FUEN dale spěchuja
To a tamne (14.11.16)
Lětuši hodowny štom za słužbne sydło zwjazkoweje kanclerki Angele Merkel (CDU) přińdźe lětsa z priwatneje zahrody w Boppardźe nad Rynom. Štom běchu před dwaceći lětami sadźili. Mjeztym pak je wón swójbje přewulki, rěčnik porynsko-pfalcskeho zwjazka wobsedźerjow lěsow zdźěli. Kónc tydźenja planuja jědlu podrězać a do Berlina dowjezć. Tam chcedźa ju 23. nowembra zwjazkowej kanclerce wosobinsce přepodać.
Gumijowa maska z wobličom Donalda Trumpa so w Japanskej předawa kaž ćopłe całty. Mała produkciska firma Ogawa Studios njemóže pječa ani dočinić. Po wuzwolenju Trumpa za prezidenta USA je w zawodźe wjace hač 3 000 skazankow dóšło, powěsćernja Kyodo zdźěla. Kapacity su tuchwilu dospołnje wućežene. Hač budźe gumijowa maska za 22 eurow tež přichodnje tak prašana, wotwisuje wot dalšeho wuwića Trumpa.
Wuběrk etatej přihłosował
Berlin (SN/JaW). Etatowy wuběrk Zwjazkoweho sejma Němskeje je dźensa rano po 14 hodźin trajacych jednanjach klětušemu hopodarskemu planej přihłosował. Cyłkownje chce zwjazkowe knježerstwo klětu nimale 330 miliardow eurow wudać, zdźěli wuběrk na swojej internetnej stronje. „Etat je wuranany. Wudawkam 329,1 miliardy eurow steji runje telko dochodow napřećo. Štwórty króć za sobu Zwjazk žadyn nowy dołh njebjerje“, rěka z wuběrka, kotremuž přisłuša tež hornjołužiski zapósłanc zwjazkoweho sejma Thomas Jurk (SPD).
Zwjeselace je, zo zwjazkowe knježerstwo swoje přilubjenje a zrěčenje Serbam napřećo dodźerži a samo tróšku nadspjelni. Kaž z naćiska klětušeho hospodarskeho plana – wón našemu wječornikej předleži – wuchadźa, budźe Zwjazk klětu załožbu z 9,315 milionami eurow podpěrować. To je samo 15 000 eurow wjace, hač w lětsa podpisanym nowym statnym zrěčenju wo financowanju załožby zapisane. Zo nabudźe plan płaćiwosće, ma jón zwjazkowy sejm hišće wobzamknyć.
Zetkanje wotprajene
Berlin (dpa/SN). Schorjenja dla je předsyda SPD Sigmar Gabriel za dźensa popołdnju planowane wjerškowe zetkanje stronskich předsydow wotprajił, na kotrymž chcychu za nowym zwjazkowym prezidentom pytać. Po informacijach nowin chcedźa so Gabriel, Horst Seehofer (CSU) a zwjazkowa kanclerka Angela Merkel (CDU) njedźelu popołdnju znowa zetkać. Koalicija njeje so dotal na naslědnika zwjazkoweho prezidenta Joachima Gaucka dojednać móhła.
Plan skónčnje hotowy
Berlin (dpa/SN). Takrjec w poslednim wokomiku je so zwjazkowe knježerstwo tola hišće na plan wo škiće klimy dojednało, kaž powěsćernja dpa rozprawja. Tak njetrjeba wobswětowa ministerka Barbara Hendricks (SPD) z prózdnymaj rukomaj na swětowy klimowy wjeršk do Marokka jěć, štož by za Němsku wulka blamaža była. Nadrobnosće plana přiwšěm znate njejsu. Dojednanje běchu wospjet přestorčili. Hospodarski minister Sigmar Gabriel (SPD) měješe wobmyslenja, zo móhł plan dźěłowe městna wohrozyć.
Dawkowych temow so wzdać
Młodźi ćěkancy ze Somalije, Eritreje, Afghanistana, Syriskeje a ...
Němski konsulat nadpadnjeny
Trump: Medije protesty naškaraja
Wučbnicy frizišćiny trěbne
Bredstedt (SN). W šulach Sewjerofriziskeje pospochi frizišćinu wuwučować njeje tuchwilu ani tak jednore. Na to skedźbnili su zastupjerjo Friziskeje rady, jako zetkachu so minjeny pjatk z předsydu Južnoschleswigskeho wolerskeho zwjazka (SSW) Larsom Harmsom w Bredstedće. Zdobom Husumskeho zapósłanca pochwalichu, dokelž njeje koalicija na sewjeru Němskeje jeničce skrótšenja bywšeho knježerstwa cofnyła, ale popłatki na dobro Frizow samo zwyšiła.
Hladajo na frizišćinu pak su dalše polěpšenja trěbne, rjekny předsydka Friziskeje rady Ilse Johanna Christiansen. Tak maja přemało wučerjow frizišćiny, zo móhli wupady chorosće abo dalekubłanja dla wurunać. Nimo toho paruja dołhodobne planowanje hladajo na potrjebu pedagogow. To płaći tež za wučbny material. Dotal woni wučbnicy sami zestajeja. Po słowach Friziskeje rady drje by móžno było tajke materialije wudać, za to pak bychu přidatne mocy trěbne byli. Lars Harms zdźěli, zo su jemu problemy znate SSW chce so dale wo to starać.
To a tamne (11.11.16)
„Asistenta za powšitkownu powołansku dračinu“ pyta lětanske předewzaće Ryanair. Ekscentriski šef tunjo lětaceho předewzaća Michael O’Laery je nawěšk pječa wosobinsce takle formulował, zo by asistenta za sebje našoł. Wuměnjenja su kruty rjap, njeskónčna sćerpnosć a jasne nastajenje přećiwo hłupemu bledźenju, kaž we wupisanju dźěłoweho městna rěka. Te započina z pokiwom, zo jedna so wo „najhórši job Irskeje“.
Rudnohórsku wjedrowu chěžku „Martin Luther a bamž Leo X.“ wot dźensnišeho internetnje přesadźuja. Awkcija pola eBay započnje so we 18 hodź., zdźěleja zamołwići ze Seiffena, hdźež chěžku twarja. Wunošk chcedźa tamnišej cyrkwinskej wosadźe přewostajić. Architekt bě wjedrowu chěžku k 500. róčnicy reformacije naćisnył. Nakład je na 500 eksemplarow kruće wobmjezowany.
Zarjady a sudnistwo najbóle potrjechene
Sakski krajny sejm bě so wčera w aktualnej hodźinje z tak mjenowanymi reichsbürgerami zaběrał. Tuž bě skerje připad, zo je so tež Budyska CDU wječor za měsačnym stajnym blidom pod hesłom „Štó poprawom su reichsbürgerojo?“ samsnej tematice wěnowała.
