Gaza/Tel Aviv (dpa/SN). Při israelskim wojerskim nalěće w měsće Rafah na juhu Gazaskeho pasma su po informacijach wot Hamas kontrolowaneho strowotniskeho zarjadnistwa 35 ludźi morili a dźesatki zranili. Najwjetši dźěl woporow běchu žony a dźěći. W socialnych medijach prezentuja wideja, kotrež pokazuja, kak pomocnicy ćěła z palacych so stanow ćahaja. Po informacijach palestinskeho čerwjeneho połměsačka su při nadpadźe stany ćeknjenych ciwilistow trjechili.

Israelske wójsko je mjeztym wobkrućiło, zo je teritorij islamistiskeje Hamas nadpadnyło. Při tym su pječa wjacorych wodźacych čłonow organizacije morili. Nadpad wotpowědowaše mjezynarodnemu prawu. Rozprawy, po kotrychž je ­woheń wudyrił, při kotrymž su njewobdźěleni škodu poćerpjeli, nětko pruwuja.

Mjezynarodne sudnistwo bě Israelej minjeny pjatk kazało, wojerske zasadźenje w Rafah hnydom skónčić. Rozsudy swětoweho sudnistwa su zawjazowace. Sudnicy pak nimaja žane srědki, staty k přesadźenju wusudow nuzować.

Francoski statny prezident w krajnej stolicy a w Frauenhoferskim instituće

Drježdźany (dpa/SN). Z dźeń trajacym wopytom w Sakskej je francoski statny prezident Emmanuel Macron dźensa ze swojim statnym wopytom w Němskej pokročował. Posledni programowy dypk w Berlinje bě dźensa dopołdnja kładźenje wěnca na wopomnišću za morjenych Židow Europy. Připołdnju wočakowachu Macrona a jeho mandźelsku Brigitte zhromadnje ze zwjazkowym prezidentom Frankom-Walterom Steinmeiereom a toho žonu Elku Büdenbender w hrodźe Moritzburgu.

Wjeršk wopyta w Drježdźanach měješe europsko-politiska narěč Macrona před Drježdźanskej Cyrkwju Našeje ­knjenje być. W njej chcyše so francoski prezident na młodźinu Europy wobroćić. Při narěči přitomni budu wjacori tysac młodostnych ze Sakskeje, Pólskeje, Čěskeje a Francoskeje. Powšitkownje wo­čakowachu, zo Macron młodostnych direktnje narěči, wosebje tych z wuchodnych europskich krajow. Tući so boja, zo móhli woni přichodne wopory ruskeje wojerskeje agresije być.

Hdyž zwonka Łužicy ludźom powědaš, zo so přichodne lěta hišće wjes wotbagruje, zo bychu po 2030 milinarnju z brunicu „picowali“, jenož z hłowu wija. A hdyž k tomu zhonja, zo woznamjenja to kóncowanje – najskerje hižo 800 lět eksistowaceho – serbskeho sydlišća najebać škit serbskeho ludu we krajnej wustawje, je wotmołwa z prašenjom: „A čehodla daće sej to lubić?“ Dokelž je so wjetšina ludnosće za přesydlenje rozsudźiła. Ale njeby nadawk Domowiny był, runje tym rjap skrućić, kotřiž chcedźa serbsku zemju zakitować? Što pak pomhaja parole Serbskeho sejma, hdyž so na kóncu jenož najstarši wobaraja a młódši chcedźa preč? Stary Miłoraz budźe – za to njeje „poslednja generacija ze spodźiwnymi akcijemi trěbna – za wšě časy znamjo groteskneho kónca brunicoweje epochi. Přećam přesydlencow su w Nowym Miłoraz wotpowědowali, tule móža wjesnu zhromadnosć pěstować. Njezabudźmy pak na tych, kotřiž su staremu Miłorazej swěrni. Marcel Brauman

Berlin (dpa/SN). Wichor, krupy a zliwki su loni škody 5,7 miliardow eurow načinili. „To je 1,7 miliardow eurow wjace hač lěta 2022“, zdźěli hłowny jednaćel zwjazka zawěsćernjow Němskeje Jörg Asmussen dźensa nowinarjam. „Hłowna přičina su ćežke a chětro drohe škody krupow dla na jězdźidłach.“ Dotal registrowany rekord škodow z 13,9 miliardami eurow škodow pochadźa z lěta 2021. Při prěnim trochowanju běchu fachowcy ze snadnišeje škody wuchadźeli. Statistiku wjedu wot spočatka 1970ych lět.

Jeničce njewjedra loni w awgusće běchu po informacijach zwjazka 1,5 miliardow eurow, a tak něhdźe štwórćinu wšeje škody zawostajili. Tež wichory w juniju běchu sylne. Porno tomu njemějachu w Němskej loni nazymu a w zymje nimale žane ćežke wichory.

Najwjace škodow su w Bayerskej registrowali, wjace hač dwě miliardźe eurow. Hessenska přińdźe w statistice z 890 ­milionami eurow na druhe městno. „Kónčina Alpow a hessenske srjedźohoriny Taunus a Odenski lěs běchu wosebje často wot krupow potrjechene“, Asmussen w tym zwisku nowinarjam rjekny.