Brüssel (dpa/SN). Wonkowni ministrojo 27 čłonskich statow EU su so dźensa w Brüsselu k wuradźowanju wo połoženju na Bliskim wuchodźe a w Ukrainje zešli. Na poslednim posedźenju do dowoloweje přestawki chcyše so tež ukrainski wonkowny minister Dmitrij Kuleba w formje widejoweje konferency wobdźělić.

Posedźenje přesahowachu wšelake měnjenja wo jězbje madźarskeho ministerskeho prezidenta Viktora Orbána wójny w Ukrainje dla. Orbán bě so w tym zwisku z ruskim prezidentom Wladimirom Putinom, z chinskim statnym a knježerstwowym šefom Xi Jinpingom a z bywšim prezidentom USA Donaldom Trumpom zetkał. Spočatnje bě Orbán tež ukrainskeho prezidenta Wolodymyra Zelenskeho w Kijewje wopytał.

EU bě na jězbu hněwnje reagowała, dokelž njebě ju Orbán z Brüsselom dorěčał. Prezidentka komisije EU Ursula von der Leyen chce Madźarsku, kotraž Radu EU tuchwilu nawjeduje, ze sankcijemi chłostać. Němska chce z Madźarskej rěčeć a jeje argumenty rozumić.

Politikarjo Němskeje reaguja wolóženi na cofnjenje Joewa Bidena w USA

Washington (dpa/SN). Wolóženi su politikarjo Němskeje na připowědźenje prezidenta USA Joewa Bidena reagowali, so z wólbneho boja wo prezidentstwo USA wróćo sćahnyć. Wšako dyrbjachu dołho přihladować, kak so ćělnje a dušinje widźomnje wosłabjeny Biden we wólbnym boju bědźi. Nětko so wšitcy prašeja, hač móža demokraća USA Donalda Trumpa tola hišće porazyć. Trump sam reagowaše na připowědź Bidena hněwny. Wón bě so na słabeho Bidena nastajił a bě sej swojeho wólbneho dobyća dospołnje wěsty. Tole móhło so nětko změnić.

Na prašenje „Čehodla njejězdźiš husćišo z ćahom?“ ma kóždy druhu wotmołwu. Do mojeje słuša: Sym jónu w prózdninach pola wowki w poruhrskim Bochumje pobył a swójbnych w 85 kilometrow zdalenej westfalskej wjesce wopytał. Běch ze železnicu štyri a poł hodźiny po puću, a njebychu mje na bliskim dwórnišću wotewzali, bych hišće pućować dyrbjał. Problem bě, zo wosrjedź dnja bus z města do wsy njejědźeše. W tym mizera hač do dźensnišeho tči, po tym zo su po přewróće tež syć železnicy na wuchodźe Němskeje skóncowali: Mjez metropolemi je dale a spěšnišich super-ćahow, ale wjetšina wobydlerjow je we wjesnych kónčinach a městačkach žiwa. Bjez priwatneho taksija na dwórnišću nimaja šansu, so ze zjawnymi wobchadnymi srědkami eficientnje po kraju pohibować. Zo rěče regionow, z kotrymiž Němska železnica dobry zwisk wudźeržować nochce, njewobkedźbuja, hodźi so do wobraza. Tohodla wjetšina kaž mjeńšina z awtom jězdźi. Marcel Brauman

Berlin (dpa/SN). Při zahajenych žnjach žita w Němskej so wuhlady na dobre wunoški poněčim zaćěmnjeja. Zwjazk ratarjow rěči mjeztym wo „skromnym spočatku“ nazymskeho ječmjenja. Wobmyslenja, zo kwalita zorna po mokrym nalěću a zažnym lěću widźomnje ćerpi, su so wočiwidnje zwoprawdźili. Wuchadźejo ze snadneho wunoška nazymskeho ječ­mjenja a prěnich dalšich wuslědkow žnjow dyrbja z tym ličić, zo spočatk žnjow wočakowane mnóstwo 42 milionow tonow žita 2024 lětsa na žadyn pad njedocpěja.

Tež hrib je nazymskemu ječmjenjej lětsa njewšědnje sylnje zeškodźał, zwjazk ratarjow rozłoži. W najwjace zwjazkowych krajach žně ječmjenja hišće traja, dokelž dyrbjachu dźěła dešća dla stajnje zaso přetorhnyć. Pola druhich družin žita su dotal jenož mało płonin wotžnjeli. Pola rěpika hišće žane spušćomne ličby nimaja. Přichodny wusyw pak budźe wot zwjeselaceho wuwića płaćiznow na wikach pozitiwnje wobwliwowany, je sej zwjazk ratarjow wěsty. Prěnja žnjowa rozprawa zepěra so na informacije 18 krajnych ratarskich zwjazkow.