Srědki přiměrić
Berlin/Budyšin (SN/at). Budyska zapósłanča zwjazkoweho sejma Caren Lay (Lěwica) kritizuje, zo zwjazkowe knježerstwo w naćisku za etatowy zakoń 2018 žane srědki za nałožowanje serbskeje rěče w digitalnych medijach njepřewostaja. „To dalši raz pokazuje, zo zwjazkowe knježerstwo přechod do digitalneho wěka a přichod serbskeje rěče wohroža“, zwěsći zapósłanča. Lěwica sej žada „srědki zaso přewostajić, zo hodźał so přiměrjeny digitalny poskitk w serbskej rěči wuwić“. W etatowym naćisku je w tym nastupanju přispomnjenje zakótwjene, zo „wučinja suma hač do 31. decembra 2016 njepřetrjebanych srědkow samohospodarjenja 608 000 eurow“. Tež loni njeběchu žane pjenjezy za tón zaměr planowane, lěta 2016 bě jich 765 000 eurow.
Hroža zetkanje wotprajić
Seoul (dpa/SN). Hněwajo so na wojerski manewer njedaloko swojeje mjezy Sewjerna Koreja hrozy, historiske zetkanje mócnarja Kima Jong Una z prezidentom USA Donaldom Trumpom wotprajić. Ze samsneje přičiny su tež za dźensa planowane wujednanske rozmołwy z Južnej Koreju wotprajili. Najebać politiske přibliženje je wójsko Južneje Koreje zhromadnje z jednotkami USA kóždolětny wojerski manewer zahajiło. Sewjerna Koreja ma jón za „wědomu prowokaciju“.
Diplomaća wupokazani
Istanbul (dpa/SN). Turkowske knježerstwo je po israelskim wulkopósłancu tež generalneho konsula kraja namołwiło kraj wopušćić, zdźěla turkowske wonkowne ministerstwo w Ankarje. Je to reakcija na razne postupowanje Israela přećiwo Palestinjanam w Gazaskim pasmje. Mjeztym je tež Israel turkowskeho wulkopósłanca z kraja wupokazał. Turkowski statny prezident Recep Tayyip Erdoğan bě postupowanje Israela „genocid“ mjenował. Na to dóńdźe mjez Turkowskej a Israelom k diplomatiskej eskalaciji.
Nakładne awta do Gazy
Do Rogeńskeho parka na kromje Choćebuza poněčim lěćo zaćehnje. ...
Kritizuja nowy zakoń
Wuradźuja wo Iranje
Merkel etat 2018 zakitowała
Berlin (dpa/SN). Zwjazkowa kanclerka Angela Merkel (CDU) je napinanja knježerstwa wuzběhnyła, tež přichodny etat bjez noweho zadołženja zestajeć móc. „To je wšo druhe hač samozrozumliwe“, rjekny wona w generalnej debaće wo hospodarskim planje 2018 dźensa w zwjazkowym sejmje. Němska chce nimo toho klětu prěni króć po 2002 zaso hornju hranicu zadołženja dodźeržeć, kotraž wučinja 60 procentow nutřkokrajneho bruttoprodukta. Je to kurs sprawnosće přichodnym generacijam napřećo. Wulka koalicija CDU, CSU a SPD planuje lětsa wudawki 341 miliardow eurow. Hospodarski plan chcedźa po wuradźowanjach spočatk julija wobzamknyć.
Frakciska předsydka AfD Alice Weidel je uniji a SPD wumjetowała, zo zjawnosć jebatej. Knježace strony rěča wo wurunanym etaće, wona praji. We woprawdźitosći pak sedźa dawkipłaćerjo na hoberskej horje dołha. Tak so přichodnym generacijam hižo nětko ćežki kamjeń wokoło šije powěsnje. Knježerstwo z „absurdnej dawkowej politiku“ předewšěm ludźi ze srjedźnymi a niskimi dochodami poćežuje, štož je njesprawne.
Solidarni z ruskej mjeńšinu
Podpisma iniciatiwy Minority SafePack knježerstwu Letiskeje přepodali
Riga (SN). Prezident Federalistiskeje unije europskich narodnych mjeńšin (FUEN) Loránt Vincze wobchadźenje Letiskeje z ruskej mjeńšinu w kraju raznje zasudźa. Na nowinarskej konferency w stolicy Rize wón spočatk měsaca na to pokaza, zo słuša Letiska k tym krajam w Europje, w kotrychž je škit narodnych mjeńšin chětro problematiski.
Do toho běchu zastupnikam letiskeho knježerstwa cyłkownje 8 252 podpismow přepodali, z kotrymiž iniciatiwu Minority SafePack FUEN w Letiskej podpěruja. „Ruska zhromadnosć w Letiskej je we wosebje ćežkim połoženju. Tak so knježerstwo dale spjećuje čłonam ruskeje mjeńšiny staćanstwo spožčić. „Je wěrjenjepodobne, zo Europska unija situaciju tak mjenowanych „alien citizens“ (wukrajnych wobydlerjow) we wobłuku swojich mjezow akceptuje a tak čini, jako njeby tajkich problemow było. Kóždy pak wě, zo wone wobsteja a maja so rozrisać.“
To a tamne (16.05.18)
Zwadu mjez mužom a papagajom dyrbjachu policisća zakónčić. Dokelž běchu hižo dlěši čas wołanje w bydlenju w badensko-württembergskim Lörrachu słyšeli, alarmowachu susodźa policiju. Ta pak nańdźe chětro njezwučeneju kontrahentow. 22lětny muž přizna, zo bě so na papagaja swojeje přećelki hněwał a na njeho rjejił. Ptak reagowaše na to ze zwukami, kotrež klinčachu kaž šćowkacy pos. Zastojnicy wobeju změrowachu.
Mylnje dwaj hektaraj lěsa wotpalił je muž w saksko-anhaltskim Körbelitzu. 40lětny chcyše při najrjeńšim wjedrje z płunowym palakom njerodź na chódniku wotstronić. Při tym pak trawnik zapali. Na to chwataše do domu, zo by z bowom wody woheń zhašał. Jako so nawróći, pak běchu so płomjenja hižo na bliski lěs rozpřestrěli. Bow wody wjace njepomhaše, wohnjowa wobora dyrbješe přijěć.
Nowy móst na kupu Krim
Moskwa (dpa/SN). Ruski prezident Wladimir Putin je dźensa móst mjez přiswojenej něhdyšej ukrainskej połkupu Krim a ruskim teritorijom wotewrěł. Twar je z 19 kilometrami najdlěši Ruskeje. Poprawom chcychu móst hakle kónc lěta dotwarjeny měć, wot jutřišeho pak móža jón awta hižo wužiwać. Železniski wobchad budźe wot klětušeho móžny.
Nahrawanja wužiwajomne
Karlsruhe/Magdeburg (dpa/SN). Nahrawanja minikamerow w awtach hodźa so při wuhódnoćenju wobchadnych njezbožow jako dopokaz wužiwać. To je Zwjazkowe sudnistwo w Karlsruhe dźensa rozsudźiło. To pak njerěka, zo smě so permanentnje awtomatisce filmować. Wšako to prawa njewobdźělenych rani. Přiwšěm su nahrawanja w ciwilnych procesach wužiwajomne. Skoržił bě šofer awta z Magdeburga, kiž chcyše z pomocu filma swoju njewinowatosć dopokazać. Ani hamtske ani krajne sudnistwo pak nochcyštej nahrawanja widźeć.
Sejm debatuje wo etaće
