To a tamne (27.12.21)
Sylne nócne zmjerzki wužili su ludźo wčera w Nižozemskej, zo bychu swój narodny sport pěstowali a ze smykačemi po zamjerznjenych kanalach a polach jězdźili. Lód bě hač do sydom centimetrow tołsty, tak zo bě wjeselo jenož wot wobmjezowanjow koronawirusa dla haćene: Na zjawnych lodowych čarach bě ličba wobdźělnikow wobmjezowana, zastaranske budki wostachu zawrjene. Přichodne dny wočakuja tam zaso ćopliše wjedro.
Stary tresor w haće namakałoj staj nan a jeho šěsć lět stary syn. Patoržicu wječor běštaj wobaj z nastrojom w porynsko-pfalcskim Bad Bergzabernje po puću, jako tresor wuslědźištaj. Železny kamor bě wurumowany. Policija na to tuka, zo su paduši tresor z bydlenja pokradnyli a wurubili. Detektor, kiž swojoraznu namakanku hakle zmóžni, bě nan swojemu synej k hodom darił.
Lauterbach: Omikron kónc lěta
Köln (dpa/SN). Zwjazkowy minister za strowotnistwo Karl Lauterbach (SPD) liči kónc lěta z wulkej žołmu chětro natykliweje warianty koronawirusa omikron tež w Němskej. „Žołmu tuchwilu hišće nimamy. To pak so kónc lěta a prěni tydźeń januara změni“, rjekny minister dźensa w rozhłosu WDR. Lauterbach z toho wuchadźa, zo třeće šćěpjenje potom hižo njedosaha a zo budźe štwórte trěbne. W někotrych krajach kaž we Wulkej Britaniskej je omikron hižo postajacy.
Putin žurnalistam wotmołwjał
Moskwa (dpa/SN). Ruski prezident Wladimir Putin je dźensa na swojej tradicionalnej kóždolětnej nowinarskej konferency na prašenja žurnalistow wotmołwjał. Postajowaca tema wjace hodźiny trajaceho zarjadowanja běchu napjatosće w konflikće Ukrainy dla. Tež přichod dotwarjeneho płunowoda Nord Stream 2 přitomnych zajimowaše. Hinak hač loni běchu sta žurnalistow w zarjadowanskim centrumje na kromje města přitomne. Wjace hač 500 zastupnikow medijow z tu- a wukraja bě so přizjewiło.
Akcija přećiwo koronje
Prěni dźeń hodownych prózdnin mějachu přistajeni ...
Ćeže dodawanja dźeń a wjetše
Minister Wöller: Protest so měša
Drježdźany (dpa/SN). Wukaz winowatostneho šćěpjenja přećiwo koronawirusej móhł po měnjenju sakskeho nutřkowneho ministra Rolanda Wöllera (CDU) protesty přećiwo wobmjezowanjam pohonjeć. „Čim dlěje pandemija traje, ćim bóle so scena radikalizuje“, rjekny Wöller powěsćerni dpa w Drježdźanach. „Pandemija je swoje slědy zawostajiła, eksistency zničiła a ludźi do hospodarskeje nuzy storhnyła.“ Psychologisce ćerpja pak tež ludźo kaž lěkarjo, chorobne sotry abo hladarjo, kotřiž hač k wučerpanosći dźěłaja.
„Někotryžkuli hněw je při protestach mjeztym widźomny.“ Prawicarskim ekstremistam a reichsbürgeram so přiběrajcy radźi so do srjedźizny towaršnosće dóstać. Rentnarjo a starši z dźěćimi demonstruja poboku prawicarjow. „Protest so měša. To mje starosći.“ Wulka njedowěra napřećo statej eksistuje na wuchodźe. „To pak njeje žane woprawnjenje za hidu a namóc.“
Znowa mjerzanje za Waršawu
Komisija EU prawniske kročele přećiwo Pólskej zahajiła
Brüssel (dpa/SN). Dwělomnych wusudow wustawoweho sudnistwa Pólskeje nastupajo status europskeho prawa dla je komisija Europskeje unije prawniske kročele přećiwo krajej wobzamknyła. Brüsselski zarjad je wčera tak mjenowane jednanje ranjenja zrěčenja dla zahajił. Te móhło so z nowej skóržbu před Europskim sudnistwom a nic naposledk z pjenježnymi sankcijemi přećiwo Waršawje skónčić.
