Wjac Europy abo mjenje?
Wólbny forum za wuchodnu Saksku w Žitawje wulki zajim zbudźił
Žitawa (SN/mb). Šěsć njedźel do wólbow europskeho parlamenta je najwjetši čas, so z pozicijemi stronow zaběrać. Tohodla je Sakska krajna centrala za politiske kubłanje (SLpB) pjatk wječor do Žitawskeho „Kronenkino“ na prěni wólbny forum přeprosyła. Předsydźe satiriskeje strony Martinej Sonnebornej běše wječork najskerje přechutny: Připrajił drje wón bě, přišoł pak njeje. Porno „serbskim debatam“ krajneje centrale su w Žitawje wjacori sobudźěłaćerjo Security při zachodźe toboły wopytowarjow kontrolowali. Druhi rynk sylnych muži sej kóždeho kruće wobhlada, kotryž so do žurle poda.
Na derje wobsadźenej žurli běše zymnišo hač wonka na hasy. Najebać to bě nalada dobra. Tež wjele młodostnych je přichwatało. Debata běše takrjec předhra wulkeho sobotnišeho swjedźenja Europy w třikrajowym róžku. Zajutřišim budźe tomu dwaceći lět, zo bu Europska unija do wuchoda rozšěrjena.
Próstwa šamana
Vatikan (B/SN). Njedawno je bamž Franciskus šamana a nawodu indigeneje ludoweje skupiny Yanomami w Brazilskej Davija Kopenawu na priwatnej awdiency přijał. Tutón prošeše wo pomoc při škiće kónčiny Amaconasa, kotryž drje je mjezynarodnje přilubjeny, ale so njedodźerži. Davi Kopenawa prosy bamža, zo by prezidenta Luiza Inácijs Lulu da Silvu wo hnydomnym zakročenju přeswědčił.
Noworjadowanje ceremonijow
Rom (B/SN). Swjaty wótc bamžowske pohrjebne ceremonije tuchwilu znowa rjaduje. Na marach stać chce bamž Franciskus w zawrjenym kašću a na žanym katafalku. Z tym postupuje pontifeks přećiwo dotalnej tradiciji. Tež wo wašnju wobchada ze zemrětymi biskopami we Vatikanje tuchwilu diskutuja.
Jubilej bratrowstwa Taizé
„Žana zwada“
Zhorjelc (SN/mb). Katolska wosada swjateho Wjacława w Zhorjelcu je dźělne wólby wosadneho předstejićerstwa a nowowólby wosadneje rady přestorčiła – to běše nětko samo wulka tema w „Niederschlesischer Kurier“: Pozadk pozdatnje je, zo prawiznik Jakob Garten nic jenož za předstejićerstwo we wosadźe kandiduje, ale tež na lisćinje AfD za měšćansku radu. To je, tak awtor přinoška Till Scholtz-Knobloch, pola někotrych pohóršk zbudźiło, kiž pak so na druhich stronskopolitiskich kandidaturach mjez druhim za CDU njepostorkuja.
Reichsbürgerojo wobwinowani
Stuttgart (dpa/SN). Dźewjeć pozdatnych reichsbürgerow skupiny wokoło Heinricha XIII. princa Reußa dyrbi so wot dźensnišeho před Stuttgartskim wyšim krajnym sudnistwom zamołwić. Jim wumjetuja čłonstwo w teroristiskim zjednoćenstwje a „přihotowanje wulkopřeradniskeho předewzaća“. Jednanje w Stuttgarće je prěnje z třoch mamutowych procesow přećiwo skupinje, kotraž je pječa planowała, zwjazkowe knježerstwo namócnje wotstronić.
Raznišo přećiwo islamistam
Hamburg (dpa/SN). Po wot islamistow organizowanym zarjadowanju w Hamburgu žadaja sej frakcije w zwjazkowym sejmje razniše naprawy a zakaz islamistiskeho towarstwa. „Wukrajnika, kiž wohrožuje swobodno-demokratiski zakładny porjadk w Němskej, móžeš wupokazać“, rjekny zastupowacy frakciski šef FDP Konstantin Kuhle nowinarjam. Na demonstraciji w měšćanskim dźělu St. Georg běchu sobotu plakaty z hesłami kaž „Němska – diktatura hódnotow“ abo „Kalifat je rozrisanje“ widźeć.
Pandemiju lěpje zmištrować
Znajmjeńša štyri smjertne wopory žadali su sej wjacore tornada, ...
Bórze zrěčenje Ukrainy a USA
Chrupalla za jednotu strony
Abbas šwika zničenja w Gazy
Riad/Gaza (dpa/SN). Palestinski prezident Mahmud Abbas je zničenja w Gazaskim pasmje „bjez runjeća“ mjenował. „Štož so w Gazy stawa, hišće nihdy njemějachmy, ani w Druhej swětowej wójnje“, rjekny Abbas wčera w Sawdi-Arabskej při wotewrjenju dwaj dnjej trajaceho swětoweho hospodarskeho foruma. Wón poćahowaše so při tym na społnomócnjeneho EU za wonkowne naležnosće Josepa Borrella, kiž bě so w parlamenće EU podobnje wuprajił. Tři štwórćiny Gazaskeho pasma su zničene, Abbas praji.
W Riadźe su wčera Open Forum zahajili, hospodarsku konferencu swětoweho hospodarskeho foruma (WEF) mjez druhim k temam wobswět, strowota a financy. Na njej chcychu wjacori wonkowni ministrojo zapadnych a arabskich krajow wo połoženju w Gazaskej wójnje wuradźować. Na konferencu wočakuja wonkownych ministrow USA, Wulkeje Britaniskej a Němskeje kaž tež Egyptowskeje, Jordaniskeje a Sawdi-Arabskeje. Planowane su wjacore zhromadne terminy. Israel so na konferency njewobdźěli.
Wólbni pomocnicy atakowani
Politiske strony skorža na namóc w přihotach komunalnych wólbow
Lipsk/Podstupim (dpa/SN). Při wupowěsnjenju wólbnych plakatow w Sakskej a Braniborskej su minjeny kónc tydźenja wjacorych ludźi nadběhowali. Kaž policija zdźěli, je w Sakskej dotal njeznaty muž 37lětnemu čłonej Zelenych rěbl wutorhnył a z nim plakat wobškodźił. 37lětny so při tym snadnje zrani a je pad policiji přizjewił. Njedaloko Šwikawy nadběhowaše dotal njeznaty w nocy na sobotu dweju pomocnikow, kotrajž njedaloko Stadiona zapadneje Sakskeje plakaty Zelenych připrawištaj. Po werbalnym rozestajenju wuwjercholi zwada w namócnosćach. Njeznaty hrabny sej wjacore plakaty a so zminy.
W Lipsku bu 25lětny w nocy na njedźelu atakowany, jako plakaty strony Volt přiwjazowaše. Po informacijach policije bě njeznaty spočatnje wjacore politiske strony hanił a so na to do pomocnika dał. Při rozestajenju biješe njeznaty 25lětnemu pomocnikej z pjasću do mjezwoča. Policija je přepytowanja ranjenje ćěła dla zahajiła.
