Z islamom so zeznajomić
Schkeuditz (B/SN). Pod hesłom „Zetkanje z islamom“ steji mała a stajnje wotewrjena wustajeńca na lětanišću Lipsk/Halle. Zestajał je ju farar Paul Christian wot ekumeniskeho dušepastyrstwa lětanišća. Zestajer prosy sej ju wobhladać a so ze swětowymi nabožinami kaž tež jeje přisłušnikami zeznajomić.
Tež politisce skutkować
Berlin (B/SN). Arcybiskop Berlina Heiner Koch je katolske swójbne kubłanišća a zwjazki namołwjał, přewzać tež politisku a towaršnostnu zamołwitosć. Je wažne nutřkownocyrkwinsce skutkować, angažement pak ma tež dale hić. Cyrkej, jeje towarstwa a kubłanišća měli tež měć hódnoty křesćanstwa, swójby a mandźelstwa dale dawać.
ProChrist live
Melle (B/SN) Milion wěriwych je ewangelizaciju „Pro Christ“ wot 11. do 17. měrca sćěhował, kaž zarjadowar zdźěli. Zarjadowanja pod motom „Je to móžno?“ wusyłachu na 500 městnach w Němskej a Europje kaž tež přez Bibel TV a ERF-medije. Po informacijach nošerja su sobudźěłaćerjo na městnach zarjadowanjow a při telefonje mnohe dušepastyrske rozmołwy wjedli.
Z prawej měru měrić
Znapřećiwjenje zapodał
Madrid (dpa/SN). W Němskej zajaty bywši šef katalanskeho regionalneho knježerstwa Carles Puigdemont je na Španiskim wyšim sudnistwje znapřećiwnjenje přećiwo wumjetowanej rebeliji zapodał. Nimo toho skorži wón přećiwo wumjetowanju, zo je zjawne srědki znjewužiwał. To su španiske medije wčera wozjewili. Dale ze znapřećiwnjenja wuchadźa, zo njeje na dnju referenduma wo njewotwisnosć loni 1. oktobra k žanej namocy dóšło. Schleswigsko-holsteinske generalne statne sudnistwo chce tón tydźeń rozsudźić, hač jeho španiskej justicy přepoda.
Putin pola Erdoğana
Istanbul (dpa/SN). Ruski prezident Wladimir Putin chcyše so dźeń do syriskeho wjerškoweho zetkanja z turkowskim statnym šefom Recepom Tayyipom Erdoğanom w Ankarje zetkać. Tema zeńdźenja je na přikład zhromadne postupowanje w boju přećiwo terorej. Na syriskim wjeršku jutře w Ankarje wobdźěli so tež iranski prezident Hassan Ruhani. Zhromadnje chcedźa třo statni šefojo wo boju přećiwo terorej a wo zakónčenju wobydlerskeje wójny w Syriskej wuradźować.
Netanjahu dojednanje cofnył
Pod hesłom „Wotbrónić město brónić“ su wčera třeći raz ...
Z rezoluciju přećiwo koncertej
Zhorjelc (AK/SN). Z rezoluciju reaguja demokratiske strony Zhorjelskeho wokrjesneho sejmika na planowane zarjadowanje neonacijow wot 20. do 22. apryla pod hesłom „Tarč a mječ“ z koncertom a bojowniskim treningom. Wobzamknyli su ju wokrjesni radźićeljo minjenu srjedu z jasnej wjetšinu 56 zapósłancow. Wosom zastupjerjow, předewšěm z frakcije AfD, je so hłosa wzdało. Skupina NPD njebě so na wothłosowanju wobdźěliła. „My čłonojo wokrjesneho sejmika Zhorjelc, podpěrujemy měrowy swjedźeń we Wostrowcu, kotryž samsny čas přewjedu. Namołwjamy wobydlerjow, institucije, towarstwa a přemysłownikow wokrjesa, so tutej formje ciwilneje kuraže přizamknyć“, rěka w rezoluciji. Wokrjesni radźićeljo chcedźa na měrowym swjedźenju aktiwnje sobu skutkować. Wostrowc a cyły wokrjes njeměłoj so ze zarjadowanišćom prawicarskich ekstremistow stać.
„Kóždy ma prawo na swój kraj“
Washington (dpa/SN). Sawdi-arabski princ Mohammed bin Salman je zwuraznił, zo ma Israel prawo na swójski kraj. „Wěrju do toho, zo maja ludźo wšudźe prawo, měrliwje w swojim staće žiwi być“, podšmórny 32lětny w wčera wozjewjenym interviewje magacina USA The Atlantic. Po jeho słowach maja Palestinjenjo kaž Israelčenjo prawo na swój kraj. Zo móhli wšitkim stabilitu zmóžnić a normalne poćahi wudźeržować, je měrowe zrěčenje trěbne.
Islamske konserwatiwne kralestwo nima k Israelej žane diplomatiske poćahi, je pak po měnjenju fachowcow zakładnje zwólniwe poměr normalizować. W samsnym času Sawdi-Arabska Palestinu podpěruje.
