Berlin (dpa/SN). Nawodnistwo CDU ­a CSU chce sej z jasnym wuprajenjom přećiwo zwyšenju dawkow a za podpěru na dobro mało zasłužacych dowěru wolerjow zdobyć. „Runje po pandemiji je zwyšenje dawkow wopačny puć. To by so trěbnemu hospodarskemu rozmachej spjećowało“, rěka w zhromadnym ste­jišću prezidijow CDU a CSU. W dokumenće, kiž powěsćerni dpa předleži, mjez druhim rěka: „Chcemy solidarny popłatk krok po kroku za wšitkich wotstronić a naprawy na dobro ludźi z małymi a srěnimi dochodami přesadźić. Unija w tym zwisku přilubi, najebać hoberske statne zadołženje, zwyšenja dawkow so wzdać. To by hospodarstwu zeškodźało a dźěłowe městna ničiło.

Lěwica wólbny program unije jako jebanstwo kritizuje. Z programom je dalši wottwar socialnych dobrotow a zniženje rentow hižo zaplanowane, šwika předsydka strony Susanne Hennig-Wellsow. Tež Zeleni program CDU/CSU kritizuja. Unija njepřeradźi, kak chce swoje slubjenja financować, strona zdźěla.

Wulke wuspěchi započinaja so z małymi kročelemi. Takle snano móhło so schwalenje dźewjeć dalšich projektow na dobro Łužicy w zwisku ze strukturnej změnu wopisować – chceš-li naležnosć pozitiwnje widźeć. Runočasnje pak so dźeń a bóle starosć předrěje, zo nima poprawom nichtó žadyn plan, kak dyrbjało po skónčenju zmilinjenja brunicy we Łužicy hospodarsce dale hić. Zo twarimy slědźenišćo za wodźikowe technologije, je bjez dwěla prawje. A zo su zamołwići Baršćanskeho tekstilneho muzeja pilni a kreatiwni, tohorunja wěrju. Trjebamy pak nuznje narunanje za 10 000 derje płaćenych dźěłowych městnow w brunicowych jamach a milinarnjach, kotrež najpozdźišo w lěće 2038 wotpadnu. Hač dalše idejowe wubědźowanja tomu dopomhaja, tak prawje njewěrju. Štož tuchwilu wobkedźbuju, je skerje wuraz powšitkowneje bjezradnosće. Hdyž słyšu žadanja, wudobywanje brunicy hižo do 2038 skónčić, je wone špatne začuće hišće hórše. Marko Wjeńka

Berlin (dpa/SN). Po raznych rozestajenjach z widźomnym zapozdźenjom je zwjazkowa kanclerka Angela Merkel (CDU) dźensa dokumentaciski centrum załožby „Ćěkanje, wuhnaće, wujednanje“ w Berlinje wotewrěła. Centrum ma so za dźěl noweje kultury wopominanja. Na městnje wuknjenja a dopominanja maja stawizny a přitomnosć nanuzowaneje migracije w srjedźišću stać. Prěnich wopytowarjow wočakuja wot jutřišeho.

W twarjenju, kotrež su za 63 milionow eurow ponowili, maja wjace hač 5 000 kwadratnych metrow płoniny za stajne a nachwilne wustajeńcy, čitansku žurlu a slědźenske wobłuki k dispoziciji. Hłownje dźe wo stawizny nanuzowaneje migracije hač do dźensnišeho časa a wo ćěkanje a wuhnaće něhdźe 14 milionow Němcow po Druhej swětowej wójnje. Přehladka je chronologisce zapołožena, zo bychu na teror nacionalsocialistow a na nadpad Němskeje na druhe kraje jako přičinu na to slědowaceho wuhnaća skedźbnili. Dóńt němskich ćěkancow bě lěta dołho přičina raznych debatow. Předewšěm we wukraju so bojachu, zo móhli so Němcy jako wopor prezentować.

Choćebuz (dpa/SN). Z pobrachowacym dešćom a horcotu jewi so dypkownje spočatk lěća problem dotalnych lět: Rěce Sprjewja kaž tež Čorny Halštrow matej přemało wody. Na to skedźbnja kraje přesahowaca dźěłowa skupina „Ekstremne situacije“ w zdźělence. Wona bě hladajo na minjenej suchej lěće dźěłać započała. Prawidłownje so fachowcy schadźuja ze zaměrom, naprawy Sakskeje, Berlina a Braniborskeje zdźěłać, zo bychu staw wody w Sprjewi a Čornym Halštrowje stabilizowali.

Při temperaturach nad 30 stopnjemi je so w juniju dotal jasnje přemało dešćowało, kaž zwěsćeja. Wot spočatka měsaca je wjedrarnja w Choćebuzu 3,8 litrow dešća naměriła. Přerěznje by to w juniju něhdźe 50 litrow być dyrbjało. Hač móža připowědźene njewjedra deficit wurunać, njeje wěste. Pozitiwne při­wšěm je, zo je so w spjatych jězorach Sakskeje w zymskich měsacach 2020 a 2021 dosć wody nazběrało a zo móža ju Sprjewi dodawać. Tež Grodkowska rěčna zawěra Sprjewju stabilizuje. Tam pak přez to staw wody wšědnje wo dwaj centimetraj spaduje.