Gaza (dpa/SN). Israel swoje wjele diskutowane plany wojerskeho postupowanja na juhu Gazaskeho pasma po wotpowědnych žadanjach USA změni. Tole rozprawjeja medije we Washingtonje. Tak su w Tel Avivje pječa plany za wulkoofensiwu w měsće při mjezy Egyptowskeje zaćisnyli a chcedźa nětko we wobmjezowanym wobłuku postupować. Bywši plan, dwě israelskej wojerskej diwiziji do města pósłać, dlěje njesćěhuja, nowiny pisaja. Połoženje ciwilneje ludnosće wostanje přiwšěm dale katastrofalne.

Pomocny skutk UNO na dobro Palestinjanow je zastaranje ze žiwidłami w Rafah nachwilnje přetorhnył. Přičiny su po informacijach organizacije njeprawi­dłowne transporty pomocnych srědkow a wěstotne połoženje. Po informacijach medijow Egyptowska humanitarne pomocne srědki israelskeho postupowanja w Rafah dla blokuje. Pomjezny přechod wostanje zawrjeny. Egyptowska žada sej cofnjenje israelskich wojakow z pomjezneho přechoda. Mjeztym so pomocne srědki na egyptowskim boku mjezy kopja.

Dešno (SN/at). Wólbny wuběrk za wólby Rady za naležnosće Serbow při Krajnym sejmje Braniborskeje je so minjeny pjatk w Dešnje skonstituował. Gremijej předsydari Margit Neugebauer, wokrjesna radźićelka a předsydka Serbskeho wuběrka wokrjesneho sejmika Sprjewja-Nysa. Za městopředsydu wuzwolichu Freda Kaisera, wjesnjanostu gmejny Dešno-Strjažow, za zapisowarku Renatu Harcke, čłonku Domowinskeje skupiny Grodk.

Wólbny wuběrk chce hižo na hłownej zhromadźiznje župy Delnja Łužica 8. junija w Lěšćoch (Hornow) pola Grodka Domowinskim skupinam próstwy wo zapisowanje do wólbneho zapiska přepodać, zo móhli so ludźo za listowe wólby registrować dać. Nimo toho, tak rjekny to Renate Harcke našemu wječornikej, chcedźa wobdźělenych hłowneje zhromadźizny wo přeběhu wólbow informować. Wažny datum je 15. decembra w 12 hodź. „To je posledni dźeń wólbow a kónc wólbneho časa. Termin je wuběrk wotpohladnje wuzwolił, dokelž tón dźeń před 30 lětami je so prěnja braniborska Rada za naležnosće Serbow skonstituowała“, Harcke podšmórny.