Interny serbski wolejbulowy due
Aktualna tabulka
1. Viktoria Worklecy 6 15 : 3 14
2. Módro-běłe Wojerecy 6 10 : 12 8
3. TSV Kundraćicy 6 8 : 12 7
4. Viktoria Worklecy II 6 3 : 15 1
Hižo do jutrow běštej so žónskej zastupnistwje Viktorije Worklecy po dołhej přestawce zaso na domjacy wolejbulowy parket podałoj. Třeći kontrahent z Kundraćic bě hru cofnył, dokelž njeby dosć hrajerkow nastupić móhło. Z tym so hrě z 75:0 za prěnje kaž tež druhe mustwo Viktorije hódnoćeštej. Mustwje wužiwaštej hnydom składnosć, prěnju kaž tež wróćohru w domjacej hali we Worklecach wuhrać.
Za Viktoriju Worklecy zasadźene běchu: Anja Bielowa, Marina Köhlerowa, Stefanie Köhlerowa, Jennifer Otto, Rejzka Rawšec, Anita Salowskec
za Viktoriju Worklecy II nastupichu: Luisa Budarjec, Kira Hrjehorjec, Liza Hrjehorjec, Anne Kurzetz, Cecilia Schweitzerec, Tadeja Šeferec, Mirabelle Šimanec, Pia Šnajdrec, Rejzka Wjeńcyna
Viktoria Worklecy II – Viktoria Worklecy 0:3 (15:25, 10:25, 9:25)
Wotběhanje jutrownych jejow
Widźał, słyšał, napisał (19.04.22)
Što činja sportowcy najradšo nimo sameho sportowanja? Wo swojim hobbyju z druhimi jenak myslacymi bachtać – wo najnowšich treningowych metodach filozofować, mjezsobu sej plany za wubědźowanja činić, diskutować wo profijowej scenje. A najradšo wězo so wuměnjeć wo najnowšim, najlěpšim, najinowatiwnišim sportowym graće. W sportowych družinach z intensiwnym zasadźenjom materiala, kaž při kolesowanju, je tuta tema skoro njewučerpajomna. Tola kaž we wšitkich branšach ćerpja tež kolesowarjo pod ćežemi dowožowanja kolesow a dźělow. A to w času, hdyž je naprašowanje za kolesami tak wulke, kaž snadź hišće ženje. Wuskutki toho tak daloko sahaja, zo su njeznaći w januarje z nakładneho awta na němskej awtodróze kolesowanske dźěle pokradnyli, kiž bychu za montažu wjacorych tysacow kolesow dosahali.
Sport (14.04.22)
Koparske hry kónc tydźenja
16.04. 14:00 SV 09 Arnstadt –
Budissa Budyšin
16.04. 14:00 Wacker Nordhausen –
VfB 1921 Kśišow
18.04. 14:00 Biskopičanske KT 08 –
FC An der Fahner Höhe
18.04. 14:00 VfB 1921 Kśišow –
VFC Plauen
EWB-camp w Budyšinje
Energijowe a wodowe zawody Budyšin (EWB) a Budissa Budyšin přewjedźetaj wot 16. do 23. julija 24. EWB-koparski camp w dorostowym centrumje Humboldtowy haj. Nawod campa změja trenarjo z trěbnej licencu. Požadać móža so dźěći w starobje 9 do 14 lět. Wobdźělić smě so maksimalnje 31 hólcow a holcow. Tu někotre fakty za camp, kotryž płaći na wobdźělnika 285 eurow: kompletne wuhotowanje z drastu (trikot, cholowy a nohajcy), połne zastaranje z přenocowanjom w dwuposchodowych łožach, trening z tójšto wubědźowanjemi, wólnočasne aktiwity (badminton, tenis, blidotenis, kicker, koparski tenis, kupanje w Sprjewinej kupjeli), lěhwowy woheń z grilowanjom, turněry a hišće tójšto wjac. Na prašenja wotmołwi Robert Steinbach pod abo telefonisce 0177 6743094.
Kćenjowe běhi a kolesowanje
Tradicionalne wubědźowanje nachwatali
54. Budyski silwesterski běh hakle lětsa w měrcu wotměli
Korona je přičina, zo njehodźeše so tradicionalny silwesterski běh 31. decembra 2021 w Budyšinje přewjesć. Tohodla su wubědźowanje běharjow a běharkow na měrc přestorčili a su jón 20. měrca wuspěšnje přewjedli. Wšako bě wubědźowanje hižo lěta 2020 korony dla wupadnyć dyrbjało. Hižo nětko nadźijeja so lubowarki a lubowarjo běhanja, zo móža lětuše wubědźowanje, mjeztym 55., na silwesterskim dnju wotměć.
Směja so z prěnjeho městna tabulki
Radworčenjo wolejbulowy turněr „Witamy nalěćo“ dobyli
W Ralbičanskej ćěłozwučowarni wotmě so minjeny tydźeń wolejbulowy turněr pod hesłom „Witamy nalěćo“ abiturneho lětnika Serbskeho gymnazija Budyšin (SGB) z lěta 1996. Pjeć wólnočasnych mustwow bě přitomne, wubědźowanje doby suwerenje cyłk ST 1922 Radwor.
