Knježerstwo dale bjez nawody
Barcelona (dpa/SN). Wulke separatistiske strony w Katalonskej zwrěšćichu ze swojim pospytom, na chwatnym posedźenju Jordija Turulla za regionalneho prezidenta španiskeho regiona wuzwolić. Při prěnim wothłosowanju wčera wječor njeje Turull trěbnu wjetšinu hłosow dóstał. Hakle 48 hodźin po tym je dalše wothłosowanje móžne. W tym času pak móhł 51lětny hižo w jastwje sedźeć. Měješe dźensa termin před sudnistwom. Katalanske regionalne knježerstwo tuž přeco hišće žanoho prezidenta nima.
Pósłanc EU wotwołany
Brüssel (dpa/SN). Nadpada z jědom na bywšeho agenta Sergeja Skripala we Wulkej Britaniskej dla je Europska unija swojeho pósłanca z Moskwy za konsultacije do Brüssela wotwołała. Tole wobkrući dźensa rano nižozemski ministerski prezident Mark Rutte po wuradźowanju wjerška EU. Šefojo knježerstwow su w zhromadnej zdźělence swój hłós přećiwo Ruskej přiwótřili. Tak su sej přezjedni, zo je Ruska po wšěm zdaću za nadpad zamołwita. Hinašeho plawsibelneho rozjasnjenja po jich słowach njeje.
AfD zhubja hłosy wolerjow
Na mjeztym 8. akciskim a dožiwjenskim dnju we wobłuku wčerawšeho ...
Z toho móžeš wuknyć
Sym podpisał, ...
... a to jako jedyn z prěnich na lońšim kongresu Federalistiskeje unije europskich narodnych mjeńšin w rumunskim měsće Cluj-Napoca. Mam wobydlersku iniciatiwu Minority SafePack za wažne znamjo mjezsobneje solidarity wšitkich wobydlerjow Europy w naležnosći, kotraž mnohich potrjechi. Woni pak su sami po ličbje přesłabi, zo bychu na kontinenće słyšani byli. Solidarita je wažny element, wažna hódnota za zhromadne žiwjenje modernych ludźi. Wšědnje dožiwjam a stajnje znowa widźu, kak so mjez sobu wotcuzbnjamy. Z podpismom wuprajam so přećiwo tendency wotcuzbnjenja a za solidaritu.
Podpisajće tež wy na internetnej platformje pod www.minority-safepack.eu, pósćelće nam wobraz wo was a přidajće cyle skrótka w dwěmaj sadomaj, što je was pohnuło, wobydlersku iniciatiwu Federalistiskeje unije europskich narodnych mjeńšin Minority SafePack za škit narodnych mjeńšin w Europje podpěrać. Waš wobraz a tekst pósćelće k wozjewjenju redakciji Serbskich Nowin najlěpje na e-mailowu adresu: .
To a tamne (23.03.18)
Wopyt dwaj metraj dołheho warana měješe thailandski wuměnkar w swojej kupjeli. Hač bě so reptil přez kanalizaciju abo prosće přez durje dóstał, njeje jasne. Znajmjeńša tón tam cyle woměrje ležeše. Ale tež 81lětny muž wosta měrny a jeho fotografowaše, prjedy hač durje kupjele zaso začini. Na to zawoła wón fachowcow, kotřiž warana popadnychu a w přirodźe wusadźichu.
Pornografiski film na elektroniskej reklamowej tafli při wulkim křižowanišću w Manili je skandal na přewažnje katolskich Filipinach wuskutkował. Kaž dyrbješe měšćanostka Makati Abigail Binay přiznać, běchu so hackerojo do systema reklamoweje tafle zadobyli a film wusyłali. Po poł minuće drje taflu spěšnje hasnychu, přiwšěm su mnozy pasanća porik při seksu fotografowali abo natočili a to w socialnych medijach wozjewili.
Nowe knježerstwo w Słowakskej
Bratislava (SŽ/K). Prezident Andrej Kiska je dźensa Petera Pellegrinija za noweho słowakskeho premiera pomjenował. Naslědnje přiwza wón wot Pellegrinija skorigowany namjet zestawy přichodneho kabineta. Wutoru předpołoženu lisćinu ministrow Kiska njebě akceptował, wotpokazujo noweho nutřkowneho ministra, za kotrehož bě Pellegrini namjetował Jozefa Ráža. Za te zastojnstwo je nětko předwidźany dotalny minister za strowotnistwo, njestronjan Tomáš Drucker. Wjetšina tamnych ministrow je hižo knježerstwu premiera Fica přisłušała.
