Medaljowy špihel

Staw po 67 rozsudach:

   z s b

1. Norwegska   9 5 7

2. Němska  8 5 1

3. USA   7 6 2

4. Nižozemska  6 4 2

5. Šwedska  5 3 3

6. Ruska OC   4 6 8

7. Awstriska   4 6 4

8. China  4 3 2

9. Francoska  3 6 2

10. Šwicarska   3 0 5

Peking (JBo/SN). Minjeny olympiski kónc tydźenja měješe mnoho wjerškow. Jedyn z nich běše wčerawše dobyće Američanki Erin Jackson w spěšnosmykanju na 500 metrow. Jackson, kotraž steješe lěta 2017 prěni króć scyła na tajkich smykačach, je zdobom prěnja ćmowa olympiska dobyćerka w mjenowanej disciplinje.

Němska lodohokejowa wubranka přěhra­­­ wčera třeću skupinsku hru z 2:3 přećiwo mustwu z USA. Jutře pak ma w zetkanju ze Słowakskej dalšu šansu so za štwórćfinale kwalifikować. W sněhakowanju na dołhich čarach w stafli pola muži docpě němski kwartet Janosch Brugger/Friedrich Moch/Florian Notz/Lucas Bögl 5. městno po 4 x 10 km.

Ach, kak sym so wjeselił za 15lětnu Kamilu Walijewu, kiž je při krasno­smykanju jasnje dobyła, dokelž je wosebitu figuru, wjerćenje, prěni raz tak zmištrowała, zo je so w běhu jednoho skoka hnydom štyri króć wo swójsku wósku wjerćała a potom tež hišće bjez zmylka přizemiła. Wona běše prěnja žona, kiž je to tak zamóhła. A je swój ruski team k złotu wjedła. Dotal pak njeje medalja sydała. Wumjetuja Walijewej wužiwanje trimetacidina. Za schorjenje angina pectoris wužiwany medikament móže pak tež wutrajnosć polěpšić a je tohodla za profijow zakazany. Chibazo maš jasny dopo­kaz, zo jón trjebaš. Nětko su, kaž prajene, wozjewili, zo bě dopingowy test z decembra pozitiwny.

Medaljowy špihel

Staw po 50 rozsudach:

   z s b

1. Norwegska   6 3 5

2. Němska   6 3 0

3. Šwedska  5 2 2

4. Awstriska  4 6 4

5. USA    4 5   1

6. Nižozemska   4 4   1

7. China   3 3 0

8. Ruski OC  2 4 6

9. Italska   2 4 4

10. Japanska   2 2 4

Pytaja wuhotowarja

Němski wolejbulowy zwjazk pyta ­wuhotowarja za lětuše Němske wolejbulowe mišterstwa seniorow, a to za mustwa žonow starobnych klasow Ü 37, 43 a 54 a za mustwa muži starobnych klasow Ü 35, 47 a 69. Požadanja dyrbja so hač do 20. měrca na zwjazkowej runinje wotedać. Wupisanje steji na internetnej stronje Sakskeho wolejbuloweho zwjazka (SSVB).

Próstwy sčasom wotedać

Tež prezidij SSVB ma pokiw, a to mjez druhim za Sportowe towarstwo Viktoriju Worklecy a ST Marijinu hwězdu. Hłowny wuběrk krajneho wolejbuloweho zwjazka zetka so zaso 7. meje. Próstwy dyrbja so hač do 12. měrca wotedać.

Koparski camp nad morjom

Tež lětsa chce Zapadołužiski koparski zwjazk (WFV) zaso swój „ewag Kamjenc – prózdninski koparski camp nad Baltiskim morjom“ přewjesć. Jubilejny dźesaty budźe potom wot 16. do 23. julija prěni raz w młodowni w Ribnitz-Damgartenje. Přizjewić smědźa so holcy a hólcy lětnikow 2008 do 2011. Cyłkownje 48 městnow ma WFV k dispoziciji. Dalše informacije a přizjewjenske modality namakaće na internetnej stronje WFV.

BFV a FCE hrać njebudźetej