To a tamne (28.02.18)
Njerjanu překwapjenku dožiwi mać w awstralskim Adelaide. Jako chcyše jabłuko do pomazkoweje tyzy dźowki tyknyć, wuhlada wona małkeho hada. Na zbožo tyzu spěšnje zaso začini. Přiwołany fachowc Rolly Burell jej wobkrući, zo bě to eksemplar jara jědojteho bruneho hada. Tež hdyž je hišće młody, móže jeho kusnjenje čłowjeka morić.
Prošu nawi njesćěhować, steji na tafličce při nowowuhotowanym najězdźe na awtodróhu pola hornjofrankskeho Ebersdorfa. Wobchadne wodźenje su na tym městnje přetwarili, a tak wone informacijam nawija hižo njewotpowěduje. Z wjacorymi lampami a warnowanskej tafličku policija šoferow, kotřiž so dźeń a bóle na nawi spušćeja, tam nětko na strašne městno skedźbnja.
Přiměr dodźerželi
Damaskus (dpa/SN). Po spočatku pjećhodźinskeho přiměra w syriskej kónčinje wuchodna Ghuta knježi najprjedy raz měr. Dźensa rano njeběchu žane brónje słyšeć, zdźěli syriska wobkedźbowarnja za čłowjeske prawa. Přiměr zmóžnja dodawansku pomoc potrěbnym. Nimo toho móža ciwilisća w tym času kónčinu wopušćić. 400 000 ludźi je tam zawrjenych. Humanitarne połoženje je chětro dramatiske. Kritikarjo maja pjeć hodźin trajacy přiměr za překrótki.
Žadaja sej spěšne wuswětlenje
Berlin/Bratislava (dpa/SN). Po zatřělenju słowakskeho reportera Jána Kuciaka a jeho slubjeneje w swójskim domje žada sej Zwjazk žurnalistow Němskeje, zo so pad spěšnje wuswětli. K tomu słuša tež prašenje, čehodla njejsu zarjady znate hroženja přećiwo njemu chutnje brali. Pad pokazuje, zo je wažne žurnalistow a jich nowinsku swobodu škitać. 27lětny Kuciak je prawidłownje wo padach dawkoweho wobšudnistwa tež prominentnych ludźi rozprawjał. Tohodla tuka policija na motiw we wobłuku jeho rešeršow.
Mjenje smjertnych woporow
Rumunska je lětsa hóstny kraj Lipšćanskich knižnych wikow wot 15. ...
Za koaliciju hłosowali
Berlin (dpa/SN). Zwjazkowa kanclerka Angela Merkel (CDU) je so přesadźiła. Z jasnej wjetšinu su delegaća na wčerawšim stronskim zjězdźe w Berlinje za nowu wulku koaliciju z CSU a SPD hłosowali. Jeničce 27 zastupjerjow z nimale 1 000 přitomnych bě přećiwo koaliciji. Hižo do zjězda bě Budyski zwjazk CDU ze zastupjerjomaj Rolandom Ermerom a Matthiasom Grahlom signalizował, zo so za koaliciju njewupraji.
Tež personalija noweho generalneho sekretara CDU je rozrisana. Z rekordnym wuslědkom 99 procentow powołachu delegaća wčera dotalnu ministersku prezidentku Posaarskeje Annegret Kramp-Karrenbauer do zastojnstwa.
Angela Merkel so nad wulkim přihłosowanjom wjeseleše a je nadźijepołna, zo nětko tež socialdemokraća po wothłosowanju, kotrež so přichodny pjatk skónči, za wulku koaliciju hłosuja. Potom ma so ručež móžno nowe knježerstwo wutworić a dźěło zahajić. „Po ćežkim času měješe CDU dobry dźeń“, kanclerka Merkel na kóncu stronskeho zjězda zwurazni.
Wutwar A 4 hač do Zhorjelca
Zapósłancy su za to, projekt krok po kroku zwoprawdźić
Budyšin (SN/MiR). Žadanje iniciatiwneje skupiny wokoło zapósłanca Sakskeho krajneho sejma Marka Šimana (CDU) rěka, awtodróhu A 4 šěsćčarowje wutwarić. Zdobom chcedźa, zo so wutwar hač na Porchowsku hórku bórze zahaji. „Naš zaměr je a wostanje dospołny wutwar jězdnje mjez Zhorjelcom a Drježdźanami na šěsć čarow“, rjekny Marko Šiman na njedawnym zetkanju z nowinarjemi. Njehodźi-li so to w tunlu Limas (Königshainer Berge) zwoprawdźić, a to je iniciatiwnikam jasne, ma jeničce tu jězbna spěšnosć dale wobmjezowana wostać.
To a tamne (27.02.18)
Z błyšćatymaj wočomaj a ze sympatiskim hłosom wotmołwja Josie Pepper na prašenja pasažěrow na Mnichowskim lětanišću. Přećelna „rodźena Francozowka“ napadnje z wosebitym šarmom, byrnjež roboter była. 1,20 metrow wulka a 28 kilogramow ćežka Josie ma swoje mjeno po lětanišću „Franz Josef Strauß“. Dotal wšak wona jenož jendźelsce rěči, bórze pak chce tež němčinu nałožować.
