Budyšin (SN/MkWj). Wyši měšćanosta Budyšina Alexander Ahrens (njestronjan) je minjeny štwórtk 17lětnej holcy w Budyskej radnicy přijał. Wonej běštej so dwaj dnjej do toho prawicarskim ekstremistam do puća stajiłoj, kotřiž dweju požadarjow azyla, z kotrymajž běštej holcy spřećelenej, z trašawku wohrožowachu. „Stej so jara zmužiće zadźeržałoj. To je druhim ludźom w našim měsće z přikładom“, Ahrens rjekny. Runje w tymle napjatym času je to wažny signal, wón podšmórny. Jako kmót za dwě swójbje požadarjow azyla Ahrens problemy znaje. A bohužel so ludźo daloko rozšěrjenemu rasizmej dosć njewobaraja. „Hladajo na to sej prawicarscy ekstremisća woprawdźe mysla, zo za wjetšinu wobydlerjow rěča. Tomu pak tak njeje.“ Ahrens paruje nimo toho respekt za kmótow a pomocnikow, kotřiž so w Budyšinje hižo­ dołho jara za integraciju ćěkancow zasadźeja a za to wšědnje wjele časa wopruja. „Njewočakuju, zo wšitcy politiku knježerstwa ćěkancam napřećo podpě­ruja. Zo pak su runje ći, kotřiž spytaja pomhać, nadpadam wustajeni, njemó­žemy akceptować.

Politiske strony hotuja so na wólby zwjazkoweho sejma 2017

Budyšin (SN/MkWj). Wokrjesne zwjazki SPD, Lěwicy a AfD Budyskeho wokrjesa su wčera a zawčerawšim swojich kandidatow za klětuše wólby Němskeho zwjazkoweho sejma nastajili.

Lěwica nominowaše sobotu, kaž běchu to powšitkownje wočakowali, Caren Lay za zastojnstwo. 43lětna so hižo sydom lět jako zapósłanča zwjazkoweho sejma za region zasadźa. W přichodnej legistalturnej periodźe chcyła wona mjez druhim za zachowanje a wutwar železniskich zwiskow w Hornjej łužicy wojować a turistiske wuwiće podpěrać, kaž Lay delegatam strony w Budyskim hotelu „Residence“ připowědźi. Swoje dotalne skutkowanje hódnoćeše wona pozitiwnje. Je ludźi tam podpěrała, hdźež bě to trjeba, sobudźěłaćerjow zawoda Bombardier runje tak kaž pěstowarki abo plahowarjow dejkow. Je swój podźěl tež přinošowała, zo by Załožba za serbski lud wjace pjenjez dóstała. Hladajo na změny we Łužicy chcyła Caren Lay za Łužiski fonds wojować, z kotrymž móhli so srjedźostawske předewzaća a turizm spěchować.

Hnojowu hromadu pokradnyli su nje­znaći w Jugenheimje pola hessenskeho Mainza. Za to wotstronichu paduši njedaloko konjaceho dwora elektriski płót a jědźechu z traktorom na pastwu. Wottam su połdra kubikneho metra hnoja sobu wzali. W hromadźe běchu wosebite wački, kotrež chcychu pakostnicy jako humus dale předawać. Wěcnu škodu trochuje mějićel na sto eurow.

Nadpad hororowych klawnow z machetu w Mnichowje bě wumysleny. Přećiwo pozdatnemu woporej a toho kumpanej, kiž bě so jako swědk wudawał, policija nětko přepytuje. 20lětny bě so z machetu sam zranił, dokelž so z njej hrajkaše. Policiji pak napowěda, zo su jeho hororowi klawnojo nadpadnyli. Nětko čakatej na njeho wumysleneho nadpada dla jednanje a zličbowanka policije. Ta bě wěc wuslědźiła­, po tym zo bě so při přepytowanjach dalšich swědkow prašała.