Młódši přewozmu
Statne rěčnistwa přećežene
Drježdźany (dpa/SN). Justicna ministerka Constanze Geiert žada sej pomoc za chětro přećežene statne rěčnistwa. „Situacija je wjace hač napjata“, rjekny politikarka CDU powěsćerni dpa hladajo na spochi přiběrace ličby přepytowanjow, kotrež ma statne rěčnistwo wobdźěłać. Po informacijach ministerstwa pobrachuja statni rěčnicy. Dźěłowe poćeženje statnych rěčnistwow je zdźěla jara wulke. Jeničce minjenej lěće je 50 000 nowych přepytowanskich padow dóšło. Tuchwilu kopi so w statnych rěčnistwach 271 500 padow. Cyłkownje 440 statnych rěčnikow chłostajomne njeskutki přepytuje. Z tym su 86 procentow městnow wobsadźili. Loni móžachu nimale 267 000 padow wobdźěłać.
Situacija přiwótřa so wosebje padow w zwisku z azylowym zakonjom dla. Tola tež ličba padustwow, ranjenja ćěła a płokanja pjenjez přiběra. Nic naposledk postara so tež nowy zakoń cannabisa wo přidatne dźěło. Justica bědźi so z „rjemjeslnisce špatnje zdźěłanymi zakonjemi“, kotrež zawinuja tójšto napinanja ze snadnym wuspěchom přećiwo drogowej kriminaliće.
W Błótach wotpadki ludźi rumowali
To a tamne (13.03.25)
Hač do 150 listow za samsny wobchadny njeskutk su wjacori ludźo w Offenbachu dóstali. Přičina bě zmylk w kompjuterowej syći tamnišeho zarjada za porjadk, z kotrejž listy awtomatisce rozesćelu. Jedyn z potrjechenych je wopačneho parkowanja dla samo 300 listow přijał. Zarjad je so mjeztym zamołwił. Pokutu ludźo płaćić njetrjebaja.
Swój čas w jastwje je bywši tenisowy hrajer Boris Becker w knize předźěłał. Jatba we Wulkej Britaniskej słuša k najbolostnišim nazhonjenjam swojeho žiwjenja, piše 57lětny w interneće. Spisowaćelenje bě pospyt, tole wuhojić. Kniha z titulom „Inside. Dobyć – zhubić – znowa započeć“ wuńdźe po informacijach nakładnistwa Ullstein 10. septembra. Becker bě insolwencu přizjewił. Při tym je zamóženje milinow eurow zatajił. Wón dyrbješe dwě a poł lěta do jastwa.
Ministerscy prezidenća so zešli
Berlin (dpa/SN). Wodźacy politikarjo zwjazkowych krajow Němskeje su dźensa na konferency ministerskich prezidentow wo politiskim połoženju po wólbach zwjazkoweho sejma wuradźowali. Při tym rěčachu tež wo jutřišim posedźenju stareho zwjazkoweho sejma. Unija CDU/CSU a SPD běštej so dojednałoj, so na dobro brónjenja a infrastruktury přidatnje zadołžić. Kraje dyrbjeli tomu w Zwjazkowej radźe z wjetšinu dweju třećinow přihłosować.
Ministerstwo USA ludźi pušća
Washington (dpa/SN). Kubłanske ministerstwo USA nazhoni razne naprawy prezidenta Donalda Trumpa. Něhdźe połojcu přistajenych su mjeztym pušćili, ministerstwo zdźěla. Sćelak Foxnews rozprawja, zo su sobudźěłaćerjow wo zawrjenju wšitkich běrowow informowali: „Posledni nadawk ministerstwa je nimale 50 procentow přistajenych pušćić.“ W ministerstwje dźěła oficialnje 4 100 ludźi.
Bamž zaso měrnu nóc měł
Prezident USA Donald Trump je wčera zhromadnje z nawodu awtotwarca ...
Čakaja na reakciju z Moskwy
BSW: Hłosy znowa wuličić!
EU připowědźa cła na twory z USA
Brüssel (dpa/SN). Europska unija je konsekwentnu reakciju na wot dźensa płaćiwe cła USA na importy wocla a aluminija připowědźiła. Kaž Europska komisija dźensa rano zdźěli, žadaja sej w prěnjej kročeli wot apryla zaso wurjadne cła na importowane produkty z USA kaž Bourbon-Whisky, jeansy, motorske, čołmy a butru z lěsnych worješkow. Dalše přećiwne naprawy wukazaja po dorěči z čłonskimi statami EU srjedź apryla, tak w Brüsselu zdźělichu.
Dalše cła potrjechja předewzaća, kotrež ameriske ratarske wudźěłki kaž pjeriznu, howjaze mjaso, mórske płody, worješki, jeja, mlokowe wudźěłki, cokor a zeleninu w EU předawaja. Nimo toho planuje EU wurjadne cła na dalše industrijowe produkty kaž wocl, aluminij, šaty, kožu, domjace nastroje, graty a drjewjane wudźěłki.
„Europska unija dyrbi jednać, zo by přetrjebarjow w předewzaćach škitała“, rjekny prezidentka komisije EU Ursula von der Leyen. Přećiwne naprawy su drje krute, ale přiměrjene, wona rjekny.