Kaž bin Salman rjekny, ma jeho kraj nabožne starosće dóńta swjateje mošeje w Jerusalemje a prawow Palestinjanow dla. „Nimamy žane předsudki napřećo druhim ludźom“, wón doda. Hospodarstwo w Israelu dale a bóle rozrostuje, na čimž ma wězo tež Sawdi-Arabska wulki zajim. By-li měr knježił, bychu kraje kaž Egyptowska abo Jordanska wjele wjac zhromadnych zajimow z Israelom měli.
To a tamne (03.04.18)
Zadwělowany muž je so nětko na policiju wobroćił a wo pomoc prosył. 34lětny njewědźeše sej žaneje rady, kak móhł poćah k žiwjenskej partnerce zakónčić, dokelž so z njej hižo njerozumi. Zastojnica jemu tuž wšelake alternatiwy rozkładźe. Hač je sej wón pokiwy k wutrobje wzał, policiji znate njeje.
Město toho zo by twochnył, je rubježnik na policiju čakał a smě nětko na 15 měsacow do jastwa. Z nabiwanskim kablom handyja wón zak kapy formowaše, zo wupadaše to kaž pistola, a tak hrožeše wobsedźerjej wobchoda. Jako pak so tón z chětro prawdźiwje skutkowacym rewolwrom wobaraše, so nadpadnik cyle spěšnje poda. Wobchodnik jemu namjetowaše: Pak nablaku ćeknje pak z nim hromadźe na policiju čaka. Wudrěwar rozsudźi so za to čakać.
Za dialog z Ruskej
Podstupim (dpa/SN). Předsyda Němsko-ruskeho foruma Matthias Platzeck (SPD) je so nastupajo rozkoru z Ruskej přećiwo dalšim sankcijam a za nowy dialog wuprajił. „Hižo dlěje zaso wo to dźe, měr na našim kontinenće zawěsćić“, wuzběhny wón wčera we wusyłanju tagesschau24.de. W tym zwisku skedźbni na wosebitu historisku zamołwitosć Němskeje. Tež zwjazkowy wonkowny minister Heiko Maas (SPD) ma za wažne so z Ruskej wěcownje rozestajeć.
Třidnjowske wólby zakónčene
Kairo (dpa/SN). Wólby egyptowskeho prezidenta su nimo a dobyće dotalneho šefa knježerstwa Abdela Fattaha al-Sisija hižo wěste. Woprawdźiteho konkurenta wón žanoho njeměješe. Oficialny wuslědk třidnjowskich wólbow budźe póndźelu wozjewjeny. Hišće wčera bě wólbna komisija njewolerjam z pjenježnej pokutu hrozyła, jeli so na wólbach njewobdźěla. Tak chcychu ličbu wolerjow hišće raz powjetšić.
Rezoluciji schwalili
Tysacy ludźi wopominachu wčera z pochodom minjeny pjatk zamordowanu ...
Stejnišća wěste za přichod
Berlin (SN). Konflikt nastupajo šmórnjenje dźěłowych městnow a zawěsćenje stejnišćow koncerna Bombardier w Němskej traje mjeztym hižo dwě lěće. Wčera je jeho dohladowanska rada w Berlinje wo wuslědkach jednanjow hladajo na socialny plan a wurunanje zajimow informowała. „Bywše plany předewzaća, stejnišća zawrěć a přistajenych pušćić, móžachmy zhromadnje ze wšěmi němskimi stejnišćemi wotwobarać“, zdźěli wobwodny nawoda dźěłarnistwa IG metal za Berlin-Braniborsku-Saksku Olivier Höbel. Hač do kónca lěta 2019 njebudźe nikomu ze sobudźěłaćerjow ze zawodnych přičin wupowědźene.
Hižo do toho hněw komisije dla
Berlin (dpa/SN). Zo by mjezynarodne klimowe zaměry docpěła, ma Němska swoje brunicowe milinarnje zawrěć. Wulkej prašeni pak stej, hdy a kak. Rozsudźić ma to komisija, ale hižo do jeje wutworjenja je tójšto mjerzanja. Wodźace němske wobswětowe zwjazki so na komisiji jenož pod wěstymi wuměnjenjemi wobdźěla, štož zastupjerjow z wobłuka hórnistwa hněwa. Wobswětoškitarjo maja wuwaženu wobsadku zastupjerjow za wažnu. Dale woni chcedźa, zo zwjazkowe hospodarske a zwjazkowe wobswětowe ministerstwo komisiju zhromadnje nawjedujetej. Nimo toho ma so kruty plan wo kóncu brunicoweho zmilinjenja nastajić. Tež hnydomny program za dodźerženje němskeho klimoweho zaměra lěta 2020 sej wobswětoškitarjo žadaja. To su wuměnjenja, kotrež je sydom w Němskej wodźacych wobswětowych zwjazkow wobzamknyło.