Šansy na wuwzaća móžne
Wahington (dpa/SN). Kraje Europskeje unije smědźa so na wuwzaća dwělomnych chłostanskich cłow USA za wukrajny wocl a aluminij nadźijeć. Społnomócnjeny USA za wikowanje Robert Lighthizer poda w tym nastupanju pozitiwne signale. Tež zwjazkowy hospodarski minister Peter Altmaier (CDU) ma nadźiju. Wuwzaća měli tak dołho płaćić, doniž njejsu wikowanske rozmołwy zakónčene. Hižo jutře mějachu nowe cła płaćić.
Na kandidata so dojednali
Zymska přiroda wabi tuchwilu hišće do Rogeńskeho parka. Kónc ...
Pačenu ludnosć zaso zwjazać
Berlin (dpa/SN). Němsku towaršnosć zwjazować je zaměr štwórteje hamtskeje doby němskeje zwjazkoweje kanclerki Angele Merkel (CDU). To zwurazni wona wčera w knježerstwowym wozjewjenju a potwjerdźi hišće raz, zo słuša islam mjeztym k Němskej. To pak předstawje koaliciskeho partnera scyła njewotpowěduje. Raznje je šef krajneje skupiny CSU Alexander Dobrindt wuprajenja kanclerki kritizował, wotpowědujo nahladej noweho zwjazkoweho nutřkowneho ministra Horsta Seehofera (CSU). Migraciska kriza w lěće 2015 je kraj pačiła a polarizowała, Angela Merkel rjekny. Zynki su nětko wótriše, štož su koaliciske strony při wólbach zwjazkoweho sejma chětro začuwali.
Prěni raz je kanclerka wojersku ofensiwu Turkowskeje přećiwo Kurdam w Syriskej raznje zasudźiła. Wězo je turkowski ministerski prezident Recep Tayyip Erdoğan na to reagował. „Słowa Angele Merkel su wobžarujomne“, wón znapřećiwi.
To a tamne (22.03.18)
To je so tón abo tamny wobydler awstralskeho městačka Beechworth 200 kilometrow sewjerowuchodnje Melbourna zawěsće dźiwał, jako njeje wočakowane přeprošenje na kwas, zbožopřeća k narodninam abo samo zličbowanku dóstał. Wina na tym je póst, kotryž je prosće zabył jedyn póstowy kašćik wuprózdnić. Poł lěta dołho so tam listy kopjachu, doniž njebě kašćik dospołnje přepjelnjeny. Nowy team póstownikow bě jón po wšěm zdaću cyle jednorje přewidźał.
Samotny wosta baćon w hnězdźe, dokelž je partnerka jeho wopušćiła. Internetnje wobkedźbować móžachu zajimcy w delnjosakskim Leiferde, kak bě baćonica Friederike tydźenja k Fridolinej přilećała. A kaž bě widźeć, měještej chutne wotpohlady. Stej so porowałoj a tež hižo pilnje hnězdo přihotowałoj. Dale a časćišo pak so baćonica zdalowaše a nětko je cyle zhubjena. Hač drje je so tuchwilneho zymskeho wjedra dla zaso na wróćopuć do juha nastajiła? W Delnjej Sakskej maja něhdźe 770 baćonjacych porow.
Prěnje wozjewjenje kanclerki
Berlin (dpa/SN). Tydźeń po znowawuzwolenju za zwjazkowu kanclerku je Angela Merkel (CDU) dźensa w zwjazkowym sejmje najwažniše zaměry swojeje štwórteje hamtskeje periody předstajiła. Nimo prěnjeho knježerstwoweho wozjewjenja kanclerki mějachu tež nowi ministrojo swoje koncepty předstajić. Z napjatosću wočakowachu wobkedźbowarjo reakciju strony AfD, kotraž smě jako najsylniša frakcija w nowym Zwjazkowym sejmje Němskeje jako prěnja na knježerstwowe wozjewjenje reagować.
Skorža přećiwo Facebookej
San Francisco (dpa/SN). Hladajo na datowy skandal socialneje syće Facebook zesylnjeja inwestorojo a wužiwarjo ćišć na předewzaće. W San Franciscu je koncern skóržbu zwjazkowemu sudnistwu zapodał. Kurs akcije Facebooka je do toho wo něhdźe 20 procentow spadnył, a Facebook ma so za wobšudźeny. Dwělomna firma Cambridge Analytica, kotraž daty analyzuje a je tež za Facebook dźěłała, je po wšěm zdaću informacije 50 milionow ludźi znjewužiwała.
Inwesticije planowane
