„Dospołne zwjerćenje faktow“
Budyšin/Drježdźany (SN/MG). Jako „grawoćiwe“ pomjenuje sakski nutřkowny minister Armin Schuster (CDU) protesty prawicarjow poboku CSD w Budyšinje zašłu sobotu. W rozmołwje ze sćelakom Sachsen Fernsehen wón přida, zo bě nadawk policije zarjadowanja zawěsćić, wšako njebě demonstracija zakazana. Zdobom bě Schusterej wažne wuzběhować: „To njebě sakske zarjadowanje.“ Tole wón mjez druhim z argumentom wobtwjerdźowaše, zo přijědźechu mnozy prawicarscy demonstranća z druhich zwjazkowych krajow. W medijach pak so tute prawicarske protesty nětko zaso jako „typisce sakske“ pomjenuja.
Zo přichadźachu mnozy prawicarjo zwonka Sakskeje, na tym dwěluje sobuzarjadowar CSD Jonas Löschau. Platformje Focus online wón zdźěli, zo znaja woni prawicarjow z Budyšina a wokoliny a „wjacore stotki z nich běchu sobotu w Budyšinje.“ Wuprajenja Schustera wón jako „dospołnje zwjerćenje faktow“ šwika. Strach queerneje sceny w Budyšinje je dołho hižo napjata, wón doda.
Ukraina wojuje w Ruskej
Zelenskyj: Operacija w Kursku je naprawa wěstoty
Kijew (dpa/SN). Ukrainski prezident Wolodymyr Zelenskyj je ofensiwu swojeho wójska přez hranicu do zapado-ruskeho regiona Kursk jako wěstotnu naprawu pomjenował. Dotal zdobyte kónčiny su tam regiony, z kotrychž bě ruske wójsko wospjet wuchodo-ukrainski region Sumy nadpadnyło. Jeničce wot spočatka junija běchu tam něhdźe 2 100 nadpadow registrowali. „Tohodla su naše operacije ryzy wěstotne prašenje za Ukrainu, zo bychmy mjezu wot ruskeho wójska wuswobodźili“, praji Zelenskyj we swojej wječornej widejowej narěči.
Kursk ma symbol spočatka kónca ruskeho prezidenta Wladimira Putina być, praji Zelenskyj hladajo na katastrofu při podnurjenju najmodernišeho ruskeho atomoweho nurjaka „Kursk“. Tutón bě so w awgusće 2000 ze 118 mužemi wobsadki podnurił. „Před 24 lětami mějachmy Kursk-katastrofu, kotraž bě symboliski spočatk swojeho knjejstwa; nětko widźimy kónc tutoho knjejstwa – a znowa je Kursk symbol.“
Awto wšudźe njepomha
Porjedźenka
To a tamne (13.08.24)
Znaty moderator US-ameriskeje talk show Jimmy Fallon je so w Bayerskej zaběžał. Medije wo tym rozprawjeja, zo bě sej wón koncert spěwarki Adele w Mnichowje wobhladał. Ze swojeho hotela chcyše sej nazajtra blišu wokolinu wotkryć. K jězorej, ke kotremuž poprawom chcyše, pak njedoběži. Nimale bjez miliny na šmóratku běše zhubjeny. Naposledk so pak zaso dom namaka.
Wo wysokosći kapsneho pjenjeza staj so mać a jeje syn w Erfurće tak jara wadźiłoj, zo dyrbješe žona policiju alarměrować. 15lětny bě swoju roznjemdrjenosć wo pječa přeniskim pjenjezu na meblach w bydlenju artikulował, kotrež je wobškodźił a po bydlenju mjetał.
Muslimojo a křesćenjo zhromadnje
Ankara/Vatikan (B/SN). Turkowski prezident Recep Tayyip Erdoğan je bamža Franciskusa telefonisce prosył přećiwo hanjenju čłowječeje dostojnosće zakročić. „Nabožne kaž tež moraliske hódnoty so wusměšuja, štož muslimow runje tak kaž křesćanow rani“, starosći so Erdoğan wosebje wo muslimow a křesćanow w Palestinje. Tak prošeše bamža wo to, zhromadnje wo měr z muslimami wojować.
Cyrkej w ilegalnosći
Shanghai (B/SN). W Chinje su křesćenjo nuzowani so registrować, hewak jich chłostaja. „Stat je njepřizjewjene kemše, katechezy a dźěło z młodostnymi zakazał,“ praji Wolfgang Huber, předsyda Chinskeho centruma w St. Augustin. Wěriwi, wosebje měšnicy a biskopja, kotřiž tajnje w cyrkwi skutkuja, su přesćěhani.
Solidarita z jezidami
Woheń při milinarni
Kijew/Moskwa (dpa/SN). W atomowej milinarni Saporischschja na juhu Ukrainy je so nawječor w chłódźenskich naprawach paliło. Hišće w nocy pak poradźi so wohnjowym wobornikam woheń dospołnje zhašeć. Zamołwity w regionje Jewgeni Balizki zdźěli, zo bě ukrainske wójsko do wohenja terrain wokoło milinarnje nadpadnyło. Strach pak žadyn njehrozy, wšako su wšitke bloki milinarnje wotšaltowane.
Žadaja sej kónc kontrolow
Podstupim (dpa/SN). We wotewrjenym lisće na komisiju EU kritizuja politikarki a politikarjo Zelenych kontrole na němskich mjezach, kiž bě zwjazkowa nutřkowna ministerka Nancy Faser (SPD) wukazała. W lisće rěka, zo njejedna Němska, kaž sydom dalšich krajow tež, konformnje Schengenskemu kodeksej wo mjezach. List su politikarjo nětko Ursuli von der Leyen přepodali.
Wjace hač 500 njeskutkow
Cil: Čiste rěčki
Přičiny kónca
Wjace US-wojakow přikazanych
Washington/Tel Aviv/Gaza (dpa/SN). Wójsko USA powjetši hladajo na wočakowany nadběh Irana swoju prezencu na Bliskim wuchodźe. Zakitowanski minister Lloyd Austin je wukazał, zo ma so z atomowym motorom wuhotowany nurjak „USS-Georgia“ do regiona podać. Nimo toho měli lětadłonošak „USS Abraham Lincoln“ a čołmy nurjak přewodźeć a tak jeho transit do regiona pospěšić. Tole zdźěli centrala wójska Pentagon.
Mjenowany lětadłonošak ze swojimi modernymi jetami typa F-35 přidruži so hižo w regionje přebywacej skupinje lětadłonošaka „USS Theodore Roosevelt“. W rozmołwje ze swojim israelskim kolegu w zastojnstwje bě minister Austin hladajo na „eskalěrowace regionalne napjatosće“ hišće raz winowatosć USA wuzběhował, „kóždy móžny krok nastupić, Israel zakitować“, rěka w zdźělence Pentagona dale. Galant warnowaše w mjezyčasu hižo režim w Iranje kaž tež libanezisku Hisbollah-milicu před wulkim nadběhom na Israel. Po zamordowanju wažneju funkcionarow Hisbollyh a Hammas běštej Iran a Hisbollah nadpady na Israel připowědźiłoj.
