Mnozy Frauke Petry słyšeć chcyli
Budyšin (CS/SN). Městna na žurli Budyskeho hotela Residence njedosahachu wčera za wšitkich zajimcow, kotřiž chcychu wot zwjazkoweje rěčnicy AfD Frauke Petry nadrobnosće wo programje strony k lětušim wólbam zwjazkoweho sejma zhonić. Tohodla su ludźo zarjadowanje tež na widejowej sćěnje w pódlanskej rumnosći sćěhowali.
Do wustupa Frauke Petry předstaji so direktny kandidat AfD za wólbny wokrjes 156 (Budyšin 1) Karsten Hilse. Policajski zastojnik rozłoži, zo budźe so w padźe wuzwolenja w zwjazkowym sejmje předewšěm wo wěstotnopolitiske prašenja starać. Energijowy přewrót je jeho dalša tema. Tón so ideologisce znjewužiwa, wohroža we Łužicy znajmjeńša 35 000 dźěłowych městnow kaž tež wěstotu zastaranja a zawinuje wyšu płaćiznu za milinu. Tak so strach powjetša, zo dalši ludźo Łužicu wopušća.
To a tamne (23.03.17)
Swojeje lubosće k słódkosćam dla ma paduch w Tokiju nětko z chłostanjom ličić. Wón je so do něhdźe 40 běrowow w měsće a wokolinje zadobył. Nimo pjenjez pytaše mjez druhim tež za šokolodu, lodom, pudingom a brěčkami. Dokelž pak je so při zadobywanju zranił, nańdźe policija jeho slědy. Na cholesterin bohata krej jeho skónčnje přeradźi.
Z chětro rozmjerzanej maćerju njeje paduch w bayerskim Nördlingenje zawěsće ličił. Něšto dnjow po tym zo běchu jeje jědnaćelětnemu synej mountainbike pokradnyli, wuhlada wona 18lětneho z nim w conje za pěškow. Žona na městnje reagowaše, hrabny jeho a dowjedźe młodostneho na policajski rewěr. Tam młodostny padustwo přizna. „Mać jědnaćelětneho bě po wšěm zdaću chětro přeswědčiwje jednała, zo je paduch dobro- wólnje sobu šoł“, policija zdźěli.
Ministerstwo požadane stejišća wočaknje
Podstupim (SN/at). Minimalna ličba dwanaće šulerjow na rěčnu skupinu we wučbje serbšćiny abo Witaj-wučbje w Braniborskej je definitiwje z blida. To wobkrući nowinski rěčnik braniborskeho ministerstwa za kubłanje, młodźinu a sport Ralph Kotsch našemu wječornikej. Referatna nawodnica dr. Katrin Düring bě to na posedźenju Rady za naležnosće Serbow při Krajnym sejmje Braniborskeje wčera w Podstupimje wozjewiła. Hinašu ličbu pak njeje mjenowała, kaž wobdźělnicy rozprawjeja. Předsyda Domowiny Dawid Statnik wobkrući knjeni Düring jara taktiske wustupowanje, byrnjež so na połoženju cyłkownje ničo njezměniło. „Ze serbskeje strony je wšitko prajene, nětko měło so ministerstwo k tomu wuprajić“, rjekny wón na naprašowanje. Ministerstwo wočaknje zapodaće požadanych stejišćow k naćiskej noweho serbskeho šulskeho postajenja, prjedy hač dale postupuje. Termin je 7. apryl.
Trump budźe pódla
Washington (dpa/K/SN). Prezident USA Donald Trump, tuchwilu mócnje pod ćišćom wopačnych twjerdźenjow dla, budźe na zetkanju šefow statow a knježerstwow krajow NATO kónc meje w Brüsselu pódla. Do toho zeńdźe so wón 12. apryla we Washingtonje z generalnym sekretarom aliancy Jensom Stoltenbergom. Trump bě so naposledk k NATO wuznał, swoje žadanja za sylnišim financnym wobdźělenjom tamnych partnerow pak stajnje wospjetował.
Přichodnje skala A do G
Brüssel (dpa/K/SN). Přetrjebarjo měli hnydom spóznać, kotre nastroje wosebje wjele energije zalutuja. Europska unija chce tohodla zašmjatowace woznamjenjenja płokawow, chłódźakow a telewizorow z labelemi A+++ wotstronić a z jednorej skalu A do G narunać. Doniž so nowe labele we wobchodach njejewja, móžetej pak hišće dobrej dwě lěće zańć. Z labelom A budu potom milinu lutowace marki na wikach wupokazane, G-modelam wuswědča, zo jara wjele energije spóžěraja.
Noweho šefa postajili
Nowu montažowu halu poswjeći wčera předewzaće Trumpf we ...
Słužbnu přisahu złožił
Žehliwy woheń chcedźa podusyć
Podstupim (K/SN). Tydźenje trajacy žehliwy woheń deponije blisko pólskeje wsy Brożek, kotryž ze šćipatym smjerdom a njeluboznym kurom tež na němskej stronje wobswět zanjerodźa a nic mjenje ludnosći starosće strowoty dla načinja, bě łužiskeho zapósłanca zwjazkoweho sejma Klausa-Petera Schulza (CDU) k zakročenju pohnuł. 14. měrca wobroći so wón pisomnje na zwjazkowe ministerstwo za wobswět, škit přirody, twar a wěstotu reaktorow (BMUB) kaž tež na statnu kencliju Braniborskeje, pominajo wobě instancy naležnje k spěšnemu rozrisanju problema a hłownje k wuswětlenju přisłušnosće. „Wot BMUB je za krótki čas wotmołwa přišła. Statna kenclija ministerskeho prezidenta Dietmara Woidki pak hač do dźensnišeho njeje reagowała“, zapósłanc Schulz zludany poskorži.
Słowjency bóle prědku
Premierce zaleži na mandaće
Młodźi ludźo su za EU
Gütersloh (dpa/SN). Wjetšina młodostnych w srjedźnej a wuchodnej Europje je za EU. Tole wuchadźa z naprašowanja w nadawku Bertelsmannoweje załožby, kotraž je so mjez młodostnymi za jich nastajenjom wobhoniła. Jasna wjetšina młodych ludźi w starobje 15 do 24 lět wupraja so za sobustawstwo EU: w Madźarskej 79 procentow, w Pólskej 76 proc., w Čěskej 73 proc. a w Słowakskej 70 proc. W Němskej je 87 proc. młodostnych a w Awstriskej 77 proc. za zhromadźenstwo hłosowało. Z wustupom swojeho kraja z EU je jenož mjeńšina přezjedna. Předewšěm pak žadaja sej młodostni reformu EU. Jako najwjetšu ćežu widźi 74 proc. naprašowanych, zo islamistiski fundamentalizm a terorizm EU wohrožatej. W Pólskej čuje so 83 proc. wohroženych, w Němskej 64 proc.
Za reprezentatiwne naprašowanje su so wšelakore institucije wot 30. januara do 13. februara cyłkownje 3 000 młodostnych w Němskej, Pólskej, Słowakskej, Čěskej a Madźarskej za měnjenjom prašeli.
