UNO z rezoluciju na dobro Ruskeje
New York (dpa/SN). Bjezstrašnostna rada UNO je Moskwje přichilenu rezoluciju schwaliła, kotruž bě knježerstwo USA z prezidentom Donaldom Trumpom zapodało. Po tutym puću je najmócniši gremij UNO prěni króć zhromadny dokument k wójnje wobzamknył. W radźe dósta tekst, w kotrymž Rusku jako agresora njepomjenuja, hłosy dźesać čłonow w 15čłonskej radźe a tak trěbnu wjetšinu. W zwadźe wo nowy kurs napřećo Ukrainje hłosowachu USA mjez druhim zhromadnje z Ruskej a Chinu.
Porno tomu je so wšitkich pjeć europskich čłonow rady, Wulka Britaniska, Francoska, Słowjenska, Danska a Grjekska, hłosa wzdało. Britojo a Francozojo maja drje teoretiske prawo na weto, njejsu pak je wot lěta 1989 wjace wužiwali. Rezolucije Bjezstrašnostneje rady UNO su ludoprawnisce zawjazowace. W rezoluciji žadaja sej spěšne zakónčenje wójny w Ukrainje. Při tym njemjenuja Rusku agresora a nježadaja sej cofnjenje ruskich jednotkow z Ukrainy. Europske kraje tutón formulaciju wotpokazuja.
SPD žada sej přizwolenja Merza
Prěnje posedźenja zapósłancow po wólbach zwjazkoweho sejma
Berlin (dpa/SN). W bližacych so koaliciskich jednanjach wočakuje SPD wot kanclerskeho kandidata CDU/CSU Friedricha Merza najebać toho jasne wólbne dobyće widźomne přizwolenja na dobro socialdemokratow. SPD njeje so nihdy bojała, zamołwitosć za kraj přewzać, rjekny předsyda strony Lars Klingbeil sćelakej ZDF. „Při wšěm wočakujemy, zo Merz swój kurs a wosebje swój ton jasnje změni.“ Tak trjebaja dźěławi lěpše mzdy a wjace pjenjez w móšni. Nimo toho dyrbjeli so renty zawěsćić a miliardy eurow wopřijace inwesticije nastorčić.
Klingbeil potwjerdźi, zo njeje scyła hišće wučinjenje, zo so socialdemokraća na knježerstwje wobdźěla. „Bul leži pola Friedricha Merza. Wón je zamołwity, rozmołwy wjesć“, wón rjekny.
Unija bě wólby jako najsylniša móc dobyła, SPD porno tomu poćerpje historisku poražku. Nětko wupada wšitko za koaliciju CDU a SPD.
Wuknu z radosću
Składaj słomy so wotpaliłoj
Wuslědki wólbow wužaduja tež Serbow
W reakciji na wólby zwjazkoweho sejma je předsyda Domowiny Dawid Statnik přilubił, zhromadnje z mjeńšinowej radu přichodne knježerstwo w zajimje narodnych mjeńšin wužadać.
To a tamne (25.02.25)
Zwada mjez žonu a jeje partnerom na awtodróze A 4 mjez Drježdźanami a Zhorjelcom je zasadźenje policije zawiniła. 31lětna žona bě so předwčerawšim, njedźelu z mužom zwadźiła a je z parkowanišća „Lubijska woda“ prosće bjez njeho wotjěła, policija zdźěli. Muž na to spytaše, pěši dale hić. Šoferojo pěška na kromje awtodróhi wuhladachu a informowachu policiju. Zastojnicy muža sobu wzachu a dowjezechu jeho na dwórnišćo. Hač je so porik wujednał, njeje znate.
Nakładne awto ze 162 žiwymi swinjemi je so na awtodróze A 2 pola sewjerorynsko-westfalskeho Hamma powaliło. Něhdźe 30 zwěrjatow na to do bliskeho lěsa ćekny. Někotre při njezbožu zahinychu. A 2 bě wjacore hodźiny dospołnje zawrjena. Wobchad haćeše so na 16 kilometrow. Ratar z bliskeje wsy za swinjemi honješe. Hač je wšitke dosahnył, njeje znate.