Jako wotewri hłowny organizator turněra a hrajer mustwa 1296 Jan Hrjehor wólnočasny wolejbulowy turněr w Ralbicach, běchu wšitcy přitomni wjeseli, po dwulětnej koronapřestawce zaso při wysokim saku so wubědźować móc. Mustwje z Worklec a Kulowa do turněra sčasom wotprajištej a tak wojowaše pjeć cyłkow na dwěmaj hrajnišćomaj kóždy přećiwo kóždemu dwě sadźbje hač do 15 dypkow.
Póndźelny wječor skićeše tři překwapjenki. Prěni raz wobdźělichu so wólnočasni wolejbulisća Sokoła Ralbicy, kotřiž su swój treningowy čas za tutón turněr k dispoziciji stajili. Wutrobny dźak za to. Hačrunjež běchu na kóncu jeno pjate, poradźichu so jim rjane akcije při saku a w pólnym škiće kaž tež dwě dobytej sadźbje z 18:16 přećiwo wučerjam SGB a 16:14 přećiwo SJ Chrósćicy.
Wažny šěsćdypkowy derby
ST 1922 Radwor – ST Traktor Malešecy 3:0 (1:0)
Zestawa domjacych: Grenzemann – Reineke, Jendrewski, Šěrak, Wjeńka, Glücklich, Johannes Wjacławk (73. Seiler), Pječak, Nuk, Schulze (90. Hetaš), Wróbl (88. Šnajder)
zestawa hosći: Haupt – Wegehaupt, Tietze (46. Seiler), Swakon, Schmidt, Günther, Benad, Hennersdorf, Becker, Winter, Bolz
Při prawym aprylskim wjedrje bě njedźelu něhdźe 150 přiwisnikow kopańcy do Radworskeho sportoweho centruma přichwatało. Tam wotmě so duel mjez prěnim a třećim wokrjesneje ligi, stafle 2. Domjace mustwo dyrbješe tutu hru dobyć, zo by dypkowy wotstawk ke kontrahentej dale wobstał a so samo wutwarił. Wšitke statistiki do duela wěšćachu dobyće Radworskeho mustwa. Dotal doma ani jeničku hru přěhrali njejsu. A přijimować dyrbjachu jenož jedne přećiwniske wrota. Cyłk z Malešec pak njesměš ženje podhódnoćić, wosebje, hdyž steji w zestawje mjeno nadběhowarja Marca Benada.
W razantnym serbskim derbyju na kóncu podleželi
SJ Njebjelčicy –
ST 1922 Radwor 1:2 (0:0)
Zestawa domjacych: Hahn – Reineke, Kral, Hrjehor, Šołta (85. Šmit), Matješk, Pawlik, F. Domš, Čornak (45. Malaškin), O. Domš, Korjeńk
zestawa hosći: Grenzemann – Reineke, Šěrak, Schulze, Nuk, Wróbl (90. Hetaš), Wjacławk (63. Šnajder), Jendrewski, Glücklich (10.Wjeńka), Paška, Pječak
Po pjeć měsacach přestawki bě so skónčnje zaso koparski bój wo dypki na domjacym trawniku w Njebjelčicach wotměł. A to hnydom přećiwo načolnikej wokrjesneje ligi, stafle 2. Njebjelčenjo běchu so dosć derje na kompaktnu a ćělnje wužadacu hru přećiwnika přihotowali, wšako běchu to w zašłymaj partijomaj na Radworskim trawniku nazhonili. Nažel pak dyrbješe so trenarska dwójka Handrij Krawčik/Daniel Ričel třoch stajnych hrajerjow zranjenja abo chorosće dla krótkodobnje wzdać. Ći, kotřiž buchu zasadźeni, pak přiwzachu hoberske wužadanje a pokazachu tak po dołhim času zaso jónu wuběrny wukon. Tak by na kóncu wuwojowany dypk na swójskim konće stać móhł, jeli njeby jědnatka w poslednjej mjeńšinje tuteje dosć fairneje partije wšitko rozsudźiła.
Hrajny plan steji
Flensburg (SN/JaW). Hrajny plan za lětuše koparske mišterstwa europskich narodnych mjeńšin, kotrež wotměja so wot 25. junija do 3. julija w Korutanskej, je jasny. Wčera stej jón Federalistiska unija europskich narodnych mjeńšin (FUEN) a narodna mjeńšina Korutanskich Słowjencow w Awstriskej jako wuhotowarjej turněra wozjewiłoj. Kaž z běrowa FUEN w Flensburgu rěka, njebu hrajny plan, kotryž su za turněr 2020 přihotowali, změnjeny. Serbska wubranka nastupi tuž mjez druhim we Velikovecu (Völkermarkt), w Sele (Zell) a w Galiciji (Gallizien). Wosebity budźe łužiskim koparjam zawěsće duel přećiwo hosćićelskemu mustwu Koroška, wutoru, 28. junija, we wulkim Wörthersee-stadionje w Celovcu (Klagenfurt). W arenje, w kotrejž je za 30 000 ludźi městno, hraje tež Awstriske narodne mustwo.
