Wočakowanja na Kamjenicu wulke
Kamjenica (dpa/SN). Předewzaća w Kamjenicy a wokolinje maja wulke wočakowanja hladajo na lěto 2025, w kotrymž je jich město kulturna stolica Europy. Wosebje hotele, hosćency, turistiske a kulturne předewzaća, ale tež wobchody nadźijeja so lěpšich wobrotow, zdźěla hłowny jednaćel industrijneje a wikowanskeje komory Kamjenicy, Christoph Neuberg. Kak so prudy wopytowarjow konkretnje wuskutkuja, hodźi so tuchwilu jenož ćežko rjec.
Za turizm je kulturna stolica hoberska šansa, zdźěli jednaćelka Turistiskeje a marketingoweje towaršnosće Sakska, Veronika Hiebl. „Kamjenica a wša wokolina dóstanjetej po tutym puću kedźbnosć, kotruž sej zasłužatej.“ Nazhonjenja bywšich kulturnych stolicow kaž Essena pokazuja, zo ma titul tež lěta po tym hišće pozitiwne wuprudźenje. Nimo toho ludźo swoje jězby krótkodobnje knihuja. Hižo nětko zamołwići na wikach mjezynarodnych turistikarjow registruja, zo zajim za Kamjenicu spochi přiběra. Tež tójšto předewzaćelow na kongresach a posedźenjach w Kamjenicy wočakuja. „Pozitiwne wuwiće, kotrež smy hižo loni wobkedźbowali, pokročuje.“
Tójšto hosći do noweho lěta witali
Železnica trjeba miliardy eurow
Berlin (dpa/SN). Za dołhodobne financowanje marodneje syće kolijow w Němskej trjeba železnica po měnjenju nawody jeje předsydstwa Wernera Gatzera něhdźe 150 miliardow eurow. „Železnica ma wulke ćeže, kiž dyrbja so nuznje rozrisać. Infrastruktura je zestarjena, přežadana a stajnje zaso defektna“, rjekny wón časopisej Focus a připowědźi: „150 miliardow eurow budźe w přichodnych dźesać lětach znajmjeńša trěbnych.“
Kredity, kotrež dyrbi Zwjazk za to brać, su hladajo na woteběrace zadołženje zastupujomne, je sej wón wěsty. Nimo toho dyrbjeli so wuměnjenja za bórzomne inwesticije stworić.
Hižo spočatk 2024 bě zwjazkowy minister za wobchad Volker Wissing (bjezstronski) fonds k financowanju infrastruktury namjetował. Na nim měli so tež priwatni inwestorojo wobdźělić. Konkretny natwar fondsa njeje přiwšěm jasny. Tež zastupnicy branše maja rozrisanje z fondsom za zmysłapołne. Hladajo na hłuboko sahace problemy na polu infrastruktury železnicy pak je dołhodobne rozrisanje trěbne, kotrež skići industriji planowansku a produkcisku wěstotu.
To a tamne (10.01.25)
Na wotpadkowej deponiji za wulkim pokładom pytać wostanje mužej we Wulkej Britaniskej dale zakazane. Najwyše sudnistwo kraja w Londonje je skóržbu muža wotpokazało, z kotrejž chcyše sej dowolnosć za pytanje w měsće Newport wubědźić. Muž twjerdźi, zo je w lěće 2013 kompjuter mylnje do wotpadkow ćisnył, na kotrymž bě 8 000 dypkow internetneje měny Bitcoin składowanych. Dźensa bychu 730 milionow eurow hódne byli. Próstwu, za kompjuterom pytać směć, su zarjady wospjet wotpokazali.
Wjace hač tysac króć su so loni ludźo we wobkedźbowarni njeznatych lětacych objektow w hessenskim Lützelbachu přizjewili, zo bychu wo njewšědnych wobkedźbowanjach na njebju rozprawjeli. Centrala je sej wěsta, zo jedna so zwjetša wo satelity předewzaća USA Starlink. Cuze swětnišćowe łódźe ludźo loni widźeli njejsu.
Šofera zajeli
Lauchhammer/Choćebuz (dpa/SN). Po smjerći policista, kotryž bě na juhu Braniborskeje přećiwo pozdatnym paducham awtow zasadźeny, je wukaz zajeća přećiwo 37lětnemu dóšoł. To zdźěli wčera popołdnju rěčnik Choćebuskeho statneho rěčnistwa Martin Mache. Polak, kotryž je njeskutka dla podhladny, je mjeztym w přepytowanskej jatbje. Wón drje bě šofer awta, kotrež je sakskeho policista zawčerawšim při wukonjenju słužby w Lauchhammeru přejěło. 32lětny zastojnik je wosebitu matu z hozdźikami na puć połožić chcył, jako awto do njeho zrazy.
Scholz znapřećiwja Trumpej
Berlin (dpa/SN). Zwjazkowy kancler Olaf Scholz (SPD) je wuprajenja přichodneho prezidenta USA Donalda Trumpa nastupajo Grönlandsku z jasnymi słowami wotpokazał. Po toho rozmyslowanjach k teritorialnemu rozšěrjenju USA skedźbni jeho Scholz na njezranliwosć mjezow. „Nichtó njesmě mjezy namócnje přestorčić“, Scholz rjekny. Princip suwerenity płaći za kóždy kraj. Trump bě rjekł, zo trjebaja USA Grönlandsku kupu nuznje za dalewobstaće Ameriki.
Mortweho zastajenca našli
Tel Aviv (dpa/SN). Israelska armeja je po swójskich informacijach dalše ćěło zastajenca w Gazaskim pasmje našła. Pječa jedna so wo 53lětneho arabskeho Israelčana. Pola dalšeho namakaneho ćěła móhło so wo 22lětneho syna zawlečeneho jednać. Dotal w Israelu z toho wuchadźachu, zo staj nan a syn hišće žiwaj. Wojowarjo islamistiskeje Hamas běchu 7. oktobra 2023 wjace hač 250 ludźi z Israela do Gazaskeho pasma zawlekli.
Čakaja na znješkódnjenje
Dosć spektakularne předstajenje je bamž Franciskus wčera ...
Wo pomocyza Ukrainu rěčeli
CDU chce rozrost hospodarstwa
Ludźo ćěkaja z Hollywooda
Los Angeles (dpa/SN). Lěsne wohenje w Kaliforniskej so dale rozpřestrěwaja. Nětko su tež lěsy Hollywood Hills na kromje filmoweje metropole potrjechene. Z teje přičiny su zamołwići wukazali, dźěle města ewakuować. Dotal je pjeć ludźi w płomjenjach žiwjenje přisadźiło. Wjace hač 70 000 wobydlerjow před wohenjemi ćěka. Něhdźe 1 400 wohnjowych wobornikow je zasadźenych. Prezident Joe Biden sćele dalšich 2 000 čłonow narodneje gardy do regiona. Sylne wětry wohenje stajnje zaso wožiwjeja a wobornikow wohrožuja.
Policija wobydlerjow namołwja, přikazam zamołwitych nastupajo ewakuowanje na kóždy pad sćěhować. Najwjetši strach hrozy, hdyž ludźo sami spytaja, swoje domy před płomjenjemi škitać.
Wot wohenjow potrjechena je tež filmowa branša w Hollywoodźe. Wjacore zarjadowanja w zwisku ze spožčenjom lětušich filmowych mytow buchu wotprajene.
Po informacijach medijow USA jedna so hižo nětko wo jednu z najwjetšich wohenjowych katastrofow. Dotal su płomjenja wjace hač 1 000 domow zničili.