Politiske zemjerženje w Serbach
AfD tež we Worklecach a Njebjelčicach najsylniša strona – CDU chce z ludnosću bóle rěčeć
Berlin/Budyšin (SN/mb). Prěni raz njeje CDU w dwěmaj gmejnomaj katolskich Serbow wjac najsylniša strona. Na wčerawšich wólbach do zwjazkoweho sejma je AfD we Worklecach 37,8% dóstała (CDU 29,3). Přirost za módru stronu wučinja 14,9%, minus za CDU 2,3%. SPD spadny tule wo 8,2 na jenož hišće 5,2%. Tež w Njebjelčicach steji AfD nětko z 34,8% před CDU (32,2) na prěnim městnje (wšě ličby tuteju gmejnow bjez hłosow listowych wólbow). Kulow tohorunja wjac do „čorneje kupy w módrym morju“ njesłuša: AfD stopnjowaše so wo 12,6% na 39,1% (CDU 30,6%).
Dźensa před třomi lětami Ruska Ukrainu nadpadnyła – zhladowanja ...
Po Mnichowskim zrěčenju z lěta 1938 bě Winston Churchill prajił: „Naše knježerstwo móžeše wolić mjez hańbu a wójnu. Wone je so za hańbu rozsudźiło, ale wójna je njewobeńdźomna.“
Wulka Britaniska a Francoska běštej wobzamknyłoj, demokratiski a suwereny stat – Čěskosłowaksku – diktatorej do rukow dać. Čechow a Słowakow so nichtó za jich měnjenjom prašał njeje. Přerada sta so njedźiwajo jich njewotwisnosće a jich prawa, wo swójskim staće, swojim wosudźe a swojim žiwjenju rozsudźeć.
Wězo so stawizny njewospjetuja. Ale bohužel so ludźo w podobnych situacijach podobnje zadźeržuja, to rěka, zo činja podobne zmylki.
Merz chce spěšnje jednać
Unija CDU/CSU wólby zwjazkoweho sejma dobyła – AfD na wuchodźe prědku
Berlin (dpa/SN). Unija CDU/CSU z kanclerskim kandidatom Friedrichom Merzom na čole je wólby zwjazkoweho sejma jasnje dobyła. Předsyda CDU je připowědźił, zo chce nowe zwjazkowe knježerstwo hač k jutram wutworić, dotal pak njeje hišće jasne, z kim. Zwjazkowy kancler Olaf Scholz je poražku swojeje SPD mjeztym přiznał. Strona leži za AfD, kotraž je swój wuslědk podwojiła. Scholz je připowědźił, zo njebudźe w nowym knježerstwje sobu skutkować.
Po dotalnym wuličenju je so unija CDU/CSU na 28,5 procentow polěpšiła (2021: 24,1 procent). Při wšěm je to druhi najšpatniši wuslědk unije. AfD docpěwa 20,8 procentow (10,4 procenty). SPD kanclera Olafa Scholza je dramatisce na najšpatniši wuslědk po 1949 spadnyła a docpěwa runje hišće 16,5 procentow (2021: 25,7 procentow). Zeleni z kanclerskim kandidatom Robertom Habeckom spadnu na 11,6 procentow. Lěwica polěpši so jasnje na 8,7 procentow (4,9). FDP nima z 4,3 procentami ani wjace połojcu hłosow z lěta 2021 (11,4) a njebudźe runje tak kaž BSW (4,97 procentow) hižo w zwjazkowym sejmje zastupjena.
Wulka njewěstosć
Bonn (B/SN). Prezident USA Donald Trump je spěchowanje wuwićowych pomocnych naprawow w USA (USAID) z 10 000 sobudźěłaćerjemi a z lětnym budgetom 40 miliardow dolarow na 90 dnjow wusadźił. Tež cyrkwinske pomocne skutki w Němskej kaž Adveniat, Missio a Renovabis su potrjechene.
Złoty templ
Amritsar (B/SN). W indiskim měsće Amritsar steji w kumštnym jězorje wulki złoty templ z 15. lětstotka za 25 do 20 milionow přisłušnikow nabožiny sikh. Woni wěrja do jeničkeho stworićela a do jenakosće wšěch ludźi. Na najwažnišim městnje wěriwych kóždy dźeń wurězki ze swjateje knihi, přewodźane z cunjej hudźbu, čitaja. Mužojo-sikhojo njesmědźa sej włosy třihać a žadyn turban nosyć. Woni noša naručnicy a mały mječ.
List ameriskim biskopam
