeny pjatk na zarjadowanju islam kritizowaceje organizacija na Mannheimskim Hłownym torhošću z nožom šěsć muži zranił, mjez nimi policista. 29lětny zastojnik je pozdźišo na sćěhi swojich zranjenjow wudychał. Mjeztym maja jasne pokazki na islamistiski motiw skućićela. Tón bě 2014 w Němskej wo azyl prosył, štož pak tehdy wotpokazachu. Zwjazkowy kancler Olaf Scholz (SPD) chce so jutře w zwjazkowym sejmje we wobłuku knježerstwoweje deklaracije wěstotnemu połoženju w Němskej wěnować.
Połoženje wody dla kritiske
Katastrofowy staw w bayerskich wokrjesach – nowy zakoń připowědźeny
Regensburg (dpa/SN). Połoženje wulkeje wody dla je w dźělach Bayerskeje dale kritiske. W Regensburgu, hdźež běchu katastrofowy staw wukazali, dyrbješe wčera wječor 200 wobydlerjow swoje domy wopušćić. W hornjobayerskim wokrjesu Rosenheimje płaći tohorunja katastrofowy staw. Tež w gmejnach Raubling a Rohrdorf dyrbjachu ludźi ewakuować. Kelko ludźi bě potrjechenych, njebě spočatnje hišće jasne.
Wčera wječor běchu ludźi w Rosenheimskim wokrjesu namołwjeli, doma wostać. „Wobsteji strach za žiwjenje a strowotu“, rěka w zdźělence zamołwitych. Minjenu nóc je so połoženje trochu změrowało. Najebać to wostanu šule a pěstowarnje dźensa zawrjene. W sydom bayerskich wokrjesach dźensa wulkeje wody dla prezencna wučba wupadnje.
Ze spadowacej wulkej wodu su sćěhi zapławjenjow nětko hakle prawje widźomne. Tysacy pomocnikow při rumowanju pomhaja. Dotal su štyri smjertne wopory zličili.
Železniski wobchad je dale haćeny. Wjacore zwiski podłu Dunaja wupadnu, dokelž su kolije zapławjene.
