Wuběrna to karjera!
Synoda wěnuje so kubłanju
Drježdźany (dpa/SN). Synoda Sakskeje ewangelsko-lutherskeje krajneje cyrkwje zaběra so na swojim nalětnim schadźowanju wot jutřišeho pjatka hač do póndźele w Drježdźanach z kubłanjom. Cyłkownje 80 sobustawow cyrkwinskeho parlamenta budźe tam předewšěm wo změnach w kubłanskim dźěle w zwisku z ćěkancami rěčeć, kaž zdźěli wčera rěčnik krajneje cyrkwje. Přiměrić chcedźa hižo w lěće 2012 nastajene koncepty k aktualnej situaciji, za čož su přednoški a wšelake dźěłarnički planowane. Zdobom budu synodalojo interne naćiski zakonja wo fuziji cyrkwinskeju wobwodow Aue a Plauen (Vogtland) rozjimować a wo přichodnej strukturje gmejnow diskutować.
Synoda je zakonje dawacy organ ewangelskeje krajneje cyrkwje. Jej přisłušeja duchowni, lajkojo kaž tež zastupjerjo cyrkwinskeho nawodnistwa. Dwójce wob lěto so gremij schadźuje. Nalěto wěnuje so wosebitym temam, nazymu steji hospodarski plan krajneje cyrkwje za slědowace lěto na dnjowym porjedźe.
To a tamne (30.03.17)
Stracha před žrawcami dla so mnozy ludźo w awstralskim Sydneyju w morju njekupaja, ale radšo w zjawnych poolach blisko přibrjoha. Tola tež tam čakaše na płuwarjow nětko 70 centimetrow dołhi žrawc. Po zdaću bě so tón přez přiliw do swimmingpoola dóstał, kaž ze Sydneyja rěkaše. Žrawca pak popadnychu a sadźichu jeho zaso do morja.
Z najlěpšim wotpohladom je 85lětny wuměnkar w bayerskim Bad Brückenauwje spytał postawu swjateje Marije wučisćić a ponowić. Postawa z pěskowca na cyrkwinskim naměsće bě jemu přešěra. Tuž je ju ze seršćowcom a barbu trochu wobdźěłał. Sobudźěłaćer farskeho zarjada to wobkedźbowaše a informowaše policiju. Tej pak muž rozłoži, zo je jenož derje měnił. Přiwšěm nasta škoda něhdźe sto eurow. Fachowa firma chce so nětko wo 1,40 metrow wulku figuru starać.
Próstwa wo brexiće přepodata
London/Brüssel (dpa/SN). Pjeć měsacow po tym zo běchu wobydlerjo Wulkeje Britaniskeje za brexit hłosowali, je kraj dźensa wotpowědnu próstwu w Brüsselu zapodał, směć Europsku uniju wopušćić. Wčera hižo bě premierministerka Theresa May wobkrućenje wustupa podpisała. Dźensa je to w Londonskim parlamenće oficialnje potwjerdźiła. W samsnym času chcyše britiski pósłanc Tim Barrow rozprawu Europskej radźe w Brüsselu zapodać.
Spřećiwja so škitej klimy
Washington (dpa/SN). Radikalny łamk w klimowej politice USA je nowy prezident Donald Trump připowědźił. W přitomnosći hórnikow podpisa wón wčera wotpowědny dekret, z kotrymž so zjawnje za wudobywanje brunicy zasadźa a so z klimoškitnymi zaměrami USA rozžohnuje. Reakcije wobswětoškitnych zwjazkow w USA a Němskej na tajke wuwiće su razne. Tež Europska unija a němske wobswětowe ministerstwo postupowanje Trumpa kritisce wobkedźbujetej.
Třeći pospyt fuzije zwrěšćił
Znatej comicowej postawje Lolek a Bolek dožiwjatej tuchwilu ...
Za referendum so wuprajili
Čušli turkowska MIT w Němskej?
To a tamne (29.03.17)
Pod wliwom drogow stejace papagaje indiskich burow chětro wobćežuja a wulke škody na makowych polach zawinjeja. Ptaki su tak wotwisne, zo njemóža je burja samo wjace z bubonami abo praskotakami wućěrić. Tež antilopy so přewšo rady do maka dadźa. W Indiskej je dowolene za medicinu mak plahować, kotryž twori zakład opiuma. Burja so boja, zo zhubja plahowansku licencu. Tak nětko wysoke płoty wokoło swojich polow nastajeja a saki nad nimi připrawjeja.
Wón chcyše jenož łódźe na rěce wobdźiwać, skónčnje pak so z awtom do wody suny. Tole sta so 59lětnemu šoferej, kiž je póndźelu na nachilenej rampje při Rynje blisko města Bonna pozastał. Pušći pak nohu ze spinadła, a awto zajědźe do rěki. Na zbožo móžeše so muž sam wuchować. Awto pak so 60 metrow dale prawdźepodobnje podnuri.
Wjace kedźbnosće katedrali
Berlin (B/SN). Zwjazkowa ministerka za twarstwo Barbara Hendricks (SPD) chce wjace kedźbnosće za Berlinsku katedralu swj. Jadwigi. Hačrunjež katolska biskopska cyrkej we wutrobje stolicy steji, „je wona tuchwilu kusk schowana. Myslu sej, zo katedralu po přetwarje jeje nutřkowneho ruma wjace ludźi zaznaje.“ Hendricks, čłonka Centralneho komiteja němskich katolikow, wuzběhny, zo jej njepřisteji naćisk renowacije architektonisce hódnoćić. Arcybiskopstwo je proces wothłosowanja přewjedło, a wjetšina je so za přetwar rozsudźiła.
Swět so z reformaciju změnił
Bad Blankenburg (B/SN). Reformacija před 500 lětami je Němsku a swět trajnje změniła, potwjerdźi generalny sekretar Swětoweje ewangelskeje aliancy (WEA) Efraim Tendero na přijeću składnostnje zetkanja nawodow WEA spočatk měsaca w Blankenburgu. Po słowach předsydy WEA Ndaby Mazabany z Južneje Afriki so swět tuchwilu dramatisce přeměnja. Mazabane dźakowaše so Němskej za to, zo je telko ćěkancow přijała, jednajo po bibliskej namołwje, „cuzeho“ přećelnje hospodować.
Cyrkej pyta fararjow
Šotiska so hiba
Edinburgh (dpa/K/SN). Dźeń do termina, ke kotremuž Wulka Britaniska swój wotchad z Europskeje unije zdźěli, rozsudźi šotiski parlament dźensa wo referendumje nastupajo njewotwisnosć. Wěste je, zo zapósłancy wotšćěpjenju wot Wulkeje Britanskeje haj praja. Šotiska je za samostatnosć, dokelž bě wjetšina wolerjow za zwostaće w EU hłosowała a dokelž jej zdruha London njedowoli, při brexiće znajmjeńša směć w nutřkownych wikach (Binnenmarkt) wostać.
Wichorisko zachadźa
Sydney (dpa/K/SN). Ze spěšnosću hač do 260 km/h zachadźeše dźensa wichorisko podłu sewjerowuchodneho přibrjoha Awstralskeje. W měsće Ayrlie zwotkry třěchi a spowala štomy. 25 000 ludźi wopušći ze stracha před cyklonom swoje bydlenja. Zwjazkowy kraj Queensland je 600 kilometrow pobrjóžneho teritorija za wohroženy postajił. Wjace hač 400 šulow a pěstowarnjow wosta zawrjenych kaž tohorunja dwě lětanišći. Nětko boja so tam jara wulkich powodźenjow.
Telewizijny signal so změni