To a tamne (23.12.21)
Noweho korčmarja pytaja na wosamoćenej kupje na sewjeru Jendźelskeje. Runje 20 hektarow wulka kupa Piel Island leži na sewjeru połkupy Furness a je něhdźe 800 metrow wot kraja zdalena. Nimo rozwaliny stareje twjerdźizny a někotrych rybarskich chatow je tam korčma Ship Inn. Dotalny wotnajer je zwrěšćił, po tym zo dyrbješe pub korony dla zawrěć. Najebać to chce komuna na kóždy pad noweho korčmarja namakać.
Wo wusadźeneho runje narodźeneho ćěšenka starała je so psyca w Indiskej. Wobydlerjo namakachu nahu holčku w zymnej nocy mjez młodźatami psycy, po tym zo bě dźěćko žałosćiło. Wone je strowe, kaž lěkar při přepytowanju zwěsći. Nětko pytaja za maćerju holčki. W Indiskej zas a zaso holcy wusadźeja, dokelž maja je swójby – hinak hač pola hólcow – za wulke pjenježne poćežowanje.
Jónkrótny krok a što so po tym sta
Dźěłowy zakład serbskeje rady jara njedospołny
Rada za serbske naležnosće w Sakskej je zastupnistwo, kotrež matej tudyši krajny sejm a statne knježerstwo słyšeć, dźe-li wo prawa serbskeje ludnosće dótkace so naležnosće. To wuchadźa z paragrafa 6, wotrězk 2 płaćiweho sakskeho Serbskeho zakonja. „Wšitke zakonje nastupajo, potrjechjace zajimy serbskeho ludu, dyrbi rada słyšana być. Při tym je jej zarjadnistwo krajneho sejma podpěrujo poboku.“ Takle citowachu Serbske Nowiny słowa prezidenta Sakskeho krajneho sejma dr. Matthiasa Rößlera (CDU) w zwisku z nowym jednanskim porjadom parlamenta na konstituowacym posedźenju Rady za serbske naležnosće w 7. wólbnej periodźe loni w meji.
Wo přichodźe regiona ludźi sobu rěčeć dać
Kritika na strukturach za jich změnu po kóncu zmilinjenja brunicy njepopušća. Nětko je so Zwjazk za wobswět a přirodoškit Němskeje (BUND) w Sakskej słowa jimał. Ludźo na městnje maja bóle zapřijeći być. Pod tymle aspektom móhł so tež kónc brunicy hač do lěta 2030 radźić, měni Lěwica.
Lěwica: Iniciatiwy sylnić
Drježdźany (dpa/SN). Sakski krajny sejm je dźensa na swojim poslednim lětušim posedźenju mjez druhim wo financnej politice a wo škiće klimy debatował. Temy běchu SPD a Zeleni na dnjowy porjad aktualneje hodźiny stajić dali. Třeća tema bě namjet Lěwicy. Ta chcyła hladajo na agresiwne protesty přećiwo politice koronawirusa dla ciwilnotowaršnostne iniciatiwy bóle sylnić. Wčera bě krajny sejm mjez druhim wobzamknył, slepych z wjac pjenjezami podpěrać.
Ludźi wosobinsce přeprosyć
Berlin (dpa/SN). Němska etikowa rada so za to wupraja, njedawno wobzamknjene winowatostne šćěpjenje za personal chorownjow a hladarnjow na dalše dźěle wobydlerstwa rozšěrić. Fachowcy namjetuja, ludźi zaměrnje a wosobinsce na šćěpjenje přeprosyć a jim samym rozsudźić dać, z kotrym serumom chcedźa šćěpjeni być. Etikowa rada je njewotwisny gremij 24 fachowcow, kotřiž zwjazkowe knježerstwo w etiskich prašenjach koronapandemije poradźuja.
Biden wabi za šćěpjenje