Poł lěta bě wona zhubjena, nětko je so swójbje nawróćiła, štož bě wulke wjeselo. Rěč je wo psycy z mjenom Rapunzel. Po wšěm zdaću bě wona 400 kilometrow wot frankskeho Hösbacha pola Aschaffenburga do Šwicarskeje pućowała, hdźež su ju wuchowanscy sanitetarjo nětko zranjenu našli. Dokelž měješe Rapunzel wosebity chip, móžachu wobsedźerku spěšnje wuslědźić. „Na zbožo njeje Rapunzel žanu psychisku škodu poćerpjeła“, so jeje knjeni raduje.
Přićah swójbow wujednany
Berlin (B/SN). We wobłuku koaliciskich jednanjow su CDU/CSU a SPD, wobkedźbujo žadanja ewangelskeje a katolskeje cyrkwje, zwadu wo přićah swójbow ćěkancow z wosebitym škitom zakónčili. Zastupjerjo stron dojednachu so, hižo wujednany kontigent tež přichodnje dale běžeć dać – tak tež wobstejace regularije za nuzne pady. Hač do kónca julija pak ma přićah swójbnych přechodnje dale zastajeny wostać. Wot awgusta potom smě na měsac hač do tysac mandźelskich swoje dźěći do Němskeje přijimać.
Zakładne prawa wohrožene
Kraj serbskich społmócnjenych bórze zapłaći
Braniborska chce społnomócnjenych za serbske naležnosće w třoch delnjołužiskich wokrjesach a w měsće Choćebuzu w połnym přistajenju z krajneho budgeta płaćić. To předwidźi zakonska iniciatiwa knježerstwoweju frakcijow SPD w Lěwicy w Krajnym sejmje Braniborskeje.
Podstupim (SN/at). Z wjetšeje ličby komunow w serbskim sydlenskim rumje Braniborskeje wurostu dalše změny krajneho prawa. Frakciji SPD a Lěwicy tohodla měnitej, zo měł krajny zakonjedawar mjeńšinowe prawa Serbow předewšěm přez strukturne rozsudy zawěsćić. To wuchadźa z naćiska za Druhi zakoń wo změnje prawniskich předpisow wo prawach Serbow w kraju Braniborskej, kaž frakciji kónc tydźenja informowaštej.
Podpěruja Minority SafePack
Budyšin (SN/JaW). Budyski wokrjesny zwjazk Lěwicy podpěruje wobydlersku iniciatiwu Federalistiskeje unije europskich narodnych mjeńšin (FUEN) Minority Safepack k skrućenju mjeńšinowych prawow na europskej runinje.
Kaž z dźensnišeje nowinskeje zdźělenki wokrjesneho jednaćela strony Felixa Mustera wuchadźa, bě wokrjesne předsydstwo minjeny pjatk w sprjewinym měsće podpěru jednohłósnje wobzamknyło. Zapodał bě ju serbski zapósłanc Lěwicy w Sakskim krajnym sejmje a zdobom mjeńšinopolitiski rěčnik tamnišeje frakcije Hajko Kozel. „Předewšěm hladajo na tudyšu mjeńšinu Serbow mamy za wosebje wažne iniciatiwu podpěrać“, rěka w zdźělence zwjazka. „Najebać tu abo tamnu kritiku z našeje strony pak je Němska mjeńšinopolitisce derje nastajena. W druhich čłonskich statach EU tudyše standardy zdawna hišće njedocpěwaja“, w zjawnym wozjewjenju dale rěka.
Kaž Serbske Nowiny zhonichu, je njedawno tež předsyda frakcije Lěwicy w Sakskim krajnym sejmje Rico Gebhardt Minority SafePack podpisał.
Zakituje žadanja dźěłarnistwa
Berlin (dpa/SN). Nawoda dźěłarnistwa ver.di Frank Bsirske žadanja za jasnym zwyšenjom mzdow w zjawnej słužbje dale zakituje. Do zahajenja tarifowych jednanjow je wón dźensa w rańšim magacinje telewizije ZDF na to skedźbnił, zo maja přistajeni Zwjazka a komunow wot lěta 2000 mjeztym zastatk štyrjoch procentow hladajo na wuwiće mzdow w hospodarstwje. Ver.di žada sej za 2,3 miliony přistajenych zjawneje słužby šěsć procentow wjace mzdy, znajmjeńša pak 200 eurow wjace wob měsac.
Nowe nalěty a dalše wopory
Damaskus (dpa/SN). Najebać žadanje Bjezstrašnostneje rady UNO za přiměrom w Syriskej je při nowych nalětach na region zběžkarjow w Ghuta znajmjeńša dźesać ludźi zahinyło, kaž syriscy aktiwisća rozprawjeja. Mjez woporami su tři dźěći. Tak je so ličba smjertnych woporow minjene dny na wjace hač 500 ciwilistow powjetšiła. Wuchodny dźěl regiona Ghuta je jedna z poslednich kónčin Syriskeje pod kontrolu zběžkarjow. Jednotki knježerstwa ju wot lěta 2013 woblěhuja. Humanitarne połoženje za ciwilnu ludnosć je tam mjeztym dramatiske.
Němska kritizowana
