Za kónc rozmołwow
Strasbourg (dpa/K/SN). Parlament Europskeje unije je so dźensa za to wuprajił, skónčić rozmołwy z Turkowskej wo přistupje k zhromadźenstwu. Frakcije přesahujcy bě wjetšina zapósłancow za to. Jedna wšak so jenož wo njezawjazowace doporučenje komisiji EU. Přičina je dwělomna reforma wustawy, z kotrejž zawjedu w Turkowskej prezidialny system. Hižo w nowembru 2016 bě sej parlament EU žadał, rozmołwy „zamjerznyć“, štož pak njebě skutkowało.
Italska chce přistawy zawrěć
Tallinn (dpa/K/SN). W migrantskej krizy italske knježerstwo wotmysli, njekooperatiwnym pomocnym organizacijam zawrěć swoje přistawy. Na zetkanju nutřkownych ministrow krajow EU w estiskim Tallinnje předstaji italski ressortny šef Marco Minniti dźensa zadźerženski kodeks, kotremuž dyrbja pomocne organizacije přihłosować. Minniti sej tež wot partnerow žada, zo přiwozmu wjele wjace wuchowanych ćěkancow.
USA poskićeja kooperaciju
Šiman: Wšitke wuměnjenjaza šulu su date
Budyšin (SN/MkWj). Serbski zapósłanc CDU w Sakskim krajnym sejmje Marko Šiman dale na tym wobstawa, zo nowa Serbska rěčna šula 1. awgusta dźěłać započnje, zo by wukubłanych wučerjow w serbšćinje wukmaniła. To je Šiman na nowinarskej rozmołwje w Budyšinje dźensa hišće raz potwjerdźił. Intensiwne rěčne kubłanje na profesionalnym niwowje a z dobrym techniskim wuhotowanjom měło znajmjeńša lěto trać a je-li trjeba, poł lěta dlěje. Hłownje zamołwite za to ma kultusowe ministerstwo być, dokelž je kubłanje wučerjow statny nadawk, Šiman w tym zwisku podšmórny. Po jeho słowach trjebaja Serbja kóžde lěto znajmjeńša dźesać přidatnych wučerjow, zo by so wurunała ličba tych studentow wučerstwa, kotřiž studij dočasnje kónča a so druhim powołanjam přiwobroćeja. „Wšitke wuměnjenja su date“, serbski zapósłanc rjekny, poćahujo so na dorěče ze zamołwitymi ministerstwami.
K ličbje přizjewjenych kandidatow njemóžeše Šiman hišće ničo rjec, dokelž proces wupisanja hišće běži. Tež městnosć kubłanišća dotal znata njeje.
Wočakuja wjele demonstrantow
Hamburg/Berlin (dpa/K/SN). Wjerškowe zetkanje 20 najwažnišich industrijnych a prohowych krajow swěta zahaja dźensa wječor w Hamburgu. Zarjadowanje wotměje so pod masiwnymi wěstotnymi naprawami w halach Hamburgskich wikow wosrjedź města. Přećiwnicy wjerška su wjacore demonstracije a protestne akcije připowědźili. Dźensa wočakuja w Hamburgu 10 000 demonstrantow, jutře a sobotu hač do 100 000, mjez nimi něhdźe 8 000 k namocy zwólniwych.
Ruski prezident Wladimir Putin je ducy do Hamburga do Berlina załožił, zo by ze zwjazkowej kanclerku Angelu Merkel (CDU) wo naležnosći wjerška porěčał. Při tym wupraji so wón doraznje za škit klimy kaž tež za swobodne swětowe wikowanje. Sankcije zapada přećiwo Ruskej mjenowaše Putin „zakryty protekcionizm“. Dźensa nawječor zetka so kanclerka tež hišće z prezidentom USA Donaldom Trumpom w Hamburgu, dokal wón z Waršawy doleći.
To a tamne (06.07.17)
Z wulkimi mnóstwami lětacych mrowjow bědźachu so wčera wopytowarjo a tenisća we Wimbledonje na kromje Londona. Stajnje zaso dyrbjachu hrajerjo małe zwěrjatka wot drasty wotčesać abo sej je z mjezwoča trěć. Britojo maja za to samo mjeno: Flying Ant Day. Mrowje w hoberskich rojach wotleća, hdyž nowa kralowna hnězdo wopušći. Ćopłe a włóžne wjedro z 30 stopnjemi tomu polěkuje.
Wódne suwadło wupruwowałoj staj policistaj w ameriskim Ashvillu w staće North Carolina. Do toho bě jeju susod wołał, dokelž měješe suwadło, kotrež bě muž składnostnje dnja njewotwisnosće natwarił, za ilegalne. Zastojnikaj pak njemóžeštaj techniske njedostatki namakać a sunyštaj so po skłoninje, kotraž bě z wodu a mydłom preparowana. Medije běchu so na widejowu scenu dohladali, kotraž je mjeztym w interneće widźeć.
We wupisanju na serbšćinu skedźbnić
Rozmołwa z dr. Evu-Mariju Stange wo hižo zwoprawdźenych a přichodnych naprawach k spěchowanju serbskeje rěče
Sakski krajny sejm je 22. junija próstwje frakcije CDU a SPD „Serbsku rěč a kulturu dale konsekwentnje spěchować“ přihłosował. W zwisku z debatu wo njej je so Cordula Ratajczakowa ze sakskej ministerku za wědomosć a wuměłstwo dr. Evu-Mariju Stange (SPD) rozmołwjała.
W sakskej wustawje su serbske prawa zapisane, sakske knježerstwo je lěta 2013 plan naprawow k pozbudźowanju a wožiwjenju nałožowanja serbskeje rěče wobzamkło a nětko podpěruje krajny sejm dalšu papjeru, mjenujcy „Chartu rěčow w Němskej“. Što ma to nimo symbolneje politiki přinjesć?
Ekstremistow telko kaž nihdy
Berlin (dpa/K/SN). W Němskej je spochi wjac ekstremistow, prawicarskich kaž lěwicarskich, kotřiž su k namocy zwólniwi. Zwjazkowy nutřkowny minister Thomas de Maizière (CDU) a prezident Zwjazkoweho zarjada za škit wustawy HansGeorg Maaßen staj wčera na prezentaciji Rozprawy wo škiće wustawy 2016 trochowałoj, zo je 12 100 prawicarskich ekstremistow – telko kaž hišće ženje. Lěwicarska scena je wo sydom procentow na 28 500 přiwisnikow z rozrostła.
Wulku raketu wupruwowali
Pjöngjang (dpa/SN). Z wuspěšnym testom interkontinentalneje rakety je Sewjerna Koreja po swójskich wuprajenjach rozsudny schodźenk w konflikće z USA docpěła: Wčera startowana raketa je kmana „wulku a ćežku atomowu bombu“ transportować, rěka z Pjöngjanga. „Dołho trajace měrjenje mocow z imperialistami USA so nachila“, cituja statne medije mócnarja Kima Jong Una. USA připowědźeja mjeztym nowe sankcije přećiwo komunistiskemu krajej.
Wotpokazuje iniciatiwu
Chinski prezident Xi w stolicy Němskeje
Přećiwnicy G 20 nocuja w dźiwadle
Njeje na kóždy pad za milinuz brunicy
Podstupim (SN/MkWj). Rada za serbske naležnosće Braniborskeje měješe na swojim wčerawšim posedźenju w Podstupimskim krajnym sejmje dwě ćežišći na dnjowym porjedźe. Kaž předsyda rady Torsten Mak na naprašowanje SN zdźěli, rěčachu spočatnje wo problemach w zwisku z wudobywanjom brunicy. Jako hosća běchu sej nawodu předsydstwa energijoweho předewzaća LEAG dr. Helmara Rendeza přeprosyli. Wón wuzběhny wulki wuznam energijoweho hospodarstwa hladajo na dźěłowe městna. Zdobom potwjerdźi, zo ma předewzaće tež napřećo Serbam zamołwitosć, bjez toho zo by tole konkretizował. Za najzajimawše ma Torsten Mak wuprajenje dr. Rendeza, zo chcyła LEAG dale milinu produkować, „nic pak na kóždy pad z brunicy“.
To a tamne (05.07.17)
72 kołbaskow w dźesać minutach je 33lětny Kaliforničan do so stykał. Tradicionalne napřemojědźenje hotdogow wotmě so w New-Yorkskim zabawjenskim parku Coney Island. Joey Chestnut, serijowy dobyćer minjenych lět, je tak swój rekord wo dwě kołbasce polěpšił. Přiwšěm njebě wón cyle spokojom, dokelž je w druhej połojcy popušćił. Poprawom chcyše 90 hotdogow zjěsć.
Spodźiwne rejwanje muža pod hołym njebjom a pozdatna rozmołwa ze štomom stej pěška w badensko-württembergskim Steinenje pohnułoj, policiju zazwonić. Alarm pak njebě trěbny. Zastojnikam 62lětny rozłoži, zo słuži „rejwanje“ sebjezakitowanju a wotpočinkej. „Poprawom činju to w lěsu. Tónkróć pak sym čakanje na lěkarski termin za swoje zwučowanja wužił. Druzy čitaja, hdyž dyrbja čakać. Ja zwučuju.“
